ഇറാനില്‍ സൈനിക ജനറലായിരുന്ന ക്വാസിം സുലൈമാനിയുടെ ചരമവാര്‍ഷിക ദിനമായ ഇന്ന് ഇരട്ടസ്ഫോടനം. സംഭവത്തില്‍ 73 പേര്‍ മരിച്ചതായും 170ലധികം പേര്‍ക്ക് പരിക്കേറ്റതായുമാണ് വിവരം. ക്വാസിം സുലൈമാനിയുടെ ചരമവാര്‍ഷിക ദിനമായ ഇന്ന് അദ്ദേഹത്തിന് ആദരവര്‍പ്പിക്കാന്‍ നിരവധി പേര്‍ എത്തിച്ചേര്‍ന്നിരുന്നു. ഇതിനിടെയാണ് അതിശക്തമായ ഇരട്ട സ്ഫോടനങ്ങളുണ്ടായത്. നടന്നത് തീവ്രവാദി ആക്രമണമാണെന്ന് ഇറാന്‍ ആരോപിച്ചു. തെക്കന്‍ ഇറാനിലെ കെര്‍മനില്‍ സാഹേബ് അല്‍ സമാന്‍ പള്ളിയുടെ സമീപത്താണ് ഇറാന്‍ റവല്യൂഷണറി ഗാര്‍ഡ്സ് മേധാവിയായിരുന്ന ക്വാസിം സുലൈമാനിയുടെ ശവകുടീരം. ഇവിടെയാണ് ആദ്യ സ്ഫോടനം ഉണ്ടായത്. രണ്ടാമത് സ്ഫോടനം പള്ളിയിലാണ് ഉണ്ടായതെന്നും ദൃക്സാക്ഷികള്‍ വ്യക്തമാക്കുന്നു.

സ്ഫോടനത്തിന് കാരണമായതെന്തെന്ന് ഇപ്പോഴും വ്യക്തമല്ല. ഗ്യാസ് സിലിണ്ടറുകള്‍ പൊട്ടിത്തെറിച്ചെന്ന് ചിലര്‍ അഭിപ്രായപ്പെട്ടെങ്കിലും ഇക്കാര്യത്തിലും ഉറപ്പില്ല. 15 മിനിട്ടോളം വ്യത്യാസത്തിലായിരുന്നു സ്ഫോടനങ്ങള്‍. ഇറാന്റെ ഇസ്‌ളാമിക റെവല്യൂഷണറി ഗാര്‍ഡ് കോര്‍പ്സിലെ മേജര്‍ ജനറലായിരുന്നു ക്വാസിം സുലൈമാനി. 2020 ജനുവരി മൂന്നിന് ഇറാഖിലെ ബാഗ്ദാദ് വിമാനത്താവളത്തിനുപുറത്തുവച്ച് യു എസ് ഡ്രോണ്‍ ആക്രമണത്തിലാണ് ക്വാസീം കൊല്ലപ്പെട്ടത്. ഇറാഖിലെ ഇസ്‌ളാമിക് സ്റ്റേറ്റ് ഭരണകൂടത്തിനെതിരെ പ്രതിരോധത്തിലും അതേസമയം സിറിയയില്‍ നടന്ന ആഭ്യന്തര കലാപത്തില്‍ പ്രസിഡന്റ് ബാഷര്‍ അല്‍ അസദ്ദിന് ശക്തിപകര്‍ന്നതും ക്വാസിം സുലൈമാനി നേതൃത്വം നല്‍കിയ ഖുദ്സ് സേനയാണ്.