വിമാനയാത്രയ്ക്കിടെ ഞെട്ടിപ്പിക്കുന്ന സംഭവമുണ്ടായി. യുവതി വയോധികന്റെ മുഖത്തടിച്ചു . ഡെല്‍റ്റയില്‍ നിന്നും അറ്റ്‌ലാന്റയിലേക്ക് പോകുകയായിരുന്ന ഡെല്‍റ്റ എയര്‍ ലൈന്‍സ് വിമാനത്തിലാണ് സംഭവം. വയോധികന്റെ മുഖത്തടിച്ച യുവതിയെ പിന്നീട് അറസ്റ്റ് ചെയ്തു.

മാസ്‌ക് ശരിയായി വെയ്ക്കാത്തതിനെ തുടര്‍ന്നുണ്ടായ തര്‍ക്കമാണ് സംഘര്‍ഷത്തില്‍ കലാശിച്ചത്. വിമാനത്തില്‍ ഇരുന്ന് ഭക്ഷണം കഴിക്കുകയായിരുന്നു വയോധികന്‍. ഈ സമയം ഇവിടെയെത്തിയ യുവതി മാസ്‌ക് ശരിയായി വെയ്ക്കാന്‍ വയോധികനോട് ആവശ്യപ്പെടുകയായിരുന്നു.

എന്നാല്‍ താന്‍ ഭക്ഷണം കഴിക്കുകയാണെന്നും അതിന് ശേഷം മാസ്‌ക് ശരിയായിവയ്ക്കാമെന്നും വയോധികന്‍ പറഞ്ഞു. എന്നാല്‍ തന്നോട് ആരാണ് ഇവിടെ ഇരിക്കാന്‍ പറഞ്ഞതെന്ന് ചോദിച്ച് വയോധികന് നേരെ യുവതി ശകാര വര്‍ഷം ചൊരിയുകയായിരുന്നു. തുടര്‍ന്ന് ഇരുവരും തമ്മില്‍ വാക്ക് തര്‍ക്കം ആരംഭിച്ചു. പിന്നീട് വിമാനത്തിലെ ജീവനക്കാര്‍ എത്തി യുവതിയെ മറ്റൊരിടത്തേക്ക് മാറ്റുകയായിരുന്നു.

മറ്റൊരു സീറ്റില്‍ ഇരുന്ന യുവതിയെ ഇയാള്‍ വംശീയമായി അധിക്ഷേപിച്ചു. ഇതോടെ ഇരുവരും തമ്മില്‍ വീണ്ടും തര്‍ക്കം ഉണ്ടായി. വയോധികന്‍ കൂടുതല്‍ അധിക്ഷേപ പരാമര്‍ശങ്ങള്‍ ഉന്നയിച്ചതോടെ യുവതി ഇരിപ്പിടത്തില്‍ നിന്നും എഴുന്നേറ്റ് വന്ന് വയോധികന്റെ മുഖത്തടിക്കുകയായിരുന്നു. തുടര്‍ന്ന് ജീവനക്കാര്‍ എത്തി യുവതിയെ പിടിച്ചു മാറ്റി.

ജീവനക്കാര്‍ വിവരം അറിയിച്ചതിനെ തുടര്‍ന്നായിരുന്നു യുവതിയെ പോലീസ് അറസ്റ്റ് ചെയ്തത്. വിമാനം അറ്റ്‌ലാന്റയില്‍ എത്തിയ ഉടനെ പോലീസ് എത്തി അറസ്റ്റ് ചെയ്യുകയായിരുന്നു. അതേസമയം യുവതി വയോധികനെ മര്‍ദ്ദിക്കുന്നതിന്റെ ദൃശ്യങ്ങള്‍ സമൂഹമാദ്ധ്യമങ്ങളില്‍ വ്യപകമായി പ്രചരിക്കുന്നുണ്ട്.

യുവതിയും മാസ്‌ക് ശരിയായി ധരിക്കാതെയായിരുന്നു വയോധികനോട് തട്ടിക്കയറിയത്. ഇതും സഹയാത്രക്കാര്‍ ചൂണ്ടിക്കാട്ടിയിരുന്നു. ദൃശ്യങ്ങളില്‍ ഇതും വ്യക്തമാണ്.