തെക്കന്‍ ചൈനയിലെ ഗ്വാങ്‌ഡോംഗ് പ്രവിശ്യയില്‍ ജോലി ചെയ്യുന്ന ലി ജിംഗ്വെ എന്ന യുവാവിന്റെ കഥ കേട്ട് അമ്പരന്നിരിക്കുകയാണ് ലോകം മുഴുവനുമിപ്പോള്‍. ലി ജിംഗ്വെയെ തന്റെ നാലാമത്തെ വയസില്‍ ഒരാള്‍ കൂട്ടിക്കൊണ്ടു പോയതാണ്.

അങ്ങനെ തന്റെ കുടുംബത്തെ കണ്ടെത്താന്‍ ഓര്‍മയിലുള്ള സ്ഥലത്തിന്റെ മാപ്പ് വരച്ച് അത് ഓണ്‍ലൈനില്‍ പോസ്റ്റ് ചെയ്യുകയായിരുന്നു ഈ യുവാവ്. പോസ്റ്റ് ചൈനീസ് സാമൂഹികമാധ്യമങ്ങളില്‍ വൈറലായതോടെ യുവാവിന് തന്റെ കുടുംബത്തെ കണ്ടെത്താനും കഴിഞ്ഞു.

33 വര്‍ഷങ്ങള്‍ക്ക് ശേഷം അങ്ങനെ അയാള്‍ തന്റെ സ്വന്തം അമ്മയെ കണ്ടുപിടിച്ചു. തന്നെ കുട്ടിക്കാലത്ത് വീട്ടില്‍ നിന്ന് ആരോ കൊണ്ടുപോയതാണെന്ന് അവന് അറിയാമായിരുന്നു. എന്നാല്‍ തന്റെ മാതാപിതാക്കളുടെ പേരുകളോ തന്റെ ഗ്രാമമോ യഥാര്‍ഥ പേരോ ഒന്നും അവന് ഓര്‍മ്മയില്ലായിരുന്നു. ദത്തെടുത്ത മാതാപിതാക്കളില്‍ നിന്ന് വിവരങ്ങളൊന്നും ലഭിക്കാത്തതിനാലും ദേശീയ ഡാറ്റാബേസിലേക്ക് അവന്റെ ഡിഎന്‍എ നല്‍കാത്തതിനാലും തന്റേതായ രീതിയില്‍ അന്വേഷണം തുടങ്ങാന്‍ ലി തീരുമാനമെടുക്കുകയായിരുന്നു.

ഡിസംബര്‍ 24 -ന് ടിക് ടോക്കിന്റെ ചൈനീസ് പതിപ്പായ ഡൂയിനില്‍ ലി ഒരു വീഡിയോ പോസ്റ്റ് ചെയ്തു. തന്റെ കുട്ടിക്കാലത്തെ വീടിന്റെ ഓര്‍മ്മയില്‍ നിന്ന് വരച്ച ഒരു ഭൂപടം ആയിരുന്നു അയാള്‍ പോസ്റ്റ് ചെയ്തത്. ഒരു സ്‌കൂള്‍, മുളങ്കാട്, ഒരു ചെറിയ കുളം തുടങ്ങിയവയെല്ലാം അതിലുണ്ടായിരുന്നു. ഞാന്‍ അവന്റെ വീട് കണ്ടെത്തുന്ന ഒരു കുട്ടിയാണ്. 1989 -ല്‍ എനിക്ക് ഏകദേശം നാല് വയസുള്ളപ്പോള്‍ ഒരു അയല്‍ക്കാരന്‍ എന്നെ ഹെനാനിലേക്ക് കൊണ്ടുപോയി- അദ്ദേഹം വീഡിയോയില്‍ പറഞ്ഞു. 'ഇത് ഞാന്‍ ഓര്‍മ്മയില്‍ നിന്ന് വരച്ച എന്റെ വീടിന്റെ പ്രദേശത്തിന്റെ ഭൂപടമാണ്' എന്നും ലി വിഡിയോയില്‍ വിശദീകരിച്ചു.

