ബ്രസീലിലെ പ്രശസ്ത യുവ ഗായികയും ഗ്രാമി പുരസ്‌കാര ജേതാവുമായ മരിലിയ മെന്‍ഡോങ്ക (26) വിമാന അപകടത്തില്‍ മരിച്ചു. മരിലിയ സഞ്ചരിച്ച ചെറുവിമാനം മിനാസ് ഗെറൈസ് സംസ്ഥാനത്ത് തകര്‍ന്ന് വീണതായി അധികൃതര്‍.


അപകടകാരണം അറിവായിട്ടില്ല. അപകടത്തില്‍ മരിലിയയുടെ അമ്മാവനും രണ്ട് പൈലറ്റുമാരും മരിച്ചു. വെള്ളച്ചാട്ടത്തിനു സമീപം പാറക്കെട്ടിലാണ് വിമാനം തകര്‍ന്നു വീണത്.

കാരറ്റിംഗ നഗരത്തിനടുത്തുള്ള ഗ്രാമപ്രദേശത്തായിരുന്നു അപകടം നടന്നത്. ഇവിടെ വെള്ളിയാഴ്ച മരിലിയയുടെ സംഗീത പരിപാടി നിശ്ചയിച്ചിരുന്നു.

2019 ലെ ഗ്രാമി പുരസ്‌കാര ജേതാവ് കൂടിയാണ്. യൂട്യൂബില്‍ 22 ദശലക്ഷം ഫോളോവേഴ്സും സ്‌പോട്ടിഫില്‍ എട്ട് ദശലക്ഷത്തിലധികം ശ്രോതാക്കളുമുണ്ട്. ബ്രസീലിനു പുറത്തും വലിയ ആരാധക വൃന്ദമുള്ള യുവ ഗായികയായിരുന്നു മരിലിയ.