ഹമാസിനെ തോല്പ്പിക്കാന് മാസങ്ങളോ അതിലധികമോ യുദ്ധം ചെയ്യാന് തയ്യാറാണെന്ന് വ്യക്തമാക്കിയതിന് പിന്നാലെ, ഹമാസുമായുള്ള രണ്ടാം വെടിനിര്ത്തലിന്, ഖത്തറിന്റെയും ഈജിപ്തിന്റെയും മധ്യസ്ഥത തേടി ഇസ്രായേല്...
ബന്ദി മോചന കരാര് അവസാനിച്ചതിന് പിന്നാലെ, ഖാന് യൂനിസ് അടക്കമുള്ള പ്രദേശങ്ങളില് ശക്തമായ ആക്രമണമാണ് ഇസ്രായേല് നടത്തിയത്. ഇതിന് പ്രത്യാക്രമണം നടത്തി ഹമാസും മറുപടി നല്കി. ഇപ്പോഴിതാ ഹമാസുമായുള്ള രണ്ടാം വെടിനിര്ത്തലിന് ഖത്തറിന്റെയും ഈജിപ്തിന്റെയും മധ്യസ്ഥത ഇസ്രായേല് തേടിയതായി റിപ്പോര്ട്ടുകള്. ഈജിപ്ഷ്യന് സ്രോതസ്സുകളെ ഉദ്ധരിച്ച് ഇസ്രായേല് പത്രമായ ഹാരെറ്റ്സാണ് വാര്ത്ത റിപ്പോര്ട്ടു ചെയ്തത്. ഹമാസിന്റെ കൈവശമുള്ള ബന്ദികളെ കൈമാറിയാല് വെടിനിര്ത്തലിന് ഒരിക്കല് കൂടി ഒരുക്കമാണെന്നാണ് ഇസ്രായേല് പറയുന്നത്.
'ഹമാസുമായി മറ്റൊരു വെടിനിര്ത്തലിന് മധ്യസ്ഥത വഹിക്കാന് ഇസ്രായേല് ഈജിപ്തിന്റെയും ഖത്തറിന്റെയും സഹായം തേടി. സ്കൈ ന്യൂസ് അറേബ്യയോട് ഈജിപ്ഷ്യന് സ്രോതസ്സുകളാണ് ഇക്കാര്യം വെളിപ്പെടുത്തിയത്. ഹമാസിന്റെ പിടിയിലുള്ള ഇസ്രായേല് ബന്ദികളെ മോചിപ്പിക്കണമെന്ന ചട്ടക്കൂടിലാണ് വെടിനിര്ത്തല് ആവശ്യപ്പെട്ടത്. ഇതിനായി അമേരിക്കയുടെ സാരഥ്യത്തില് ഇസ്രായേലി, ഈജിപ്ഷ്യന്, ഖത്തരി ഉദ്യോഗസ്ഥരുടെ യോഗം ഉടന് ചേരും' - എന്നാണ് ഹാരെറ്റ്സ് റിപ്പോര്ട്ടു ചെയ്തത്.
ഗാസയില് അടിയന്തര വെടിനിര്ത്തല് ആവശ്യപ്പെട്ട് ഡിസംബര് എട്ടിന് യുഎന് രക്ഷാസമിതിയില് അവതരിപ്പിക്കപ്പെട്ട പ്രമേയം യുഎസ് വീറ്റോ ചെയ്തിരുന്നു. 13 അംഗങ്ങള് വെടിനിര്ത്തലിനെ അനുകൂലിച്ചപ്പോള് യുഎസ് മാത്രമാണ് എതിര്ത്തത്. യു.കെ വിട്ടുനിന്നു. രക്ഷാസമിതിയിലെ സ്ഥിരാംഗം വീറ്റോ ചെയ്തതോടെ പ്രമേയം പരാജയപ്പെട്ടു. ഭരണഘടനാപരമായ പ്രത്യേക അധികാരം ഉപയോഗിച്ച് സെക്രട്ടറി ജനറല് ആന്റോണിയോ ഗുട്ടറസ് ആണ് പ്രമേയം കൊണ്ടുവന്നത്.
യാഥാര്ത്ഥ്യത്തില് നിന്ന് ഏറെ അകലെയാണ് പ്രമേയം എന്നാണ് യുഎസ് പ്രതിനിധി റോബര്ട്ട് എ വുഡ് പ്രതികരിച്ചത്. യുഎസ് നടപടിക്കെതിരെ ആഗോള തലത്തില് വിമര്ശനം ശക്തമാണ്. ബന്ദികളെയും തടവുകാരെയും പരസ്പരം മോചിപ്പിക്കാമെന്ന കരാറില് നേരത്തെ ഖത്തറിന്റെ മധ്യസ്ഥതയില് ആദ്യ വെടിനിര്ത്തല് നവംബര് 24ന് പ്രാബല്യത്തില് വന്നിരുന്നു. നാലു ദിവസത്തേക്കായിരുന്നു വെടിനിര്ത്തല്. ഇരുകൂട്ടരും ബന്ദികളെയും തടവുകാരെയും മോചിപ്പിക്കുകയും ചെയ്തിരുന്നു.
ഹമാസിനെ തോല്പ്പിക്കാന് മാസങ്ങളോ അതിലധികമോ യുദ്ധം ചെയ്യാന് തയ്യാറാണെന്ന് ഇസ്രായേല് വ്യക്തമാക്കിയതിന് പിന്നാലെയാണ് വെടിനിര്ത്തലിന് ഖത്തറിന്റെയും ഈജിപ്തിന്റെയും മധ്യസ്ഥത ഇസ്രായേല് തേടിയതായി റിപ്പോര്ട്ടുകളും പുറത്ത് വരുന്നത്.
വ്യോമാക്രമണങ്ങളിലൂടെയും, വെടിവെപ്പിലൂടെയും ഗാസയ്ക്കെതിരെയുള്ള കരയാക്രമണം ശക്തമാകുന്നതിനിടെയാണ് ഇസ്രായേലിന്റെ പ്രതികരണം. യുദ്ധം അവസാനിപ്പിക്കാനും എല്ലാ ബന്ദികളെയും മോചിപ്പിക്കാനുമുള്ള ശ്രമങ്ങള് തുടരുമെന്ന് പ്രധാന മധ്യസ്ഥ പങ്കുവഹിച്ച ഖത്തര് അറിയിച്ചിരുന്നു.
https://www.facebook.com/Malayalivartha
