യു.എസിന്റെ മുങ്ങി കപ്പലിന് സംഭവിച്ചത് എന്ത്, തെക്കൻ ചൈനക്കടലിൽ വച്ചുണ്ടായ ദുരന്തത്തിൽ പിന്നിൽ ചൈനയുടെ കൈകളോ.... രാജ്യാന്തര മേഖലയിൽ വൻ അഭ്യൂഹങ്ങൾക്ക് വഴിവച്ചു ദുരൂഹത പടർത്തിയ യുഎസ്എസ് കണക്റ്റിക്കറ്റിന്റെ കൂട്ടിയിടിയിൽ പുതിയ വെളിപ്പെടുത്തൽ പുറത്ത് വരികയാണ് ഇപ്പോൾ.

സീവൂൾഫ് ക്ലാസ് വിഭാഗത്തിൽ ഉൾപ്പെട്ട അതിവേഗ ആക്രമണം നടത്തുന്ന ആണവ മുങ്ങിക്കപ്പൽ തെക്കൻ ചൈനക്കടലിൽ കഴിഞ്ഞയാഴ്ച കൂട്ടിയിടിച്ചത് കടലിനുള്ളിലെ മലയിൽ ആണെന്നാണ് പുതിയ വിവരം. യുഎസ് നാവിക സേനയാണ് ഇപ്പോൾ വെളിപ്പെടുത്തൽ നടത്തിയിരിക്കുന്നത്. ചൈനയുടെ സമീപമുള്ള കടലായ തെക്കൻ ചൈനക്കടലിൽ വച്ചു കപ്പലിൽ അജ്ഞാത വസ്തു ഇടിച്ചതിനെ തുടർന്ന് കപ്പലിലെ 11 യാത്രികർക്ക് പരുക്കേറ്റിരുന്നു.

തുടർന്ന് തകരാറിലായ മുങ്ങിക്കപ്പലിനെ പസിഫിക്കിലെ യുഎസിന്റെ നാവിക സ്റ്റേഷനായ ഗുവാമിലെത്തിക്കുകയും അറ്റകുറ്റപ്പണികൾ നടത്തുകയും ചെയ്തിരുന്നു. ഇതിൽ ചൈനയുടെ പങ്കും സംശയിക്കപെട്ടിരുന്നു . യുഎസ് തെക്കൻ ചൈന കടലിൽ കുറച്ചു നാളുകളായി പുലർത്തുന്ന സ്ഥിരം സാന്നിധ്യത്തിൽ രോഷാകുലരായ ചൈന നടത്തിയ പ്രതികാര നടപടിയാണ് ഇതെന്ന മട്ടിൽ ആരോപണങ്ങൾ ഉയരുകയും ചെയ്തിരുന്നു.

ചൈന ഇക്കാര്യങ്ങൾ നിഷേധിക്കാതിരുന്നതും സംശയത്തിന് ആക്കം കൂട്ടി. ചൈനയുടെ മറ്റൊരു അന്തർ വാഹിനിയാണ് കണക്റ്റിക്കറ്റുമായി കൂട്ടിയിടിച്ചതെന്നാണ് ചിലർ ഉയർത്തിയ വാദം. എന്നാൽ ഇടിച്ചതു കടൽമല ആണെന്നും മറ്റ് അന്തർവാഹിനികൾ ഒന്നും സംഭവത്തിൽ ഉൾപ്പെട്ടിട്ടില്ലെന്നും യുഎസിന്റെ റിപ്പോർട്ട്‌ തന്നെ പുറത്ത് വന്നതിന് ശേഷമാണ് അഭ്യൂഹങ്ങൾക്ക് അന്ത്യമായത്.

അതേസമയം ഇത് ആദ്യമായല്ല യുഎസ് കപ്പലുകൾ മഞ്ഞ് മലയിൽ ഇടിക്കുന്നത്. 2005ൽ യുഎസ്എസ് സാൻ ഫ്രാൻസിസ്കോ എന്ന മുങ്ങിക്കപ്പൽ ഗുവാമിന് സമീപമുള്ള അജ്ഞാത കടൽ മലയിൽ ഇടിച്ചിരുന്നു. 30 നോട്ട് വേഗത്തിൽ പോകുകയായിരുന്ന കപ്പലിലെ 137 യാത്രികർക്കും ചെറുതും വലുതുമായ പരുക്ക് പറ്റിയിരുന്നു.

ഒരു യാത്രികൻ അപകടത്തിൽ മരിക്കുകയും ചെയ്തു. സമുദ്രങ്ങളിൽ ഒരുകാലത്തു സജീവമായി നിലനിന്ന സജീവ അഗ്നിപർവതങ്ങളുടെ ശേഷിപ്പുകളാണ് സീമൌണ്ട്സ് എന്നും അറിയപ്പെടുന്ന സമുദ്രാന്തര പർവതങ്ങൾ. ഇവയിൽ പലതും കോണാകൃതി ഉള്ളവയും ചിലത് പീഠങ്ങൾക്ക് സമാനമായ ആകൃതി ഉള്ളവയുമാണ്.ഇവ ഗുയോറ്റ്സ് എന്നാണ് അറിയപ്പെടുന്നത്. പലപ്പോഴും കപ്പൽ അപകടങ്ങൾക്ക് ഇവ ഒരു കാരണമായിട്ടുണ്ട്.

എങ്കിലും കടൽമലകൾ സമുദ്ര ജൈവ വൈവിധ്യം കാത്തുസൂക്ഷിക്കുന്നതിൽ വലിയ സഹായമാണ് ഇവ ചെയ്യുന്നത്. കടലാഴങ്ങളിൽ നിന്നുള്ള ധാതു നിക്ഷേപങ്ങൾ ഇവയുടെ ഉയർന്ന ഭാഗങ്ങളിലേക്ക് എത്തുന്നതിനാൽ ഇവിടങ്ങളിൽ ജലസസ്യങ്ങൾക്ക് നല്ല വളക്കൂറുള്ള വളർച്ചാനിലം ലഭിക്കും.

കോറലുകൾ, സ്പഞ്ചുകൾ തുടങ്ങിയ ജീവിവർഗങ്ങൾ ഇത് മൂലം ഇവിടെ തഴച്ചു വളരും. ഒരു കിലോമീറ്ററിന് മേൽ പൊക്കമുള്ള ഒരു ലക്ഷത്തിൽ അധികം കടൽ പർവതങ്ങൾ ഭൂമിയാകമാനം ഉള്ള സമുദ്രങ്ങളിൽ ഉണ്ടെന്നു ശാസ്ത്രജ്ഞർ പറയുന്നു.