അധ്യാപികയോട് ആറു വയസ്സുകാരന്‍ കാട്ടിയ ക്രൂരതയില്‍ ഞെട്ടിയിരിക്കുകയാണ് ഒരു സ്‌കൂള്‍ മുഴുവന്‍. ക്ലാസ്സില്‍ അധ്യാപിക പഠിപ്പിച്ചുകൊണ്ടിരിക്കെ ബാഗില്‍ സൂക്ഷിച്ചിരുന്ന തോക്ക് എടുത്ത് അധ്യാപികയെ വെടിവയ്ക്കുകയായിരുന്നു. വെടിയേറ്റ അധ്യാപികയെ ഉടന്‍തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അധ്യാപികയെ മാത്രം ലക്ഷ്യം വച്ചാണ് കുട്ടി ഷൂട്ട് ചെയ്തത് എന്നത് വ്യക്തമാണ്.

സംഭവത്തില്‍ മറ്റാര്‍ക്കും പരിക്കേറ്റിട്ടുമില്ല. ആരെയും കുട്ടി ആക്രമിച്ചിട്ടുമില്ല. ആറു വയസ്സുകാരനായ വിദ്യാര്‍ഥി അധ്യാപികയെ ഷൂട്ട് ചെയ്യാന്‍ ഉപയോഗിച്ചത് അമ്മയുടെ തോക്കാണ്. അമേരിക്കയിലെ വെര്‍ജിനയില്‍ ആണ് സംഭവം. അമ്മ നിയമപരമായി വാങ്ങിയ തോക്കായിരുന്നു കുട്ടി സ്‌കൂളില്‍ കൊണ്ടുവന്ന് അധ്യാപികക്ക് നേരെ വെടിയുതിര്‍ത്തത്.

വെര്‍ജിനയിലെ റിച്ച്മണ്ടില്‍ നിന്ന് 112 കിലോമീറ്റര്‍ ദൂരെയുള്ള ന്യൂപോര്‍ട്ട് ന്യൂസ് നഗരത്തിലെ റിച്ച്‌നെക്ക് എലിമെന്ററി സ്‌കൂളില്‍ ആണ് സംഭവം നടന്നത്. ജനുവരി ആറിനായിരുന്നു വിദ്യാര്‍ത്ഥികളെയും അധ്യാപകരെയും ഭീതിയിലാഴ്ത്തിയ നാടകീയ രംഗങ്ങള്‍ അരങ്ങേറിയത്.ബാഗിനുള്ളില്‍ ഒളിപ്പിച്ചുവച്ചാണ് കുട്ടി തോക്ക് സ്‌കൂളില്‍ എത്തിച്ചത്. ശേഷം ക്ലാസ് മുറിയില്‍ അധ്യാപിക ക്ലാസ് എടുത്തു കൊണ്ടിരിക്കുകയായിരുന്നു. പെട്ടെന്ന്, എല്ലാവരെയും ഞെട്ടിച്ചുകൊണ്ട് ബാഗില്‍ നിന്നും കുട്ടി തോക്ക് പുറത്തെടുത്ത് അധ്യാപികയ്ക്ക് നേരെ വെടിയുതിര്‍ക്കുകയായിരുന്നു.

അബിഗെയ്ല്‍ സ്വെര്‍നര്‍ എന്ന അധ്യാപികയ്ക്ക് നേരെയാണ് വിദ്യാര്‍ത്ഥിയുടെ അപ്രതീക്ഷിത ആക്രമണം ഉണ്ടായത്. ഈ ആക്രമണം അറിയാതെ സംഭവിച്ചത് അല്ല എന്നും വ്യക്തമായ പ്ലാനിങ്ങോടെയാണ് ആറു വയസ്സുകാരന്‍ കുറ്റകൃത്യം നടപ്പിലാക്കിയതെന്നും പോലീസ് മേധാവിയായ സ്റ്റീവ് ഡ്രൂ മാധ്യമങ്ങളോട് പറഞ്ഞു.

ജീവന്‍ വെടിയുന്നത് വരെയും 25 കാരിയായ അധ്യാപിക അന്വേഷിച്ചുകൊണ്ടിരുന്നത് തന്റെ കുട്ടികളില്‍ ആര്‍ക്കെങ്കിലും പരിക്കുപറ്റിയോ എന്നായിരുന്നു. അധ്യാപികയുടെ നെഞ്ചിനാണ് വെടിയേറ്റത്. വെടിയേറ്റെങ്കിലും ക്ലാസ് മുറിയില്‍ ഉണ്ടായിരുന്ന തന്റെ മറ്റ് വിദ്യാര്‍ത്ഥികളെ മുഴുവന്‍ സുരക്ഷിതമായി ക്ലാസ് മുറിക്ക് പുറത്തെത്തിച്ചതിനുശേഷം ആണ് അവര്‍ സഹായത്തിനായി അഡ്മിനിസ്‌ട്രേഷന്‍ ബ്ലോക്കിലേക്ക് ഓടിയത്. ഇത്തരത്തില്‍ ഒരു ആക്രമണം തന്റെ അധ്യാപികയ്ക്ക് നേരെ നടത്താന്‍ ആറു വയസ്സുകാരനെ പ്രേരിപ്പിച്ച കാരണം എന്താണെന്ന് വ്യക്തമല്ല.

സംഭവം അറിഞ്ഞ് സ്ഥലത്തെത്തിയ പോലീസ് ക്ലാസ് മുറിയില്‍ വിദ്യാര്‍ത്ഥിയുടെ ഡെസ്‌ക്കിന് സമീപത്ത് നിന്ന് 9എംഎം ടോറസ് പിസ്റ്റളും മൊബൈല്‍ ഫോണും പോലീസ് കണ്ടെത്തി. കുട്ടിയുടെ പേര് വിവരങ്ങള്‍ പോലീസ് പുറത്തുവിട്ടിട്ടില്ലെങ്കിലും കുട്ടി ഇപ്പോള്‍ ചികിത്സയിലാണെന്നാണ് അറിയുന്നത്. അധ്യാപകരെയും കുട്ടികളെയും രക്ഷിതാക്കളെയും ബാധിച്ച ഞെട്ടല്‍ വിട്ടുമാറുന്നതിനായി ഒരാഴ്ചത്തേക്ക് സ്‌കൂളിന് അവധി നല്‍കിയിട്ടുണ്ട്. എന്ത് തന്നെയായാലും കുട്ടികുറ്റവാളികള്‍ രാജ്യത്ത് കൂടുന്നതായാണ് ഓരോ സംഭവങ്ങളിലൂടെയും പുറത്തുവരുന്നത്.