യുഎസ് പ്രസിഡന്റ് സ്ഥാനത്തേക്ക് അടുത്തവര്‍ഷം നടക്കുന്ന തിരഞ്ഞെടുപ്പില്‍ ഇന്ത്യയില്‍ കുടുംബ വേരുകളുള്ളയാള്‍ എത്താന്‍ സാദ്ധ്യത വര്‍ദ്ധിക്കുകയാണ്. റിപ്പബ്ലിക്കന്‍ പാര്‍ട്ടിയില്‍ നിന്ന് സ്ഥാനാര്‍ത്ഥിത്വം പ്രഖ്യാപിച്ചിട്ടുള്ള മൂന്ന് പേരില്‍ രണ്ട് പേരും ഇന്ത്യന്‍ വംശജരാണ്. മുന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്, ഇന്ത്യന്‍ വംശജയും ഐക്യരാഷ്ട്ര സഭയിലെ മുന്‍ യു എസ് സ്ഥാനപതിയുമായിരുന്ന നിക്കി ഹേലി എന്നിവര്‍ക്കൊപ്പം പാലക്കാട്ട് കുടുംബവേരുകളുള്ള മലയാളിയായ വിവേക് രാമസ്വാമിയും 2024ലെ യുഎസ് പ്രസിഡന്റ് തിരഞ്ഞെടുപ്പിനുള്ള സ്ഥാനാര്‍ഥിത്വം പ്രഖ്യാപിച്ച് രംഗത്ത് വന്നിരിക്കുകയാണ്.

പാലക്കാട് വടക്കാഞ്ചേരി സ്വദേശിയായ പിതാവ് വി.ജി.രാമസ്വാമിയാണ് അമേരിക്കയിലേക്ക് ചേക്കേറിയത്. ജനറല്‍ ഇലക്ട്രിക്കില്‍ എഞ്ചിനീയറും പേറ്റന്റ് അഭിഭാഷകനുമായിരുന്നു അദ്ദേഹം. 37കാരനായ വിവേക് ജനിച്ചതും വളര്‍ന്നതും അമേരിക്കയിലാണ്. ഫാര്‍മസ്യൂട്ടിക്കല്‍ മേഖലയില്‍ നിക്ഷേപം നടത്തി സമ്പന്നനായി. വിവേകിന്റെ കുടുംബം അടുത്തിടെയും പാലക്കാട് സന്ദര്‍ശനം നടത്തിയിരുന്നു.

യുഎസ് പ്രസിഡന്റ് സ്ഥാനത്തേക്ക് അടുത്തവര്‍ഷം നടക്കുന്ന തിരഞ്ഞെടുപ്പില്‍ മത്സരിക്കുമെന്ന് ഫോക്‌സ് ന്യൂസിന് നല്‍കിയ അഭിമുഖത്തിലാണ് വിവേക് രാമസ്വാമി നിലപാട് അറിയിച്ചത്. സാമൂഹിക പ്രവര്‍ത്തനങ്ങളില്‍ നിരന്തരം ഏര്‍പ്പെടുന്ന വിവേക് മികച്ച സംരംഭകന്‍ കൂടിയാണ്. ചൈനയെ കടന്നാക്രമിച്ച് കൊണ്ടാണ് വിവേക് തന്റെ സ്ഥാനാര്‍ഥിത്വം പ്രഖ്യാപിച്ച് രംഗത്ത് വന്നതെന്നതും ശ്രദ്ധേയമാണ്. അമേരിക്കക്കാരുടെ ചൈനീസ് വിരോധത്തെ വോട്ടാക്കിമാറ്റാനും, ഒരു തണുപ്പന്‍ പ്രതിച്ഛായയുള്ള ബൈഡനെ പരാജയപ്പെടുത്താനും ട്രെമ്പിന്റെ അഗ്രസീവ് നയം വിവേകും പിന്തുടരും എന്ന സൂചനയാണ് ലഭിക്കുന്നത്.

'അമേരിക്കയുടെ മെറിറ്റ് തിരികെ നല്‍കും ചൈനയെ ആശ്രയിക്കുന്നത് അവസാനിപ്പിക്കുകയും ചെയ്യും' ഇതാണ് വിവേകിന്റെ നയം. 'ചൈന നമ്മുടെ പരമാധികാരം ലംഘിക്കുന്നുവെന്ന വസ്തുതയിലേക്ക് നാം ഉണര്‍ന്നിരിക്കണം, കാരണം, അത് ഒരു റഷ്യന്‍ ചാര ബലൂണായിരുന്നെങ്കില്‍, ഞങ്ങള്‍ അത് തല്‍ക്ഷണം വെടിവച്ചു വീഴ്ത്തുകയും ഉപരോധം ഉയര്‍ത്തുകയും ചെയ്യുമായിരുന്നു. എന്തുകൊണ്ടാണ് ചൈനയ്ക്ക് വേണ്ടി അത് ചെയ്യാത്തത്? ' വിവേക് ചോദിക്കുന്നു.