കഴിഞ്ഞ 24 മണിക്കൂറിനിടെ 5.37 ലക്ഷംകോവിഡ്  കേസുകളാണ് ലോകത്താകമാനം റിപ്പോര്‍ട്ട് ചെയ്തത്. പുതിയ കോവിഡ് വകഭേദം റിപ്പോര്‍ട്ട് ചെയ്തതിനു പിന്നാലെ 1396 പേര്‍ മരണപ്പെട്ടുവെന്നാണ് കണക്കുകള്‍ വ്യക്തമാക്കുന്നത്. കഴിഞ്ഞ 24 മണിക്കൂറിനുള്ളില്‍ ജപ്പാനിലാണ് ഏറ്റവും കൂടുതല്‍ കേസുകള്‍ കണ്ടെത്തിയിരിക്കുന്നത്. അതേസമയം അമേരിക്കയിലും 50,000-ത്തിലധികം കേസുകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. ചൈനയില്‍ കോവിഡ് സംഹാരതാണ്ഡവമാടുന്നുവെന്നാണ് റിപ്പോര്‍ട്ടുകള്‍. ദിനംപ്രതി കോവിഡ് വ്യാപനക്കേസുകള്‍ ചൈനയില്‍ വര്‍ദ്ധിച്ചുകൊണ്ടിരിക്കുകയാണ്.

പലരാജ്യങ്ങളിലും രോഗികളെ ചികിത്സിക്കാന്‍ ആശുപത്രികളില്‍ ഇടമില്ലാത്ത സാഹചര്യമാണ് ഉണ്ടായിരിക്കുന്നത്. ലോകാരോഗ്യ സംഘടനയും ഇക്കാര്യം വ്യക്തമാക്കി രംഗത്തെത്തിയിട്ടുണ്ട്. ചൈനയില്‍ സ്ഥിതി അതിരൂക്ഷമായി തുടരുകയാണ്. പുതിയ കോവിഡ് തരംഗം ചൈനയിലെ ആശുപത്രികള്‍ നിറച്ചുകഴിഞ്ഞുവെന്ന് ലോകാരോഗ്യ സംഘടന വ്യക്തമാക്കി. ചൈനയ്ക്ക് പുറമെ, അമേരിക്ക, ജപ്പാന്‍ തുടങ്ങി ലോകത്തിലെ എല്ലാ രാജ്യങ്ങളിലും കോവിഡിന്റെ പുതിയ വകഭേദം പ്രതിസന്ധി സൃഷ്ടിച്ചിരിക്കുകയാണ്.

ഇന്ത്യയും സംസ്ഥാനങ്ങളും കോവിഡിന്റെ പുതിയ വകഭേദത്തിനെതിരെ അതീവ ജാഗ്രതയിലാണ്. പകര്‍ച്ചവ്യാധിക്കെതിരെ നടപടികള്‍ കൈക്കൊണ്ടിട്ടുള്ളതായി കേന്ദ്ര സര്‍ക്കാര്‍ വ്യക്തമാക്കി രംഗത്തെത്തുകയും ചെയതിട്ടുണ്ട്. ലോകത്താകമാനം66 കോടി   കോവിഡ് കേസുകളാണ് ഇതുവരെ കണ്ടെത്തിയിരിക്കുന്നത്. നിലവില്‍ 20 കോടി സജീവ കേസുകളുണ്ടെന്നും കണക്കുകള്‍ വ്യക്തമാക്കുന്നു.

കഴിഞ്ഞ 24 മണിക്കൂറിനിടെ ഇന്ത്യയില്‍ 145 കേസുകള്‍ മാത്രമാണ് കണ്ടെത്തിയിരിക്കുന്നത്. പുതിയ കോവിഡ് വ്യാപനം മൂലം ആര്‍ക്കും ജീവന്‍ നഷ്ടപ്പെട്ടതായി റിപ്പോര്‍ട്ടുകളില്ല. കോവിഡിന്റെ ആരംഭത്തിനു ശേഷം രാജ്യത്ത് ഇതുവരെ നാലര കോടി കേസുകള്‍ കണ്ടെത്തിയിട്ടുണ്ട്. ഇതുവരെ 5.3 ലക്ഷം പേര്‍ക്ക് കോവിഡ് മൂലം ജീവനും നഷ്ടപ്പെട്ടിട്ടുണ്ട്. നിലവില്‍ രാജ്യത്ത് 4672 സജീവ കേസുകള്‍ മാത്രമാണുള്ളത്.


സമുഹമാധ്യമങ്ങളില്‍ വൈറലാകുന്ന ചൈനീസ് ആശുപത്രികളുടെയും ശ്മശാനങ്ങളുടെയും വീഡിയോകളിലൂടെ ചൈനയിലെ അവസ്ഥ വളരെ മോശമാണെന്നുള്ള സൂചനകളാണ് പുറത്തു വരുന്നത്. ആശുപത്രികളില്‍ മൃതദേഹങ്ങള്‍ കൂമ്പാരമായി കൂടിക്കിടക്കുന്നത് കാണാന്‍ സാധിക്കും.
ലോകത്തെ മിക്ക രാജ്യങ്ങളിലും കോവിഡിന്റെ പുതിയ കേസുകള്‍ വര്‍ധിച്ചുവരുന്ന സാഹചര്യത്തില്‍ ഇന്ത്യന്‍ സര്‍ക്കാര്‍ അതീവ ജാഗ്രതയിലാണ്. കഴിഞ്ഞ ദിവസം രോഗവ്യാപനത്തെ സംബന്ധിച്ച് കേന്ദ്രസര്‍ക്കാര്‍ ജാഗ്രതാ നിര്‍ദേശം നല്‍കിക്കഴിഞ്ഞു.

