ഫിലിപ്പീന്‍സില്‍ റായ് ചുഴലിക്കൊടുങ്കാറ്റില്‍ മരിച്ചവരുടെ എണ്ണം 375 ആയി . അഞ്ഞൂറിലധികം പേര്‍ക്കാണ് പരിക്കേറ്റത്. ഇവരില്‍ ചിലരുടെ നില ഗുരുതരമായി തുടരുകയാണ്. 52 പേരെ ഇനിയും കണ്ടെത്താനുണ്ടെന്ന് നാഷണല്‍ പോലീസ് അറിയിച്ചു.

ചുഴലിക്കാറ്റ് കടന്നുപോയ പ്രദേശങ്ങളിലെ വൈദ്യുതി-വാര്‍ത്താവിനിമയ സംവിധാനങ്ങള്‍ പൂര്‍ണമായും തകര്‍ന്നതിനാല്‍ ദുരന്തത്തിന്റെ വ്യാപ്തി പൂര്‍ണമായി മനസിലാക്കാന്‍ കഴിഞ്ഞിട്ടില്ല. മണിക്കൂറില്‍ 195 കിലോമീറ്റര്‍ വേഗത്തിലാണ് കാറ്റ് വീശിയത്.

പ്രളയവും മണ്ണിടിച്ചിലുമാണ് മരണസംഖ്യ ഉയര്‍ത്തിയത്. മേഖലയില്‍ ഭക്ഷ്യക്ഷാമവും കുടിവെള്ളക്ഷാമവും രൂക്ഷമാണ്. നാശനഷ്ടം വിലയിരുത്തുകയാണ്. തെക്കുകിഴക്കന്‍ എഷ്യന്‍ രാജ്യത്ത് ആഞ്ഞടിച്ച ഏറ്റവും മാരകമായ ചുഴലിക്കാറ്റുകളില്‍ ഒന്നാണിത്.

മരങ്ങള്‍ കടപുഴകി വീണും മതില്‍ തകര്‍ന്നുമാണ് ഒട്ടേറെയാളുകള്‍ കൊല്ലപ്പെട്ടത്. നിരവധി നഗരങ്ങളില്‍ ഇനിയും രക്ഷാപ്രവര്‍ത്തകര്‍ക്കു കടന്നുചെല്ലാന്‍ കഴിഞ്ഞിട്ടില്ല. അതിനാല്‍ മരണസംഖ്യ ഇനിയും ഉയര്‍ന്നേക്കാമെന്നാണു നിഗമനം.