പ്രധാനമന്ത്രി റെനില്‍ വിക്രംസിംഗെയുടെ സ്വകാര്യ വസതി തീയിട്ട് നശിപ്പിച്ച സംഭവുമായി ബന്ധപ്പെട്ട് മൂന്ന് പേര്‍ അറസ്റ്റില്‍. ശ്രീലങ്കയിലെ കൊല്ലുപിടിയ പോലീസാണ് അറസ്റ്റ് രേഖപ്പെടുത്തിയത്. മൗണ്ട് ലാവിനിടയ സ്വദേശിയായ 19 കാരനും, ഗല്ലെ സ്വദേശികളായ 24 ഉം 28 ഉം പ്രായക്കാരുമാണ് അറസ്റ്റിലായത്. കൂടുതല്‍ പേര്‍ക്ക് കേസുമായി ബന്ധമുണ്ടെന്നും വിശദമായ അന്വേഷണങ്ങള്‍ പുരോഗമിച്ചു കൊണ്ടിരിക്കുകയാണെന്നും പോലീസ് വൃത്തങ്ങള്‍ വ്യക്തമാക്കി.

രാജ്യത്തെ സാമ്പത്തിക പ്രതിസന്ധിയില്‍ പ്രതിഷേധിച്ചാണ് മുന്‍ പ്രധാനമന്ത്രിയുടെ സ്വകാര്യ വസതിയില്‍ തീയിട്ടത്. പ്രധാനമന്ത്രി രാജിവെച്ചതിന് പിന്നാലെയാണ് അക്രമികള്‍ വീട് അഗ്‌നിയ്ക്കിരയാക്കിയത്. പ്രസിഡന്റ് ഗോതബായ രാജപക്‌സെ രാജിവെയ്ക്കണമെന്ന ആവശ്യപ്പെട്ട് പ്രതിഷേധക്കാര്‍ അദ്ദേഹത്തിന്റെ വസതിയിലേക്ക് ഇരച്ചുകയറുകയായിരുന്നു. സ്ഥലത്ത് നിരവധി പേര്‍ക്കാണ് പരിക്കേറ്റത്. വീടിനുള്ളില്‍ പ്രവേശിച്ചവര്‍ക്ക് നേരെ പോലീസ് കണ്ണീര്‍വാതകം പ്രയോഗിച്ചു.

സേന മാദ്ധ്യമപ്രവര്‍ത്തകരെ അക്രമിച്ചതിനെ തുടര്‍ന്ന് പ്രതിഷേധം കൂടുതല്‍ വഷളാകുകയായിരുന്നു. തീയിട്ട സംഭവം അറിഞ്ഞിരുന്നതായി കോളംബോ മുന്‍സിപ്പല്‍ കൗണ്‍സില്‍ (സിഎംസി) വ്യക്തമാക്കി. എന്നാല്‍ പ്രതിഷേധക്കാര്‍ വീട് വളഞ്ഞിരുന്നതിനാല്‍ സ്ഥലത്ത് എത്തിച്ചേരാന്‍ കഴിഞ്ഞില്ലെന്നും അറിയിച്ചിരുന്നു.

ദ്വീപ് രാഷ്ട്രത്തിന്റെ സമീപകാല ചരിത്രത്തിലെ ഏറ്റവും മോശമായ സാമ്പത്തിക പ്രതിസന്ധിയില്‍ പ്രതിഷേധിച്ച് ആയിരക്കണക്കിന് ആളുകളാണ് തലസ്ഥാനത്ത് തെരുവിലിറങ്ങിയത്.കഴിഞ്ഞ കുറച്ച് മാസങ്ങളായി ശ്രീലങ്ക കടുത്ത സാമ്പത്തിക പ്രതിസന്ധിയിലൂടെയാണ് കടന്ന് പോകുന്നത്. ആവശ്യവസ്തുക്കള്‍ വരെ കടമെടുത്തായിരുന്നു രാജ്യം മുന്നോട്ട് പോയിരുന്നത്. ശ്രീലങ്കന്‍ കറന്‍സിയുടെ മൂല്യം ഇടിഞ്ഞതോടെ കാര്യങ്ങള്‍ കൂടുതല്‍ വഷളായിരുന്നു. രാജ്യത്തെ സാമ്പത്തിക പ്രതിസന്ധിയില്‍ നിന്ന് കരകയറ്റാന്‍ സര്‍ക്കാരിന്റെ ഭാഗത്ത് നിന്ന് കാര്യമായ ശ്രമങ്ങള്‍ നടത്താത്തതാണ് ജനങ്ങളെ പ്രകോപിതരാക്കിയത്. സര്‍ക്കാരിന്റെ മെല്ലെപ്പോക്കും ആസൂത്രണമില്ലായ്മയും ജനങ്ങള്‍ തെരുവിലിറങ്ങുന്നതിന് കാരണമായി.