കേന്ദ്ര ആരോഗ്യമന്ത്രി മന്‍സുഖ് മാണ്ഡവ്യയുടെ നേതൃത്വണത്തില്‍ സ്ഥിതിഗതികള്‍ അവലോകനം ചെയ്യാന്‍ യോഗം ചേര്‍ന്നു. എല്ലാ സാഹചര്യങ്ങളെയും നേരിടാനുള്ള തയ്യാറെടുപ്പുകള്‍ കേന്ദ്ര സര്‍ക്കാര്‍ നടത്തിയിട്ടുണ്ടെന്നും അദ്ദേഹം പറഞ്ഞു. കോവിഡ് ഇതുവരെ അവസാനിച്ചിട്ടില്ലെന്നുള്ളതാണ് യാഥാര്‍ത്ഥ്യമെന്നും ജാഗ്രത പാലിക്കാനും നിരീക്ഷണം ശക്തമാക്കാനും ബന്ധപ്പെട്ട എല്ലാവര്‍ക്കും നിര്‍ദ്ദേശം നല്‍കിയിട്ടുണ്ടെന്നും അദ്ദേഹം വ്യക്തമാക്കി. കോവിഡ് വാക്‌സിന്‍ എടുക്കാനായി ജനങ്ങളോട് അഭ്യര്‍ത്ഥിക്കുകയാണെന്നും കേന്ദ്ര ആരോഗ്യമന്ത്രി പറഞ്ഞു.


ഉത്തര്‍പ്രദേശില്‍ കഴിഞ്ഞ 24 മണിക്കൂറിനിടെ അഞ്ച് പുതിയ കേസുകള്‍ കണ്ടെത്തി. ഇതോടെ സംസ്ഥാനത്ത് ഇപ്പോള്‍ 98 സജീവ കേസുകളുണ്ടെന്നാണ് റിപ്പോര്‍ട്ടുകള്‍. കഴിഞ്ഞ 24 മണിക്കൂറിനിടെ സംസ്ഥാനത്ത് 28,602 പേരെ പരിശോധിച്ചിട്ടുണ്ട്.്. യുപി സര്‍ക്കാര്‍ സംസ്ഥാനത്തിനകത്തെ എല്ലാ വിമാനത്താവളങ്ങളിലും ജാഗ്രതാ നിര്‍ദേശം പുറപ്പെടുവിച്ചിട്ടുണ്ട്.

ഡല്‍ഹിയില്‍ ബുധനാഴ്ച അഞ്ചു കോവിഡ് വൈറസ് കേസുകളാണ് കണ്ടെത്തിയിരിക്കുന്നത്. 2642 പേരെ പരിശോധിച്ചിട്ടുണ്ട്. കഴിഞ്ഞ 24 മണിക്കൂറിനിടെ ഡല്‍ഹിയില്‍ കൊറോണ ബാധിച്ചുള്ള ഒരു മരണമാണ് റിപ്പോര്‍ട്ട് ചെയ്തിരിക്കുന്നത്. അതേസമയം എട്ട് രോഗികള്‍ കോവിഡ് വിമുക്തരായെന്നും ഡെല്‍ഹി സര്‍ക്കാര്‍ അറിയിച്ചു. മഹാരാഷ്ട്രയിലും അതീവജാഗ്രതാ നിര്‍ദ്ദേശം പുറപ്പെടുവിച്ചിരിക്കുകയാണ്. കോവിഡ് വ്യാപനത്തിന്റെ കഴിഞ്ഞ തരംഗത്തില്‍ ഏറ്റവും കൂടുതല്‍ ബാധിച്ചത് മഹാരാഷ്ട്രയെയായിരുന്നു.  

കേരളം, ഒഡീഷ, ഉത്തരാഖണ്ഡ്, കര്‍ണ്ണാടക സംസ്ഥാനങ്ങളിലെ സര്‍ക്കാരുകളും കോവിഡ് വ്യാപനത്തിനെതിരെ ഒരുക്കങ്ങളുമായി രംഗത്തെത്തിയിട്ടുണ്ട്. മി്കകവാറും സംസ്ഥാനങ്ങള്‍ കോവിഡ് മാനദണ്ഡങ്ങള്‍ പുറപ്പെടുവിക്കാന്‍ ഒരുങ്ങുകയാണ്. കേരളത്തില്‍ ആരോഗ്യ മന്ത്രിയുടെ നേതൃത്വത്തില്‍ പ്രത്യേക യോഗം ചോര്‍ന്ന് ജാഗ്രത നിര്‍ദ്ദേശം നല്കിയിരിക്കുകയാണ്.