ലാഹോറില് ബോംബ് സ്ഫോടനം; മൂന്നുപേര് കൊല്ലപ്പെട്ടു; 20 പേര്ക്ക് പരിക്ക്
പാകിസ്താന് തലസ്ഥാന നഗരമായ ലാഹോറിലെ തിരക്കേറിയ ഷോപ്പിംഗ് മാര്ക്കറ്റിലുണ്ടായ ബോംബ് സ്ഫോടനത്തില് മൂന്ന് പേര് കൊല്ലപ്പെട്ടു.20 പേര്ക്ക് പരിക്കേറ്റതായും പൊലീസ് അറിയിച്ചു. വ്യാഴാഴ്ചയാണ് സംഭവം. മോട്ടോര് ബൈക്കില് ഘടിപ്പിച്ച ഉപകരണത്തില് നിന്നാണ് സ്ഫോടനമുണ്ടായതെന്ന് പ്രാഥമിക അന്വേഷണത്തില് കണ്ടെത്തിയതായി ലാഹോര് പൊലീസ് മേധാവി റാണ ആരിഫ് വാര്ത്ത ഏജന്സിയായ എ.എഫ്.പിയോട് പറഞ്ഞു. സ്ഫോടനത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല.
ഇന്ത്യന് നിര്മിത സാധനങ്ങള് വില്ക്കുന്നതില് പ്രശസ്തമായ അനാര്ക്കലി മാര്ക്കറ്റിലെ പാന് മണ്ടിയിലാണ് സ്ഫോടനമുണ്ടായത്. സമീപത്തെ കടകളുടെയും കെട്ടിടങ്ങളുടെയും ജനല്ച്ചില്ലുകള് സ്ഫോടനത്തില് തകര്ന്നു. സ്ഫോടനത്തെ തുടര്ന്ന് മാര്ക്കറ്റ് അടച്ചു.
പാകിസ്താന് സര്ക്കാരും താലിബാനും തമ്മിലുണ്ടായിരുന്ന ഉടമ്ബടി അവസാനിച്ചത് മുതല് പൊലീസിനെതിരെ നിരവധി സ്ഫോടനങ്ങളും ആക്രമണങ്ങളും ഉണ്ടായിട്ടുണ്ട്. അഫ്ഗാനിസ്താനിലെ താലിബാനുമായി ബന്ധമുള്ള തെഹ്രീകെ താലിബാന് പാകിസ്താന് (ടി.ടി.പി) ഈ സംഭവങ്ങളുടെയെല്ലാം ഉത്തരവാദിത്തം ഏറ്റെടുത്തിട്ടുണ്ട്.
ഒരു ആണ്കുട്ടിയടക്കം രണ്ടുപേര് സ്ഫോടനത്തില് കൊല്ലപ്പെട്ടിട്ടുണ്ടെന്നും പരിക്കേറ്റ് ആശുപത്രിയില് പ്രവേശിപ്പിച്ച നാലുപേരുടെ നില ഗുരുതരമാണെന്നും മയോ ആശുപത്രി മെഡിക്കല് സൂപ്രണ്ട് ഡോ. ഇഫ്തിഖര് പറഞ്ഞു.
https://www.facebook.com/Malayalivartha
