ഓണ്ലൈനിലൂടെ ആയുധങ്ങള് മാസങ്ങളായുള്ള തയ്യാറെടുപ്പ് ഷിന്സോ ആബെയെ കൊലപ്പെടുത്തിയതിങ്ങനെ
മുന് ജപ്പാന് പ്രധാനമന്ത്രി ഷിന്സോ ആബെയെ കൊലപ്പെടുത്താന് അക്രമി ഉപയോഗിച്ചത് സ്വയം നിര്മിത തോക്കെന്ന് പൊലീസ്. പ്രതിയായ തെത്സുയാ യമഗാമിയുടെ വീട്ടില് നിന്ന് അഞ്ച്, ഒന്പത് ബാരലിലുള്ള ഷോട്ട്ഗണ് അടക്കം നിരവധി സ്വയം നിര്മിത തോക്കുകള്, സ്ഫോടക വസ്തുക്കള്, കമ്പ്യൂട്ടര് എന്നിവ പൊലീസ് പിടിച്ചെടുത്തു.
കറുത്ത ടേപ്പ് കൊണ്ടുപൊതിഞ്ഞ നാല്പ്പത് സെന്റിമീറ്റര് നീളമുള്ള സ്വയം നിര്മിത തോക്കുപയോഗിച്ചാണ് ഷിന്സോ ആബെയെ പ്രതി കൊലപ്പെടുത്തിയത്. തോക്ക് നിര്മിക്കാനാവശ്യമായ വസ്തുക്കള് ഓണ്ലൈനിലൂടെ വാങ്ങി മാസങ്ങള് നീണ്ട തയ്യാറെടുപ്പിനൊടുവില് യമഗാമി കൃത്യം നിര്വഹിക്കുകയായിരുന്നു. സ്റ്റീല് പൈപ്പുകള് ടേപ്പ് കൊണ്ട് പൊതിഞ്ഞ്, ഓണ്ലൈനില് വാങ്ങിയ ഉപകരണങ്ങള് കൂടി ചേര്ത്താണ് ഇയാള് തോക്കുണ്ടാക്കിയത്.
2002 മുതല് 2005 വരെ യമഗാമി ജപ്പാനില് നേവി ഉദ്യോഗസ്ഥനായി സേവനമനുഷ്ഠിച്ചിരുന്നു. സേവനകാലയളവില് സൈന്യത്തിലെ അംഗങ്ങള്ക്ക് വെടിമരുന്ന് ഉപയോഗത്തില് പരിശീലനം നല്കാറുണ്ടെന്ന് മുതിര്ന്ന നേവി ഉദ്യോഗസ്ഥന് പറയുന്നു. മാത്രമല്ല തോക്കുകളുടെ തകരാറുകള് പരിശോധിക്കാനും അറ്റകുറ്റപ്പണികള് ചെയ്യാനുള്ള പരിശീലനവും ഇവര്ക്ക് നല്കാറുണ്ടെന്നും അദ്ദേഹം വ്യക്തമാക്കി. എന്നാല് അവര് മുതിര്ന്ന ഉദ്യോഗസ്ഥരുടെ നിര്ദേശപ്രകാരം മാത്രം തോക്കുമായി ബന്ധപ്പെട്ട കാര്യങ്ങള് ചെയ്യുന്നതിനാല് തോക്ക് നിര്മിക്കാനുള്ള പ്രാവീണ്യം സേനാംഗങ്ങള് നേടുമെന്നത് വിശ്വസിക്കാനാകുന്നില്ലെന്നും അദ്ദേഹം പറഞ്ഞു. യമഗാമി മൂന്ന് വര്ഷത്തെ സൈനിക സേവനത്തിന് ശേഷം പടിഞ്ഞാറന് ജപ്പാനിലെ ഒരു ഫാക്ടറിയില് ജോലി ചെയ്തു വരികയായിരുന്നെന്നാണ് സൂചന. ഇയാള് നിലവില് തൊഴില്രഹിതനാണ്.
കഴിഞ്ഞ വെള്ളിയാഴ്ചയാണ് നാര നഗരത്തില് വച്ച് അക്രമിയുടെ വെടിയേറ്റ് ഷിന്സോ ആബെ കൊല്ലപ്പെട്ടത്. പാര്ലമെന്റ് തിരഞ്ഞെടുപ്പിന്റെ പ്രചാരണയോഗത്തില് പ്രസംഗിക്കുന്നതിനിടെ തെത്സുയാ യമഗാമി ആബെയെ പിന്നില് നിന്ന് വെടിവയ്ക്കുകയായിരുന്നു. തുടര്ന്ന് ആശുപത്രിയില് എത്തിച്ചെങ്കിലും ജീവന് രക്ഷിക്കാനായിരുന്നില്ല.
https://www.facebook.com/Malayalivartha
