നമ്മള്‍ കോവിഡില്‍ നിന്നും മുക്തമായിട്ട് അധികനാളായില്ല. ചൈനയില്‍ നിന്നും വന്ന വൈറസ് അതിവേഗമാണ് ലോകത്ത് പടര്‍ന്ന് പിടിച്ചത്. ഇപ്പോഴിതാ ചൈന തന്നെ വീണ്ടും പേടിയിലാ. കോവിഡ് വ്യാപനത്തിന്റെ പിടിയില്‍ അമര്‍ന്ന് ചൈന. കര്‍ശനമായ സീറോ കോവിഡ് നയത്തില്‍ അയവുവരുത്തിയതിനു പിന്നാലെയാണ് രാജ്യത്ത് കോവിഡ് കേസുകളുടെ എണ്ണം ക്രമാതീതമായി വര്‍ധിച്ചത്.

ആശുപത്രിയില്‍ എത്തുന്ന രോഗികളുടെ എണ്ണം പതിനാറിരട്ടി ആയി വര്‍ധിച്ചു എന്നാണ് റിപ്പോര്‍ട്ട് ചെയ്യുന്നത്. കഴിഞ്ഞ ദിവസം, ഹുബൈ പ്രവിശ്യയിലെ ഹാന്‍ച്വാന്‍ ആശുപത്രിയ്ക്ക് പുറത്ത് കാറുകളിലും മറ്റും ഇരുത്തി രോഗികള്‍ക്ക് ഐവി ഡ്രിപ്പ് നല്‍കുന്നതിന്റെ ദൃശ്യങ്ങള്‍ റോയിട്ടേഴ്സ് പുറത്തുവിട്ടു. അതേസമയം, ചൈനയില്‍ കോവിഡ് ബാധിച്ച് പത്തുലക്ഷത്തില്‍ അധികം പേര്‍ മരിക്കാനിടയുണ്ട് എന്ന് ഹോങ്കോങ് സര്‍വകലാശാല നടത്തിയ പഠനവും പ്രവചിക്കുന്നു.

ഒരു മാസത്തിലേറെയായി, ചൈനയിലെ സീറോ-കോവിഡ് നയത്തിനെതിരെയും ഷി ജിന്‍പിംഗിന്റെ സ്വേച്ഛാധിപത്യ ഭരണകൂടത്തിനെതിരെയും രാജ്യത്ത് ബഹുജന പ്രതിഷേധം അരങ്ങേറുകയാണ്. ഈ അവസരത്തില്‍ പലരും മറന്നുപോയേക്കാവുന്ന ഒരു കാര്യമുണ്ട്. ലോകാരോഗ്യ സംഘടനയും ആഗോള മാധ്യമങ്ങളുമെല്ലാം ചൈനയുടെ കോവിഡ് പ്രതിരോധത്തെയും അവരുടെ വാക്‌സിനുകളെയുമൊക്കെ ഒരിക്കല്‍ പ്രശംസിച്ചിരുന്നു.

ചൈനയുടെ കോവിഡ് പ്രതിരോധത്തില്‍ നിന്നും പ്രചോദനം ഉള്‍ക്കൊണ്ട് മറ്റു രാജ്യങ്ങള്‍ പ്രവര്‍ത്തിക്കണം എന്നാണ് തങ്ങളുടെ ആദ്യ ഓണ്‍-ഗ്രൗണ്ട് ടീമിനെ ചൈനയിലേക്ക് അയച്ചതിന് ശേഷം ലോകാരോഗ്യ സംഘടന വ്യക്തമാക്കിയത്. വാക്‌സിനേഷന്‍ ആരംഭിച്ച സമയത്ത് ചൈനീസ് വാക്‌സിനുകള്‍ക്ക് അന്താരാഷ്ട്ര സമൂഹത്തിലും മാധ്യമങ്ങളിലും വലിയ സ്വീകാര്യതയുണ്ടായിരുന്നു. അവയുടെ ഫലപ്രാപ്തിയെക്കുറിച്ചു പോലും ആരും സംസാരിച്ചില്ല. അത് ഇന്നും ചോദ്യം ചെയ്യാനാവാത്തതായി തുടരുന്നു. തൊണ്ണൂറിലധികം രാജ്യങ്ങള്‍ ഈ വ്യാജ പ്രചരണത്തില്‍ അകപ്പെടുകയും ചൈനീസ് വാക്‌സിനുകള്‍ വാങ്ങുകയും ചെയ്തു.

