കേരളമാകെയിപ്പോള്‍ മിന്നല്‍ മുരളി തരംഗമാണ്. ഒരാള്‍ക്ക് മിന്നല്‍ ഏല്‍ക്കാനുള്ള സാധ്യത അഞ്ച് ലക്ഷത്തില്‍ ഒന്ന് മാത്രമാണെന്നാണ് കണ്ടെത്തല്‍. എന്നാല്‍ ചിലര്‍ക്ക് ഒന്നിലധികം തവണ മിന്നല്‍ ഏല്‍ക്കാറുണ്ട്. ഏഴ് തവണ മിന്നലേറ്റ ഒരാളുണ്ട്.

റോയ് സള്ളിവനാണ് ഏഴ് തവണ മിന്നലേറ്റത്. യുഎസിലെ വെര്‍ജീനിയയിലെ വനംവകുപ്പ് ഉദ്യോഗസ്ഥനായ ഇദ്ദേഹത്തിനാണ് ലോകത്ത് ഏറ്റവും കൂടുതല്‍ സ്ഥിരീകരിക്കപ്പെട്ട മിന്നലേശലുകള്‍ ഉണ്ടായിട്ടുള്ളത്. ഏഴ് തവണയും അതിതീവ്ര മിന്നല്‍ പ്രഹരമാണ് റോയ്ക്ക് ഏറ്റത്. ഇതൊരു അപൂര്‍വ സംഭവമായതു കൊണ്ട് തന്നെ അദ്ദേഹത്തിന്റെ പേരിലാണ് ഏറ്റവുമധികം തവണ മിന്നലേറ്റിട്ടും രക്ഷപ്പെട്ട മനുഷ്യന്‍ എന്ന റെക്കോഡ്.

ഹ്യൂമന്‍ ലൈറ്റിംഗ് കണ്ടക്ടര്‍, ഹ്യൂമന്‍ ലൈറ്റിംഗ് റോഡ് എന്നൊക്കെയാണ് റോയ് അറിയപ്പടുന്നത്. ഷെനാന്‍ഡോവ നാഷണല്‍ പാര്‍ക്കില്‍ റേഞ്ചറായി ജോലി ചെയ്തിരുന്ന റോയ്ക്ക് ആദ്യമായി മിന്നലേറ്റത് 1942ലാണ്.

പിന്നീട് 1969, 1970, 1972, 1973, 1976, 1977 എന്നീ വര്‍ഷങ്ങളിലും മിന്നലേറ്റു. എന്നാല്‍, നിസാര പരുക്കുകളോടെ റോയ് രക്ഷപ്പെട്ടു. എന്താണ് അദ്ദേഹത്തിന്റെ പ്രത്യേകത എന്നത് ഇന്നും അജ്ഞാതമായി തുടരുകയാണ്. ഇടയ്ക്കിടെ ഇങ്ങനെ മിന്നല്‍ ഏല്‍ക്കുന്നതിനാല്‍ അദ്ദേഹത്തെ ജീവിതത്തില്‍ നിന്ന് ഒറ്റപ്പെടുത്താനാണ് എല്ലാവരും ശ്രമിച്ചത്. റോയ് ഒപ്പമുണ്ടെങ്കില്‍ കൂടെയുള്ള ആള്‍ക്കും മിന്നലേല്‍ക്കും എന്ന വിശ്വാസമായിരുന്നു ജോലി സ്ഥലത്തും നാട്ടിലുമെല്ലാം.

കടുത്ത ഒറ്റപ്പെടലും ദു:ഖവും സഹിക്കാനാകാതെ 1983ല്‍ അദ്ദേഹം സ്വയം വെടിയുതിര്‍ത്ത് ആത്മഹത്യ ചെയ്യുകയായിരുന്നുവെന്നും കൈയിലിരുന്ന തോക്കില്‍ നിന്ന് അബദ്ധത്തില്‍ തലയ്ക്ക് വെടിയേറ്റ് മരിക്കുകയായിരുന്നുവെന്നും റിപ്പോര്‍ട്ടുണ്ട്.

മിക്കപ്പോഴും റോയ്യുടെ തലയ്ക്കാണ് തീപിടിച്ചിരുന്നത്. തലയ്ക്ക് തീപിടിച്ചാല്‍ കെടുത്താനായി മിക്കപ്പോഴും ഒരു കന്നാസില്‍ അദ്ദേഹം വെള്ളവും കൊണ്ടുനടക്കുമായിരുന്നു. ന്യൂയോര്‍ക്കിലെ ഗിന്നസ് റെക്കോഡ്‌സ് പ്രദര്‍ശന വേദിയില്‍ ഇന്നും റോയിയയുടെ തൊപ്പികള്‍ പ്രദര്‍ശിപ്പിച്ചിട്ടുണ്ട്.