അമേരിക്കന്‍ പ്രസിഡന്റ് ജോ ബൈഡനും മുന്‍ അമേരിക്കന്‍ പ്രസിഡന്റ് ഡോണാള്‍ഡ് ട്രംപും തമ്മിലുള്ള പോര് മുറുകുന്നു. അമേരിക്കയില്‍ തന്റെ പേര് ഉപയോഗിച്ച് വിഭജനമുണ്ടാക്കാനാണ് ബൈഡന്‍ ശ്രമിക്കുന്നതെന്ന് ട്രംപ് ആരോപിച്ചു.

കഴിഞ്ഞ ദിവസം ട്രംപിനെതിരെ ബൈഡന്‍ രൂക്ഷ വിമര്‍ശനമുയര്‍ത്തിയിരുന്നു. കഴിഞ്ഞ വര്‍ഷം കാപ്പിറ്റോളില്‍ നടന്ന കലാപത്തിന് നേതൃത്വം നല്‍കിയത് ട്രംപ് തന്നെയാണെന്നായിരുന്നു ബൈഡന്റെ പ്രതികരണം. ഇതിനെതിരെയാണ് ട്രംപ് മറുപടിയുമായി എത്തിയിരിക്കുന്നത്.

ബൈഡന്‍ പൂര്‍ണമായും പരാജയപ്പെട്ടു എന്ന വസ്തുത മറച്ചുവെക്കാനാണ് ഈ രാഷ്ട്രീയ നാടകമെന്ന് ട്രംപ് പറഞ്ഞു. യുഎസ് പ്രസിഡന്റ് തെരഞ്ഞെടുപ്പില്‍ അട്ടിമറി നടന്നുവെന്ന വാദം വീണ്ടും ട്രംപ് ആവര്‍ത്തിച്ചു.

മുന്‍പ് കാപ്പിറ്റോള്‍ കലാപത്തിന്റെ വാര്‍ഷികത്തോടനുബന്ധിച്ച് നടത്താനിരുന്ന വാര്‍ത്താസമ്മേളനം ട്രംപ് കഴിഞ്ഞ ആഴ്ച റദ്ദാക്കിയിരുന്നു. അധികാരം നിലനിര്‍ത്താനായി പ്രസിഡന്റ് തെരഞ്ഞെടുപ്പില്‍ അട്ടിമറി നടന്നെന്ന നുണകളുടെ വല നെയ്തയാളാണ് ട്രംപെന്ന് ബൈഡന്‍ പറഞ്ഞു.

യുഎസിന്റെ ചരിത്രത്തില്‍ തന്നെ ആദ്യമായി സമാധാനപരമായി അധികാരം കൈമാറാനുള്ള ശ്രമം അട്ടിമറിക്കാന്‍ ട്രംപ് ശ്രമം നടത്തിയെന്നും ബൈഡന്‍ ആരോപിച്ചിരുന്നു.

പ്രസിഡന്റായ ശേഷം ഇതാദ്യമായാണ് ബൈഡന്‍ മുന്‍ പ്രസിഡന്റിനെതിരെ കടുത്ത ഭാഷയില്‍ പ്രതികരിക്കുന്നത്. വ്യക്തി താല്‍പര്യമാണ് രാജ്യത്തിന്റെ താല്‍പര്യങ്ങളേക്കാളും ട്രംപ് പരിഗണിച്ചിരുന്നതെന്നും ബൈഡന്‍ പറഞ്ഞു.



കഴിഞ്ഞ വര്‍ഷം ജനുവരി ആറിനാണ് കാപ്പിറ്റോളില്‍ ആക്രമണം നടന്നത്. ട്രംപ് പ്രസിഡന്റ് തെരഞ്ഞെടുപ്പില്‍ പരാജയപ്പെട്ടതോടെയാണ് കാപ്പിറ്റോള്‍ ആക്രമിക്കപ്പെട്ടത്. സംഭവത്തില്‍ നിരവധി പേര്‍ക്ക് പരിക്കേല്‍ക്കുകയും അഞ്ച് പേര്‍ കൊല്ലപ്പെടുകയും ചെയ്തിരുന്നു.