ഏഷ്യന് രാജ്ഞിയുടെ ഭാരം 310 കിലോഗ്രാം! ലോകത്തിലെ ഏറ്റവും വലിയ ഇന്ദ്രനീലക്കല്ലിന് 743 കോടി രൂപ വാഗ്ദാനം; പ്രദര്ശനത്തിന് വച്ചത് ബുദ്ധ സന്യാസിമാരുടെ പ്രാര്ഥനയ്ക്ക് ശേഷം
ശ്രീലങ്കയില് കണ്ടെത്തിയ ഇന്ദ്രനീലക്കല്ലിന് 743 കോടി രൂപ (പത്ത് കോടി യുഎസ് ഡോളര്) വാഗ്ദാനം. ക്യൂന് ഓഫ് ഏഷ്യ എന്നാണ് രത്നത്തിന് പേര് നല്കിയിരിക്കുന്നത്. ദുബായ് ആസ്ഥാനമായി പ്രവര്ത്തിക്കുന്ന കമ്പനിയാണ് രത്നം സ്വന്തമാക്കാന് മുന്നോട്ട് വന്നിരിക്കുന്നത്. എന്നാല് വിഷയത്തില് അന്തിമതീരുമാനം എടുത്തിട്ടില്ലെന്ന് രത്നങ്ങളുടെയും ആഭരണങ്ങളുടെയും ചുമതലയുള്ള മന്ത്രി ലോഹന് രത്വാത് പറഞ്ഞു.
കണ്ടെത്തി മൂന്നുമാസത്തിന് ശേഷം കഴിഞ്ഞ ഡിസംബറിലാണ് രത്നത്തെക്കുറിച്ചുള്ള വിവരങ്ങള് പുറത്തുവിട്ടത്. 310 കിലോഗ്രാമാണ് ഭാരം. രത്നങ്ങളുടെ നഗരം എന്നറിയപ്പെടുന്ന രത്നപുരയിലെ സ്വകാര്യ ഭൂമിയില് നിന്നാണ് ഇന്ദ്രനീലക്കല്ല് കണ്ടെത്തിയത്.
നിലവില് ശ്രീലങ്കന് ദേശീയ രത്ന ആഭരണ അതോറിറ്റിയുടെ ലാബിലാണ് സൂക്ഷിച്ചിട്ടുള്ളത്. രത്നത്തിന് 1486 കോടി രൂപ മൂല്യമുണ്ടെന്ന് ഫ്രഞ്ച് രത്ന ഗവേഷകര് പറഞ്ഞിരുന്നു. ചൈന, യുഎസ് രാജ്യങ്ങളില് നിന്ന് വന്കിട കച്ചവടക്കാര് രത്നം സ്വന്തമാക്കാന് താത്പര്യം പ്രകടിപ്പിച്ചിട്ടുണ്ടെന്ന് അധികൃതരും വ്യക്തമാക്കിയിട്ടുണ്ട്.
അതേസമയം കമ്പനിയും ഉടമസ്ഥനുമായി വിലപേശല് തുടരുകയാണെന്ന് ഷിന്ഹുവ വാര്ത്താ ഏജന്സി പറഞ്ഞു. ഇതിന് മുന്പ് ഇതുപോലൊരു ഇന്ദ്രനീലക്കല്ല് ഞാന് കണ്ടിട്ടില്ല. ഏകദേശം 400 വര്ഷം പഴക്കമെങ്കിലും ഈ കല്ലിന് ഉണ്ടാകുമെന്ന് രത്നവിദഗ്ധന് പറഞ്ഞു.
ബുദ്ധസന്യാസിമാര് ഉള്പ്പെടെയുള്ളവര് പ്രത്യേക പ്രാര്ത്ഥന ചൊല്ലിയതിന് ശേഷമാണ് ഭീമന് ഇന്ദ്രനീലക്കല്ല് പ്രദര്ശനത്തിനായി വച്ചത്. കല്ലിന്റെ മൂല്യവും മറ്റും അറിയുന്നതിനായാണ് ഇത്രനാള് കാത്തിരുന്നതെന്നാണ് വിവരം.
രത്നപുരയില് നിന്നും ധാരാളം രത്നങ്ങള് ഇതിന് മുന്പും ഖനനത്തില് കണ്ടെടുത്തിട്ടുണ്ട്. പ്രദേശവാസികള് വളരെ യാദൃച്ഛികമായാണ് ഈ കല്ല് കണ്ടെത്തിയതെന്നു വാര്ത്താ ഏജന്സികള് റിപ്പോര്ട്ട് ചെയ്യുന്നു. ഇന്ദ്രനീലം ഉള്പ്പടെ മറ്റ് പല അമൂല്യ രത്നങ്ങളും പ്രദേശത്ത് നിന്ന് വലിയ തോതില് കയറ്റുമതി ചെയ്യാറുണ്ട്. കഴിഞ്ഞ വര്ഷം രത്നങ്ങള്, വജ്രം തുടങ്ങിയവയുടെ കയറ്റുമതിയിലൂടെ ശ്രീലങ്കയ്ക്ക് 50 കോടി രൂപയുടെ വരുമാനം ലഭിച്ചെന്നാണ് കണക്ക്.
"
https://www.facebook.com/Malayalivartha