പിന്നീടാണ് അതിന്റെ ഫലപ്രാപ്തി എത്രത്തോളം കുറവാണെന്ന് മനസിലാക്കിയത്. യുഎഇ അതിന് ഒരു ഉദാഹരണമാണ്. രാജ്യത്തെ പൗരന്മാര്‍ക്ക് ആദ്യം രണ്ട് ഡോസ് ചൈനീസ് വാക്സിനുകള്‍ നല്‍കിയിരുന്നു. എന്നാല്‍ ഇതിന് ഗുണനിലവാരമില്ലെന്നു മനസിലാക്കി, ചൈനീസ് നിര്‍മിതമല്ലാത്ത, കൂടുതല്‍ ഫലപ്രദമായ മറ്റൊരു വാക്സിന്റെ രണ്ട് ഡോസ് വീതം വീണ്ടും നല്‍കുകയാണ് ചെയ്തത്. എന്നാല്‍ അവര്‍ ചൈനീസ് വാക്‌സിന്‍ വാങ്ങുന്ന സമയത്ത് ചൈനയുടെ നയതന്ത്ര ശ്രമങ്ങള്‍, ആഗോള സഹകരണം, വികസനം, ഗവേഷണം, നിര്‍മാണ വൈദഗ്ദ്ധ്യം എന്നിവയെല്ലാം പ്രശംസിക്കപ്പെട്ടിരുന്നു.

അതിവേഗം ജനിതകപരിണാമം സംഭവിച്ചു കൊണ്ടിരിക്കുന്ന കൊറോണ വൈറസിന് പുതിയ വകഭേദങ്ങള്‍ ഉണ്ടാകാനുള്ള സാധ്യതകള്‍ നാള്‍തോറും വര്‍ധിച്ചു വരികയാണ്. പുതിയ വകഭേദങ്ങള്‍ക്ക് വ്യാപനശേഷിയും മനുഷ്യരുെട പ്രതിരോധ സംവിധാനത്തെ വെട്ടിച്ച് രക്ഷപ്പെടുന്നതിനുള്ള കഴിവും അധികമാണ്. ഇതിനാല്‍ ഇരട്ട വാക്‌സീന്‍ എടുത്തവര്‍ക്കും കോവിഡ് പിടിപെടാനുള്ള സാധ്യത അധികമാണെന്ന് ആരോഗ്യ വിദഗ്ധര്‍ മുന്നറിയിപ്പ് നല്‍കുന്നു.


കൊറോണ വൈറസിന് ഗണ്യമായ മാറ്റങ്ങള്‍ സംഭവിച്ചെന്നും അതിനാല്‍ മുന്‍അണുബാധകളില്‍ നിന്നും വാക്‌സീനുകളില്‍ നിന്നും കൈവരിച്ച പ്രതിരോധശേഷി ദുര്‍ബലമായിക്കൊണ്ടിരിക്കുകയാണെന്നും അടുത്തിടെ നടന്ന ഒരു പഠനവും ചൂണ്ടിക്കാണിക്കുന്നു. ബൂസ്റ്റര്‍ ഡോസുകള്‍ എടുക്കുന്നതിലെ വിമുഖത, വാക്‌സീന്‍ എടുത്തവരുടെ പ്രതിരോധ സംവിധാനത്തില്‍ വന്ന മാറ്റങ്ങള്‍ എന്നിവ പുനരണുബാധയുടെ സാധ്യതകള്‍ വര്‍ധിപ്പിക്കുന്നു.

ഓരോ തവണയും കോവിഡ് ബാധിക്കപ്പെടുമ്പോള്‍ അതുമായി ബന്ധപ്പെട്ട അപകട സാധ്യതയും വര്‍ധിക്കുന്നതായി അമേരിക്കയിലെ വെറ്ററന്‍സ് ഡിപ്പാര്‍ട്ട്‌മെന്റ് ഡേറ്റ ഉപയോഗിച്ച് നടത്തിയ മറ്റൊരു പഠനവും മുന്നറിയിപ്പ് നല്‍കുന്നു. ആശുപത്രി വാസവും മരണസാധ്യതയും വീണ്ടും കോവിഡ് അണുബാധയുണ്ടാകുന്നവരില്‍ അധികമായിരിക്കും. ഇത്തരം സാഹചര്യങ്ങള്‍ ഒഴിവാക്കാന്‍ അപകടസാധ്യത കൂടിയ മുതിര്‍ന്നവര്‍ ഉള്‍പ്പെടെയുള്ള ജനവിഭാഗങ്ങള്‍ കര്‍ശനമായും ബൂസ്റ്റര്‍ ഡോസുകള്‍ എടുക്കണമെന്ന് ആരോഗ്യ വിദഗ്ധര്‍ നിര്‍ദേശിക്കുന്നു.