കിം ജോങ് ഉന്നിനെതിരെ ചുമരെഴുത്ത് പ്രത്യക്ഷപ്പെട്ടതിന് പിന്നില്‍ പ്രവര്‍ത്തിച്ചവരെ കണ്ടെത്താന്‍ സുരക്ഷാമന്ത്രാലയം നഗരവാസികളുടെ മുഴുവന്‍ കൈയ്യക്ഷരം പരിശോധിക്കുന്നു.

ഡിസംബര്‍ 22 നാണ് കിമ്മിനെതിരെ ചുമരില്‍ അസഭ്യപദങ്ങള്‍ പ്രത്യക്ഷപ്പെട്ടത്. സെന്‍ട്രല്‍ കമ്മിറ്റിയുടെ പ്ലീനറി യോഗത്തിന് ആതിഥ്യമരുളുന്ന പ്യോങ്യാങ്ങിലെ പ്യോങ്ചന്‍ ജില്ലയില്‍ ഒരു അപാര്‍ട്ട്‌മെന്റിന്റെ ചുമരിലാണ് ഡിസംബര്‍ 22ന് കിമ്മിനെതിരെ അസഭ്യപദങ്ങള്‍ പ്രത്യക്ഷപ്പെട്ടതെന്ന് ദക്ഷിണകൊറിയന്‍ മാധ്യമങ്ങള്‍ റിപ്പോര്‍ട്ട് ചെയ്തു. ഇതിന് ശേഷം അധികൃതര്‍ ഇത് മായിച്ചു കളഞ്ഞു.

ചുമരില്‍ എഴുതിയവരെ കണ്ടെത്താന്‍ പ്രദേശത്തെ ഫാക്ടറി ജീവനക്കാരുടെയും വ്യാപാര സ്ഥാപനങ്ങളില്‍ ജോലി ചെയ്യുന്നവരുടെയും വിദ്യാര്‍ഥികളുടെയും ഉള്‍പ്പെടെ ആയിരക്കണക്കിന് പേരുടെ കയ്യക്ഷരം പരിശോധിക്കാനാണ് തീരുമാനം.

കിമ്മിനെതിരെ ചുമരെഴുത്ത് നടത്തുന്നത് ഉത്തരകൊറിയയില്‍ വലിയ കുറ്റമാണ്. 2020 ലും ഇങ്ങനെ ചെയ്തവരെ കണ്ടെത്താന്‍ കയ്യക്ഷര പരിശോധന നടത്തിയിരുന്നു. ഇതിന് മുന്‍പ് 2018 ല്‍ ഈ കുറ്റത്തിന് ഒരു കേണലിനെ വധിച്ചിട്ടുമുണ്ട്.

അതേസമയം അമേരിക്കയും ആണവായുധവുമല്ല തന്റെ പുതിയ പരിഗണന പട്ടികയിലെന്ന് കിം അടുത്തിടെ പ്രസ്താവിച്ചിരുന്നു. ജനങ്ങള്‍ക്ക് ജീവിതവും ഭക്ഷണവും നല്‍കുന്നതിലാണ് ശ്രദ്ധയൂന്നുകയെന്നും അദ്ദേഹം പറഞ്ഞിരുന്നു.

അധികാരമേറ്റതിന്റെ പത്താം വാര്‍ഷികത്തില്‍ ജനങ്ങളെ അഭിസംബോധന ചെയ്ത് സംസാരിക്കവേയാണ് ഇക്കാര്യം പറഞ്ഞത്. കാര്‍ഷിക രംഗത്തെ സ്വയം പര്യാപ്തത, കൂടുതല്‍ ട്രാക്ടറുകള്‍ ഉത്പാദിപ്പിക്കുക എന്നിവയ്ക്കായിരിക്കും മുന്‍ഗണനയെന്നും അദ്ദേഹം പറഞ്ഞിരുന്നു.