അധികാരികളുടെയും മറ്റും സഹായത്തോടെ ലിയുടെ ജന്മദേശം യുനാനിലെ ഒരു പര്‍വത നഗരമായ ഷാതോങ്ങാണ് എന്ന് സ്ഥിരീകരിച്ചു. ഏകദേശം 2000 കിലോമീറ്റര്‍ അകലെയുള്ള ഹെനാന്‍ പ്രവിശ്യയിലെ ലങ്കാവോ കൗണ്ടിയിലെ ഒരു ആണ്‍കുട്ടിയെ ആഗ്രഹിച്ചിരുന്ന ഒരു കുടുംബത്തിന് ലിയെ വില്‍ക്കുകയായിരുന്നു. ലിയുടെ കഥ പെട്ടെന്ന് മാധ്യമങ്ങളുടെയും പ്രാദേശിക അധികാരികളുടെയുമൊക്കെ ശ്രദ്ധ ആകര്‍ഷിച്ചു. ദിവസങ്ങള്‍ക്കുള്ളില്‍ തന്നെ അവന്റെ അമ്മയാകാന്‍ സാധ്യതയുണ്ടെന്ന് വിശ്വസിക്കുന്ന യുനാനിലെ ഒരു സ്ത്രീ ഉള്‍പ്പെടെ, കുടുംബാംഗങ്ങളുമായി അദ്ദേഹത്തിന് ബന്ധപ്പെടാന്‍ സാധിച്ചു.

സ്ത്രീയുമായുള്ള ഒരു ഫോണ്‍ സംഭാഷണത്തില്‍ ആണ്‍കുട്ടിയായിരിക്കുമ്പോള്‍ ഗോവണിയില്‍ നിന്ന് വീണപ്പോള്‍ അവന്റെ താടിയിലുണ്ടായ ഒരു പാട് അവര്‍ കൃത്യമായി പറഞ്ഞു. അടുത്തത് ഡിഎന്‍എ ടെസ്റ്റുകള്‍ ആയിരുന്നു. ഡിസംബര്‍ 28 -ന് ചൈനയുടെ പൊതുസുരക്ഷാ മന്ത്രാലയത്തിന്റെ ആന്റി ഹ്യൂമന്‍ ട്രാഫിക്കിംഗ് ഓഫീസിന്റെ ഡൂയിന്‍ അക്കൗണ്ട് ഇരുവരും തമ്മില്‍ ബന്ധമുണ്ട് എന്നും അമ്മയാണ് എന്നും സ്ഥിരീകരിച്ചു. ലിയെയും അമ്മയെയും ശനിയാഴ്ച വീണ്ടും ഒന്നിപ്പിക്കുന്നതിനുള്ള ക്രമീകരണങ്ങള്‍ നടത്തുമെന്നും അവര്‍ കൂട്ടിച്ചേര്‍ത്തു. അവന്റെ അച്ഛന്‍ ഇപ്പോള്‍ ജീവിച്ചിരിപ്പില്ല.

അതേസമയം ലിയെ വീട്ടില്‍ നിന്നും ചെറിയ പ്രായത്തില്‍ മാറ്റിയതിനോട് പലരും രോഷം പ്രകടിപ്പിച്ചു. ഭര്‍ത്താവും രണ്ട് കുട്ടികളും 11 വയസുള്ള പേരക്കുട്ടിയും അടക്കം നിരവധി കുടുംബാംഗങ്ങളുടെ മരണം കാണേണ്ടിവന്ന ലിയുടെ അമ്മയുടെ ദുരവസ്ഥയില്‍ മറ്റുള്ളവര്‍ സഹതപിച്ചു. എന്തൊക്കെയാണെങ്കിലും കുടുംബത്തെ കണ്ടെത്താനായതിലുള്ള സന്തോഷത്തിലാണ് ലി ഇപ്പോള്‍.

നീണ്ട മുപ്പത്തിമൂന്ന് വര്‍ഷത്തെ കാത്തിരിപ്പ്, ആഗ്രഹത്തിന്റെ എണ്ണമറ്റ രാത്രികള്‍, ഒടുവില്‍ ഓര്‍മ്മയില്‍ നിന്ന് കൈകൊണ്ട് വരച്ച ഒരു ഭൂപടം, ഇത് 13 ദിവസങ്ങള്‍ക്ക് ശേഷം തികഞ്ഞ മോചനത്തിന്റെ നിമിഷമാണ്' ലി തന്റെ ഡൂയിന്‍ പ്രൊഫൈലില്‍ കുറിച്ചു. 'എന്റെ കുടുംബവുമായി വീണ്ടും ഒന്നിക്കാന്‍ എന്നെ സഹായിച്ച എല്ലാവര്‍ക്കും നന്ദി അറിയിക്കുന്നുവെന്നും ലി കൂട്ടിച്ചേര്‍ത്തു.