കടുത്ത സാമ്പത്തിക പ്രതിസന്ധിയും നിലനില്‍ക്കുന്ന ശ്രീലങ്കയില്‍ പ്രതിഷേധങ്ങള്‍ കടുക്കുകയാണ്. ഈ സാഹചര്യത്തില്‍ രാജ്യത്തിന് ആവശ്യമായ സഹായങ്ങള്‍ ചെയ്യാനുള്ള ശ്രമത്തിലാണ് ഇന്ത്യയെന്ന് വിദേശകാര്യമന്ത്രി ഡോ.എസ് ജയശങ്കര്‍ വ്യക്തമാക്കി. ശ്രീലങ്കയ്ക്ക് പൂര്‍ണ്ണ പിന്തുണ നല്‍കുന്നതായും വ്യക്തമാക്കി. നിലവില്‍ ഇന്ത്യയില്‍ അഭയാര്‍ത്ഥിപ്രവാഹമില്ലെന്നും അറിയിച്ചു.

ശ്രീലങ്കന്‍ പ്രതിസന്ധിയില്‍ ഇന്ത്യയുടെ നിലപാടിനെ കുറിച്ച് ചോദിച്ചപ്പോള്‍ അവര്‍ അവരുടെ പ്രശ്‌നങ്ങളിലൂടെയാണ് കടന്ന് പോകുന്നതെന്നും ഇനി എന്താണ് സംഭവിക്കാന്‍ പോകുന്നത് എന്നതിനെ കുറിച്ച് ഇപ്പോള്‍ പറയാന്‍ കഴിയില്ലെന്നുമാണ് അദ്ദേഹം പ്രതികരിച്ചത്. ലങ്കന്‍ പ്രസിഡന്റ് ഗോതബായ രജപക്‌സെയുടെ വസതിയിലേയ്ക്ക് പ്രക്ഷോഭകര്‍ ഇരച്ചുകയറുകയും അദ്ദേഹം വസതിയില്‍ നിന്നും രക്ഷപ്പെടുകയും ചെയ്തിരുന്നു. അദ്ദേഹം ഇപ്പോള്‍ എവിടെയാണെന്ന് വ്യക്തമായി അറിയാത്ത സാഹചര്യമാണുള്ളത്. പ്രതിഷേധങ്ങള്‍ ശക്തമായതോടെ പ്രധാനമന്ത്രി വിക്രമസിംഗെ രാജി വെക്കുകയും പിന്നാലെ സ്വകാര്യ വസതി തീയിട്ട് നശിപ്പിക്കുകയും ചെയ്തിരുന്നു.

പ്രശ്‌നം കടുത്തതോടെ ജനങ്ങളോട് ശാന്തത പാലിക്കാന്‍ സംയുക്ത സേന മേധാവി ജനറല്‍ ശവേന്ദ്ര സില്‍വ അഭ്യര്‍ത്ഥിച്ചിരുന്നു. പ്രശ്‌നപരിഹാര നടപടികള്‍ സ്വീകരിക്കാമെന്നും സമാധാനം നിലനിര്‍ത്താനായി ജനങ്ങള്‍ സഹായിക്കണമെന്നും അദ്ദേഹം അഭ്യര്‍ത്ഥിച്ചിരുന്നു.

തിരുവനന്തപുരം വിമാനത്താവളത്തില്‍ മാദ്ധ്യമപ്രവര്‍ത്തകരുമായി സംസാരിക്കവേയാണ് ഇക്കാര്യങ്ങള്‍ പറഞ്ഞത്. മൂന്ന് ദിവസ കേരള സന്ദര്‍ശനത്തിനായാണ് ജയ്ശങ്കര്‍ തിരുവനന്തപുരത്ത് എത്തിയത്.ദക്ഷിണേന്ത്യന്‍ സംസ്ഥാനങ്ങളിലെ ബിജെപി പ്രവര്‍ത്തകരുമായി സംവദിക്കാനാണ് തിരുവനന്തപുരത്ത് എത്തിയിരിക്കുന്നത്.