വലിയൊരു വിമാനദുരന്തത്തിലേക്ക് നയിച്ചേക്കാന്ന സംഭവമാണ് കഴിഞ്ഞ ദിവസം ഉണ്ടായത്. വലിയൊരു ദുരന്തത്തിലേക്ക് നയിച്ചില്ലെങ്കിലും അഞ്ച് പേരാണ് അപകടത്തിൽ മരിച്ചത്. വിമാനത്തിന് തീപിടിച്ചുണ്ടായ അപകടത്തിൽ നിന്ന് 400ഓളം പേരാണ് രക്ഷപെട്ടത്. കഴിഞ്ഞ ദിവസം ജപ്പാനിലെ ടോക്കിയോയിലെ ഹാനഡ വിമാനത്താവളത്തിലാണ് ഈ സംഭവം. എന്നാൽ തീപിടിച്ച് നീങ്ങികൊണ്ടിരുന്ന വിമാനത്തിൽ നിന്ന് ഇത്രയും പേർ എങ്ങനെ രക്ഷപെട്ടുവെന്നത് അത്ഭുതം തന്നെയാണ്. ഇതിന് പിന്നിലെ ആ കാരണം പുറത്തുവന്നിരിക്കുകയാണ്.

വിമാന കമ്പനി ജീവനക്കാരുടെ നിർദേശം പാലിച്ചതാണ് ഈ അത്ഭുത രക്ഷപെടലിന് പിന്നിൽ. അടിയന്തര ഘട്ടത്തിൽ ലഗേജ് എടുക്കാന്‍ നിൽക്കാതെ വിമാനത്തിന് പുറത്ത് കടക്കാനുള്ള വിമാന കമ്പനി ജീവനക്കാരുടെ നിർദേശം അക്ഷരാർത്ഥത്തിൽ യാത്രക്കാർ പാലിച്ചതാണ് ഇത്രയും പേരുടെ ജീവൻ അപകടത്തിൽപെടാത്തതിന് കാരണം. ഇത്തരം ഘട്ടത്തിൽ ലെഗേജുകൾ എടുക്കാൻ നിന്നാൽ കൂടുതൽ സമയമെടുക്കും അപ്പോഴേക്കും തീആളിപ്പടർന്നിട്ടുണ്ടാകും. എന്നാൽ യാത്രക്കാരുടെ ജിവൻ അപായപ്പെടാതിരിക്കാൻ സയോചിതമായി തന്നെ വിമാനകമ്പനി ജീവനക്കാർ ഇടപെട്ടു.

379 യാത്രക്കാരുണ്ടായിരുന്ന വിമാനം അഗ്നിക്കിരയായപ്പോഴും പുറത്ത് എത്തിക്കാന്‍ വിമാനത്തിലെ ജീവനക്കാർക്ക് സാധിച്ചത് ചെറിയകാര്യമല്ല. യാത്രക്കാരെ സുരക്ഷിതരായി പുറത്തെത്തിച്ചതിൽ ക്യാബിൻ ജീവനക്കാർക്ക് വലിയ രീതിയിലാണ് പ്രശംസ ലഭിച്ചത്. തീവ്ര സമ്മർദ്ദങ്ങൾക്കിടയിലും ക്യാബിന്‍ ജീവനക്കാരുടെ നിർദേശം അക്ഷരാർത്ഥത്തിൽ പാലിച്ച യാത്രക്കാർക്കും രക്ഷാപ്രവർത്തനത്തിൽ പങ്കുണ്ടെന്നാണ് ഒടുവിലെത്തുന്ന റിപ്പോർട്ട് വിശദമാക്കുന്നത്. യാത്രക്കാർ ലഗേജ് എടുക്കാന്‍ ബദ്ധപ്പെടാതെ പുറത്തേക്ക് പോകുന്നതിന്റെ ദൃശ്യങ്ങളും ഇതിനോടകം പുറത്ത് വന്നിട്ടുണ്ട്.

ജനുവരി 2 ചൊവ്വാഴ്ചയായിരുന്നു അപകടമുണ്ടായത്. ജപ്പാന്‍ എയർലൈനിന്റെ 516 വിമാനമാണ് കോസ്റ്റ്ഗാർഡിന്റെ വിമാനവുമായി ലാന്‍ഡ് ചെയ്യുന്നതിനിടെ കൂട്ടിയിടിച്ചത്. വടക്കൻ ജപ്പാനിലെ ഹോക്കയിഡോ ദ്വീപിൽ നിന്ന് 379 പേരുമായി യാത്ര തിരിച്ച ജപ്പാൻ എയര്‍ലൈന്‍സിന്റെ എയര്‍ ബസ് എ 350 വിമാനം ഭൂചലനത്തിൽ ദുരന്തബാധിതരായവർക്ക് ഭക്ഷണവും മരുന്നുമായി എത്തിയ കോസ്റ്റ്ഗാർഡിന്റെ വിമാനവുമായി റൺവേയിൽ വച്ചാണ് കൂട്ടിയിടിച്ചത്. കൂട്ടിയിടിയുടെ ആഘാതത്തിൽ ഇരു വിമാനങ്ങള്‍ക്കും തീപിടിക്കുകയായിരുന്നു.