ഒരു തുള്ളി രക്തത്തില്‍ നിന്ന് അര്‍ബുദമടക്കമുള്ള രോഗങ്ങള്‍ കണ്ടെത്താനാകുമെന്ന് ലോകത്തെ തെറ്റിദ്ധരിപ്പിച്ച തെറാനോസ് എന്ന കമ്പനിയിലൂടെ ലോകത്തെ മുഴുവന്‍ കബളിപ്പിച്ച ശതകോടീശ്വരിയും മുപ്പത്തിയേഴുകാരിയുമായ എലിസബത്ത് ഹോംസ് ഇനി ജയിലിലേക്ക്.

നിക്ഷേപകരെയടക്കം ചതിച്ച ഹോംസ് കുറ്റക്കാരിയാണെന്ന് കാലിഫോര്‍ണിയയിലെ കോടതി വിധിച്ചു. ഇവര്‍ക്കെതിരെ ചുമത്തപ്പെട്ട നാല് കുറ്റങ്ങളില്‍ ഓരോന്നിനും 20 വര്‍ഷം വരെ തടവ് ലഭിക്കുമെന്നാണ് റിപ്പോര്‍ട്ട്. യുഎസിലെ ഏറ്റവും പ്രായം കുറഞ്ഞ ശതകോടീശ്വരി എന്ന് ഫോബ്‌സ് മാസിക ഇവരെ വിശേഷിപ്പിച്ചിരുന്നു. 900 മില്യണ്‍ ഡോളറാണ് 800 ജീവനക്കാരുണ്ടായിരുന്ന കമ്പനി നിക്ഷേപകരില്‍ നിന്ന് സ്വന്തമാക്കിയത്.

പഠനം പാതിവഴിയില്‍ ഉപേക്ഷിച്ച് 2003 ല്‍ തന്റെ 19-ാം വയസിലാണ് എലിസബത്ത് തെറാനോസ് തട്ടിപ്പ് ആരംഭിച്ചത്. ഭാവിയുടെ ലബോറട്ടറി എന്നാണ് ഇപ്പോഴത്തെ അമേരിക്കന്‍ പ്രസിഡന്റ് ജോ ബൈഡന്‍ വൈസ് പ്രസിഡന്റായിരുന്ന സമയത്ത് തെറാനോസ് സന്ദര്‍ശിച്ച ശേഷം വിശേഷിപ്പിച്ചത്. 2015 ല്‍ ലോകത്തെ ഏറ്റവുമധികം സ്വാധീനിക്കുന്ന 100 പേരുടെ പട്ടികയില്‍ ഹോംസിനെ ടൈം മാസിക ഉള്‍പ്പെടുത്തുകയും ചെയ്തിരുന്നു. ഒരു മണിക്കൂറിനുള്ളില്‍ ഒരു തുള്ളി ചോരയില്‍ നിന്ന് കൊളസ്‌ട്രോള്‍ മുതല്‍ അര്‍ബുദം വരെ കണ്ടുപിടിക്കാന്‍ കഴിയുന്ന 240 പരിശോധനകളാണ് തെറാനോസ് മുന്നോട്ട് വച്ചത്. ഈ അവകാശവാദം തെറ്റായിരുന്നുവെന്ന് ആദ്യസമയത്ത് ആരുമറിഞ്ഞില്ല. ഇവിടുത്തെ പരിശോധനാ ഫലങ്ങള്‍ മിക്കതും തെറ്റായിരുന്നു.

വോള്‍ സ്ട്രീറ്റ് ജേണല്‍ നടത്തിയ അന്വേഷണത്തിലാണ് കമ്പനിയുടെ വന്‍ തട്ടിപ്പ് പുറംലോകം അറിഞ്ഞത്. 10 ബില്യന്‍ ഡോളര്‍ മൂല്യമുണ്ടായിരുന്ന കമ്പനിയുടെ മൂല്യം ഒറ്റ രാത്രി കൊണ്ട് പൂജ്യമായി. അധികം വൈകാതെ തന്നെ കമ്പനി പൂട്ടുകയും നിയമനടപടികള്‍ തുടങ്ങുകയും ചെയ്തു.

ആപ്പിള്‍ സ്ഥാപകനായ സ്റ്റീവ് ജോബ്‌സിന്റെ വലിയ ആരാധികയായിരുന്ന ഹോംസ് സ്റ്റീവിനെ പോലെ ആകാനുള്ള ശ്രമത്തിലായിരുന്നു. അതിനായി സ്റ്റീവ് ജോബ്‌സിന്റേതു പോലെയുള്ള കറുത്ത ടര്‍ട്ടില്‍നെക്ക് കോളര്‍, ഫ്രൂട്ട് ഡയറ്റ്, ആപ്പിള്‍ കമ്പനിയില്‍ ഉപയോഗിക്കുന്ന കറുത്ത ലെതര്‍ ഫര്‍ണിച്ചര്‍ എന്നിവ അതേപടി അനുകരിച്ചിരുന്നു.

അതേസമയം പൊതുവേദികളില്‍ ഹോംസ് ഉപയോഗിച്ചിരുന്ന ശബ്ദം കൃത്രിമമായിരുന്നുവെന്ന് സഹപ്രവര്‍ത്തകര്‍ പറഞ്ഞു. ചില പോഡ്കാസ്റ്റുകളില്‍ യഥാര്‍ഥ ശബ്ദം അറിയാതെ ഇടയ്ക്കു വന്നതോടെയാണ് ഇതും ലോകം മനസിലാക്കിയത്. മാത്രമല്ല കമ്പനി മീറ്റിങ്ങുകളില്‍ എതിരാളികളായ കമ്പനികള്‍ക്കെതിരെ വലിയ തോതില്‍ ചീത്ത വിളിക്കുന്ന വിചിത്രമായ രീതിയും തെറാനോസ് പിന്തുടര്‍ന്നിരുന്നു.