സ്വകാര്യതയില് കടന്നു കയറ്റം: ഗൂഗിളിന് റെക്കോര്ഡ് പിഴ ചുമത്തി ഫ്രാന്സ്; ഫെയ്സ്ബുക്കിനും വന് പിഴ ! ഉടന് പ്രശ്നം പരിഹരിച്ചില്ലെങ്കില് കാലതാമസം വരുത്തുന്ന ഓരോ ദിവസവും 84 ലക്ഷം രൂപ അധികപിഴയടക്കേണ്ടി വരും
ഗൂഗിളിനും ഫെയ്സ്ബുക്കിനും പിഴയിട്ട് ഫ്രാന്സ്. യൂറോപ്യന് യൂണിയന്റെ സ്വകാര്യതാ ചട്ടങ്ങള് ലംഘിച്ചതിനാണ് ഗൂഗിളിന് 1264 കേടിയും ഫെയ്സ്ബുക്കിന് 505 കോടി രൂപയും പിഴ ചുമത്തിയതായി ഫ്രാന്സിലെ വിവരസുരക്ഷ നിരീക്ഷകരായ സിഎന്ഐഎല് അറിയിച്ചു.
ഗൂഗിളിന് സിഎന്ഐഎല് ചുമത്തുന്ന റെക്കോഡ് പിഴയാണിത്. ഓണ്ലൈന് ട്രാക്കറുകളായ കുക്കികള് നിരസിക്കുന്നതിന് ഇന്റര്നെറ്റ് ഉപയോക്താക്കള്ക്ക് ബുദ്ധിമുട്ടുണ്ടാക്കിയതിനാണ് പിഴ.
ഗൂഗിളും ഫെയ്സ്ബുക്കും യൂട്യൂബും ഉപയോക്താക്കള്ക്ക് കുക്കികള് എളുപ്പത്തില് സ്വീകരിക്കാനുള്ള സൗകര്യമൊരുക്കിയിട്ടുണ്ട്. എന്നാല് അവ എളുപ്പത്തില് നിരസിക്കാന് അവസരം നല്കുന്നില്ലെന്ന് സിഎന്ഐഎല് അറിയിച്ചു. ഈ രീതിയില് മാറ്റം വരുത്താന് കമ്പനികള്ക്ക് മൂന്ന് മാസം സമയം അനുവദിച്ചിട്ടുണ്ട്. ഉടന് പ്രശ്നം പരിഹരിച്ചില്ലെങ്കില് കാലതാമസം വരുത്തുന്ന ഓരോ ദിവസവും 84.25 ലക്ഷം രൂപ അധികപിഴ അടയ്ക്കേണ്ടി വരുമെന്നും സിഎന്ഐഎല് പറഞ്ഞു. പ്രശ്നം ഉടന് പരിഹരിക്കുമെന്നും ഗൂഗിള് അറിയിച്ചിട്ടുണ്ട്.
ഞങ്ങള് ഈ തീരുമാനം അവലോകനം ചെയ്യുകയാണ്. ബന്ധപ്പെട്ട അധികാരികളുമായി സഹകരിച്ച് പ്രവര്ത്തിക്കാന് ഞങ്ങള് പ്രതിജ്ഞാബദ്ധരാണ്- ഫെയ്സ്ബുക്കിന്റെ മാതൃകമ്പനിയായ മെറ്റയുടെ വക്താവിനെ ഉദ്ധരിച്ചുകൊണ്ട് മാധ്യമങ്ങള് റിപ്പോര്ട്ട് ചെയ്തു.
ഉപയോക്താകള്ക്ക് അവരുടെ സ്വകാര്യ വിവരങ്ങളില് കൂടുതല് നിയന്ത്രണം നല്കുന്നതാണ് ഞങ്ങളുടെ കുക്കി കണ്സന്റ് നയം. ഫെയ്സ്ബുക്ക്, ഇന്സ്റ്റാഗ്രാം എന്നിവയുടെ സെറ്റിങ്സില് ഉള്ച്ചേര്ത്തിട്ടുള്ള പുതിയ മെനു ഉപയോഗിച്ച് ഉപയോക്താക്കള്ക്ക് എപ്പോള് വേണമെങ്കിലും കുക്കിയുമായി ബന്ധപ്പെട്ട തങ്ങളുടെ തീരുമാനങ്ങള് എളുപ്പത്തില് കൈകാര്യം ചെയ്യാന് കഴിയും-വക്താവ് കൂട്ടിച്ചേര്ത്തു.
ഫ്രഞ്ച് സ്വകാര്യതാ റെഗുലേറ്റര് വമ്പന് ടെക്ക് കമ്പനികള്ക്ക് പിഴ ചുമത്തുന്നത് ഇതാദ്യമായല്ല. 2020 ഡിസംബറില് ഇ-സ്വകാര്യതാ നിയമങ്ങള് ലംഘിച്ചതിന് സിഎന്ഐഎല് ആമസോണിനും ഗൂഗിളിനും യഥാക്രമം 35 ദശലക്ഷം യൂറോയും 100 ദശലക്ഷം യൂറോയും പിഴ ചുമത്തിയിരുന്നു.
ജനറല് ഡാറ്റ പ്രൊട്ടക്ഷന് റെഗുലേഷന് (ജിഡിപിആര്) പ്രകാരം ഗൂഗിളിന് 50 മില്യണ് യൂറോയും പിഴ ചുമത്തിയിട്ടുണ്ട്. കഴിഞ്ഞ സെപ്റ്റംബറില് വാട്സ് ആപ്പിന് 225 മില്യണ് യൂറോയാണ് പിഴ ചുമത്തിയത്.
https://www.facebook.com/Malayalivartha