അപകടകാരി'യായ ഇഡാലിയ ചുഴലിക്കാറ്റ് ഫ്‌ലോറിഡയില്‍ തീരംതൊട്ടു. കാറ്റഗറി മൂന്ന് ഗണത്തില്‍ പെടുന്ന കൊടുങ്കാറ്റാണ് വീശിയത്. പടിഞ്ഞാറന്‍ ക്യൂബയില്‍ ആഞ്ഞടിച്ച ഇഡാലിയ ഫ്‌ലോറിഡയിലെ ചതുപ്പുനിലമായ ബിഗ് ബെന്‍ഡില്‍ രാവിലെ 7:45 ഓടെയാണ് തീരം തൊട്ടത്.


മണിക്കൂറില്‍ ഏകദേശം 215 കിലോമീറ്റര്‍ വേഗതയിലാണ് കാറ്റ് വീശുന്നതെന്ന് യുഎസ് നാഷണല്‍ ചുഴലിക്കാറ്റ് കേന്ദ്രം (എന്‍എച്ച്‌സി) അറിയിച്ചു.ചുഴലിക്കാറ്റിനെ തുടര്‍ന്ന് ഫ്‌ലോറിഡയില്‍ രണ്ടുപേര്‍ മരിച്ചതായി സൂചനകളുണ്ട്.

ചുഴലിക്കാറ്റിനെത്തുടര്‍ന്ന് ഫ്‌ലോറിഡയില്‍ ജനജീവിതം ദുസ്സഹമായി. താഴ്ന്ന പ്രദേശങ്ങളില്‍ വെള്ളക്കെട്ട് തുടരുകയാണ്. പ്രദേശങ്ങളില്‍ നിന്ന് ആളുകളെ ഒഴിപ്പിച്ചു. കുടുങ്ങിക്കിടക്കുന്നവരെ രക്ഷിക്കാനുള്ള പ്രവര്‍ത്തനങ്ങളും തുടരുകയാണ്.

മണിക്കൂറില്‍ 70 മൈല്‍ വേഗതയിലാണ് കാറ്റ് വീശുന്നത്. കാറ്റ് ജോര്‍ജിയ, സൗത്ത് കരലീന സംസ്ഥാനങ്ങളിലേക്ക് നീങ്ങുകയാണ്. രണ്ടിടങ്ങളിലും അടിയന്തരാവസ്ഥ പ്രഖ്യാപിച്ചിട്ടുണ്ട്. കൊടുങ്കാറ്റ് കാറ്റഗറി 4 തീവ്രതയില്‍ എത്തുമെന്നാണ് പ്രവചനത്തിലുള്ളത്.