യുക്രെയ്ന്‍ പ്രസിഡന്റ് വൊളൊഡിമിര്‍ സെലന്‍സ്‌കിയാണ് ലോകം മുഴുവന്‍ ചര്‍ച്ച ചെയ്യുന്നത്. ആപത് ഘട്ടത്തില്‍ സ്വയരക്ഷ തേടി സെലന്‍സ്‌കി പോയില്ല. മരണം കൈവരിക്കാനും തയ്യാറെന്ന് പറഞ്ഞ് സെലന്‍സ്‌കി ജനങ്ങളോടൊപ്പം തന്നെ നില്‍ക്കുകയാണ്. ലോകമെങ്ങും ചെറുത്തു നില്‍പിന്റെ ആള്‍രൂപമായി സെലന്‍സ്‌കിയെ മനസില്‍ കാണുകയാണ്.

യുഎസ്എസ്ആര്‍ സൈന്യത്തില്‍ പോരാടിയ മുത്തച്ഛന്റെ ധീരതയും ചുറുചുറുക്കുമാണ് ഇതുവരെ യുക്രെയ്ന്‍ പ്രസിഡന്റ് വൊളൊഡിമിര്‍ സെലന്‍സ്‌കിയുടെ മുഖമുദ്ര. ജൂതകുടുംബത്തില്‍ ജനിച്ചു വളര്‍ന്ന്, ടിവി പരമ്പരയില്‍ പ്രസിഡന്റായി അഭിനയിച്ച് പിന്നീട് ആ തിളക്കത്തില്‍ തിരഞ്ഞെടുപ്പു ജയിച്ച് യഥാര്‍ഥ പ്രസിഡന്റായി ജീവിക്കാന്‍ ഭാഗ്യം ലഭിച്ചയാളാണ് അദ്ദേഹം.

നാത്‌സി ഭരണകൂടമാണ് യുക്രെയ്‌നിലേതെന്ന റഷ്യന്‍ പ്രസിഡന്റ് വ്‌ളാഡിമിര്‍ പുട്ടിന്റെ ആരോപണത്തിനിടെ സെലെന്‍സ്‌കിയുടെ ജൂത വേരുകളും അങ്ങനെ ചര്‍ച്ചയായി. ആപത്ഘട്ടത്തില്‍ ജനങ്ങളെ കയ്യൊഴിഞ്ഞ് രഹസ്യവിമാനം കയറി രാജ്യം വിടുന്ന നേതാവല്ലെന്ന് ആവര്‍ത്തിച്ചു പറയാനായി സെലന്‍സ്‌കി താന്‍ ഇപ്പോഴെവിടെയെന്ന് ഇടയ്ക്കിടെ വിഡിയോ വഴി അറിയിച്ചുകൊണ്ടിരിക്കുന്നു.

സെലന്‍സ്‌കിയെ സുരക്ഷിതനായി യുക്രെയ്‌നില്‍നിന്നു പുറത്തെത്തിക്കാന്‍ സഹായിക്കാമെന്ന യുഎസ് വാഗ്ദാനം തളളിയത് അദ്ദേഹത്തെക്കുറിച്ചുള്ള മതിപ്പു വര്‍ധിപ്പിച്ചു. സംഘര്‍ഷത്തിനിടെ ഓടിയൊളിക്കാന്‍ താനില്ലെന്നും അതിനു യുഎസിന്റെ സഹായം വേണ്ടെന്നും തുറന്നടിച്ചത് വലിയ പ്രശംസ നേടി.

യുക്രെയ്ന്‍ സൈന്യം കീഴടങ്ങാന്‍ പോകുന്നെന്ന അഭ്യൂഹങ്ങള്‍ക്കിടെയാണ് കീവിലെ തെരുവില്‍നിന്ന് സെലെന്‍സ്‌കിയുടെ വിഡിയോ പ്രത്യക്ഷപ്പെട്ടത്. ഞാന്‍ നഗരം വിട്ടിട്ടില്ല, കീഴടങ്ങിയിട്ടില്ല, പോരാട്ടം തുടരുകയാണ് എന്നു പറഞ്ഞ് അദ്ദേഹം ജനങ്ങള്‍ക്ക് വീര്യം പകര്‍ന്നു.

സെലെന്‍സ്‌കിയെയും കുടുംബത്തെയും വകവരുത്താന്‍ റഷ്യ ശ്രമിച്ചേക്കുമെന്ന മുന്നറിയിപ്പുമായാണ് യുഎസ് അദ്ദേഹത്തിനു സഹായം വാഗ്ദാനം ചെയ്തത്. സെലെന്‍സ്‌കി പണ്ട് കോമഡി താരമായിരുന്നു. പക്ഷേ, ഇപ്പോള്‍ അദ്ദേഹം കരുത്തനായ പ്രസിഡന്റാണെന്ന വികാരമാണു പൊതുവെയുള്ളതെങ്കിലും സാഹചര്യം മാറി മറിയാം.

യുക്രെയ്ന്‍ യുദ്ധം 3 ദിവസം പിന്നിടുമ്പോള്‍ സമീപ രാജ്യങ്ങളിലേക്ക് വന്‍ അഭയാര്‍ഥി പ്രവാഹമാണ് ഉണ്ടാകുന്നത്. ഇതിനകം 1.25 ലക്ഷം പേര്‍ പലായനം ചെയ്‌തെന്നാണു കണക്ക്. കൂടുതലും പോളണ്ടിലേക്കാണ്. രാജ്യാതിര്‍ത്തികളില്‍ 30 കിലോമീറ്ററിലേറെ നീളത്തില്‍ വാഹനനിര രൂപപ്പെട്ടു. മോള്‍ഡോവ, ഹംഗറി, റുമാനിയ, സ്‌ലൊവാക്യ തുടങ്ങിയ രാജ്യങ്ങളിലേക്കും ജനപ്രവാഹമുണ്ട്.

കീവിലും മറ്റു നഗരങ്ങളിലും ജനവാസ മേഖലകളില്‍ ഉള്‍പ്പെടെ റഷ്യയുടെ വന്‍ മിസൈലാക്രമണം തുടരുകയാണ്. യുക്രെയ്‌നിലെ തെക്കു കിഴക്കന്‍ നഗരമായ മെലിറ്റോപോള്‍ പിടിച്ചെടുത്തതായി റഷ്യ അവകാശപ്പെട്ടു. റഷ്യ ഔദ്യോഗികമായി പിടിച്ചെടുക്കുന്ന ആദ്യ നഗരമാണിത്. ഇക്കാര്യം ബ്രിട്ടന്‍ നിഷേധിച്ചിട്ടുണ്ട്. ഒറ്റപ്പെട്ടതെങ്കിലും വീര്യം ചോരാത്ത ചെറുത്തുനില്‍പാണ് യുക്രെയ്ന്‍ സൈന്യവും ജനങ്ങളും നടത്തുന്നത്.

ഉപരോധം ലംഘിച്ച റഷ്യന്‍ കപ്പല്‍ അറ്റ്‌ലാന്റിക് സമുദ്രത്തില്‍ ഫ്രാന്‍സ് പിടിച്ചെടുത്തു. ആയിരത്തോളം റഷ്യന്‍ സൈനികരെ വധിച്ചെന്നാണ് യുക്രെയ്ന്‍ അവകാശവാദം. റഷ്യയുടെ ആക്രമണങ്ങളില്‍ 3 കുട്ടികള്‍ ഉള്‍പ്പെടെ 198 യുക്രെയ്ന്‍ പൗരന്മാര്‍ കൊല്ലപ്പെട്ടു.