ഹാരി രാജകുമാരന്റെ ഓർമ്മക്കുറിപ്പുകൾ ആയ സ്‌പെയർ എന്ന പുസ്തകം ചരിത്രത്തിലെ ഏറ്റവും വേഗത്തിൽ വിറ്റഴിക്കപ്പെടുന്ന നോൺ-ഫിക്ഷൻ പുസ്തകമായി മാറിയിരിക്കുകയാണ്. ലോകമെമ്പാടുമുള്ള പുസ്തകശാലകളിൽ വിൽപ്പനയ്‌ക്കെത്തി, പുസ്തകത്തിന്റെ ഒരു പകർപ്പ് വാങ്ങാൻ ആരാധകർ ക്യൂ നിൽക്കുന്നു. ഇന്നലെ അർദ്ധരാത്രിക്ക് പുറത്തിറങ്ങിയ പുസ്തകത്തിന്റെ, ഹാർഡ് കോപി, ഈ ബുക്ക്, ഓഡിയോ ബുക്ക് എന്നീ ഇനങ്ങളിലായി ഇതുവരെ 4 ലക്ഷത്തിൽ അധികം കോപ്പികൾ വിറ്റുപോയതായാണ് പ്രസാധകർ അവകാശപ്പെടുന്നത്. ഓൺലൈൻ റീട്ടെയിലർ ആമസോണിന്റെ യുകെയിൽ ഇതിനകം തന്നെ ഒന്നാമതാണ്.

ഈ പുസ്തകം നല്ല രീതിയിൽ വിറ്റുപോകും എന്ന് തങ്ങൾക്ക് ഉറപ്പായിരുന്നു എന്നാണ്. എന്നാൽ, ഇപ്പോൾ തങ്ങളുടെ ഏറ്റവും വലിയ ശുഭപ്രതീക്ഷകളെ പോലും കവച്ചു വയ്ക്കുന്ന രീതിയിലാണ് പുസ്തകത്തിന്റെ വിൽപന കുതിക്കുന്നതെന്നും ട്രാൻസ്വേൾഡ് പെൻഗ്വിൻ റാൻഡം ഹൗസ് മാനേജിങ് ഡയറക്ടർ ലാരി ഫിൻലേ പറയുന്നു. ആദ്യ ദിനത്തിൽ മറ്റേ ഹാരിയുടെ കഥ പറയുന്ന പുസ്തക (ഹാരി പോട്ടർ)ത്തേക്കാൾ ഇത് വിറ്റുപോയതായും അദ്ദേഹം അവകാശപ്പെട്ടു.

കഴിഞ്ഞയാഴ്ച സ്പെയിനിൽ ചില പകർപ്പുകൾ ചോർന്നിരുന്നു. രാജകൊട്ടാരങ്ങൾക്കുള്ളിലെ സംഘർഷങ്ങളും വ്യക്തിപരമായ സംഘർഷങ്ങളും ഓർമ്മക്കുറിപ്പ് വെളിപ്പെടുത്തുന്നു. പിതാവ് ചാൾസ് രാജാവ്, രണ്ടാനമ്മ കാമില, ജ്യേഷ്ഠൻ വില്യം രാജകുമാരൻ എന്നിവരുൾപ്പെടെയുള്ള മറ്റ് രാജകുടുംബങ്ങളെക്കുറിച്ചും തന്റെ വ്യക്തിപരമായ പോരാട്ടങ്ങളെയും ആരോപണങ്ങളെ കുറിച്ചും എല്ലാം വെളിപ്പെടുത്തയിട്ടുണ്ട് . ഇതോടെ "സ്‌പെയർ" ലോകമെമ്പാടും ശ്രദ്ധ നേടിയിട്ടുണ്ട്. എന്നാൽ ബക്കിംഗ്ഹാം കൊട്ടാരവും കെൻസിംഗ്ടൺ കൊട്ടാരവും ഓർമ്മക്കുറിപ്പിലെ അവകാശവാദങ്ങളോട് ഇതുവരെ പ്രതികരിച്ചിട്ടില്ല.

ഹാരി പുസ്തകത്തിൽ തനിക്ക് 12 വയസ്സുള്ളപ്പോൾ അമ്മ ഡയാന രാജകുമാരിയുടെ മരണശേഷം താൻ വളർന്നുവന്ന ദുഃഖത്തെക്കുറിച്ചും അതിനെ നേരിടാൻ കൊക്കെയ്‌നിന്റെയും മറ്റ് മയക്കുമരുന്നുകളും ഉപയോഗച്ചതും , അഫ്ഗാനിസ്ഥാനിൽ സൈനികനായിരിക്കെ 25 താലിബാൻ പോരാളികളെ കൊന്നതീനെപറ്റി യും എന്നും തന്റെ കന്യകാത്വം നഷ്ടപ്പെട്ടതിനെ കുറിച്ചും, സിംഹാസനത്തിന്റെ അവകാശിയായ വില്യമുമായുള്ള ചൂടേറിയ തർക്കവും എല്ലാം തുറന്നു എഴുതിയിട്ടുണ്ട്.

2005-ൽ താൻ വിവാഹം കഴിച്ചതും ഇപ്പോൾ രാജ്ഞി പത്നിയുമായ കാമിലയെ വിവാഹം കഴിക്കരുതെന്ന് ഇരുവരും പിതാവിനോട് അപേക്ഷിച്ചതെങ്ങനെയെന്നും അദ്ദേഹം വെളിപ്പെടുത്തുന്നു. ഹാരിയും ഭാര്യ മേഗനും 2020-ൽ രാജകീയ ചുമതലകളിൽ നിന്ന് പിന്മാറുകയും പുതിയ ജീവിതം രൂപപ്പെടുത്തുന്നതിനായി കാലിഫോർണിയയിലേക്ക് മാറുകയും ചെയ്തിരുന്നു.

ഇതിനിടെ ഹൗ ടു കിൽ യുവർ ഫാമിലി എന്ന നോവലിന് അടുത്തായി പ്രദർശിപ്പിച്ചിരിക്കുന്ന ഹാരി രാജകുമാരന്റെ പുസ്തകത്തിന്റെ ഫോട്ടോയും വൈറലായിട്ടുണ്ട്.