ഭൂകമ്പ ദുരന്തത്തിന്റെ അലയൊലികളില്‍ നിന്നും കരകയറാന്‍ ശ്രമം നടത്തുന്ന തുര്‍ക്കിയെയും സിറിയയെയും നടുക്കി വീണ്ടും ഭൂചലനം... രക്ഷാപ്രവര്‍ത്തനം തുടങ്ങി.
.
6.3 തീവ്രതയില്‍ ഇരു രാജ്യങ്ങളുടെയും അതിര്‍ത്തിയില്‍ ശക്തമായ ഭൂചലനം ഉണ്ടായതായാണ് റോയിട്ടേഴ്‌സ് റിപ്പോര്‍ട്ട് ചെയ്യുന്നത്. ഏതൊക്കെ പ്രദേശങ്ങളില്‍ നാശനഷ്ടങ്ങള്‍ സംഭവിച്ചുവെന്നോ ആളപായമുണ്ടോ എന്നതിനെക്കുറിച്ചുള്ള കൂടുതല്‍ വിവരങ്ങള്‍ ലഭ്യമല്ല.

രണ്ട് കിലോമീറ്റര്‍ ആഴത്തിലാണ് ഭൂചലനം ഉണ്ടായതെന്ന് യൂറോപ്യന്‍ മെഡിറ്ററേനിയന്‍ സീസ്‌മോളജിക്കല്‍ സെന്റര്‍ അറിയിച്ചു.

ഫെബ്രുവരി 6നാണ് തെക്ക് കിഴക്കന്‍ തുര്‍ക്കിയിലും വടക്കന്‍ സിറിയയിലും റിക്ടര്‍ സ്‌കെയിലില്‍ 7.8 തീവ്രത രേഖപ്പെടുത്തിയ അതിശക്തമായ ഭൂകമ്പം ഉണ്ടായത്. ഇരുരാജ്യങ്ങളിലുമായി 46,000ത്തിലേറെ പേര്‍ മരിച്ചു.

കുറഞ്ഞത് 26 ദശലക്ഷം പേരെങ്കിലും മാനുഷിക സഹായങ്ങള്‍ അര്‍ഹിക്കുന്നതായാണ് ലോകാരോഗ്യ സംഘടനയുടെ കണക്ക്. ദുരന്തത്തിന് പിന്നാലെ കാഹ്റാമാന്‍മറാസ്, ഹാതെയ് പ്രവിശ്യകള്‍ ഒഴികെയുള്ള എല്ലാ ഭൂകമ്പ ബാധിത മേഖലകളിലും കെട്ടിടാവശിഷ്ടങ്ങള്‍ക്കിടെ കുടുങ്ങിയവര്‍ക്കായി നടത്തി വന്ന തെരച്ചില്‍ പൂര്‍ത്തിയാക്കിയെന്ന് തുര്‍ക്കി.

വീടുകള്‍ നഷ്ടപ്പെട്ട പതിനായിരക്കണക്കിന് ആളുകളുടെ പുനരധിവാസമാണ് ഇനി ദൗത്യമെന്ന് അധികൃതര്‍ .അതിനായി പരിശ്രമിക്കുമ്പോഴാണ് വീണ്ടും ഭൂചലനം സംഭവിച്ചത്.