ചെങ്കടലില്‍ വെച്ച് ഹൂതികള്‍ ആക്രമിച്ച ബ്രിട്ടീഷ് എണ്ണക്കപ്പലിലെ ഇന്ത്യക്കാരെ രക്ഷിക്കാന്‍ ശ്രമം തുടരുന്നു. ഹൂതികള്‍ ലക്ഷ്യമിട്ട  എണ്ണക്കപ്പലായ മാര്‍ലിന്‍ ലുവാണ്ടയില്‍ 22 ഇന്ത്യക്കാരും ഒരു ബംഗ്ലാദേശ് ജീവനക്കാരനും ഉണ്ടെന്ന് നാവികസേന സ്ഥിരീകരിച്ചിട്ടുണ്ട്. ഇന്നലെ യെമനിലെ ഇറാന്‍ പിന്തുണയുള്ള ഹൂതികള്‍ വിക്ഷേപിച്ച മിസൈല്‍ കപ്പലില്‍ പതിക്കുകയായിരുന്നു. ഇതോടെ കപ്പലിന് തീപിടിക്കുകയായിരുന്നു. ഇന്ത്യന്‍ നാവികസേന തീ അണയ്ക്കാനുള്ള ശ്രമത്തില്‍ സജീവമായി ഇടപെടുന്നുണ്ട്. കപ്പലില്‍ നിന്ന് കഴിഞ്ഞ ദിവസം രാത്രി ലഭിച്ച അപായ സന്ദേശത്തിന് പിന്നാലെ തങ്ങളുടെ ഗൈഡഡ് മിസൈല്‍ നശീകരണക്കപ്പലായ ഐഎന്‍എസ് വിശാഖപട്ടണം ഗള്‍ഫ് ഓഫ് ഏദനില്‍ വിന്യസിച്ചതായി നാവികസേന അറിയിച്ചു.

നേരത്തെ ഇസ്രായേല്‍-ഹമാസ് യുദ്ധത്തെത്തുടര്‍ന്ന് മധ്യ, വടക്കന്‍ അറബിക്കടലില്‍ ഇന്ത്യന്‍ നാവികസേന നിരീക്ഷണം കര്‍ശനമാക്കിയിരുന്നു. വ്യാപാര കപ്പലുകള്‍ക്ക് നേരെയുള്ള ആക്രമണങ്ങള്‍ വര്‍ധിക്കുന്ന സാഹചര്യത്തില്‍ സേനാ വിന്യാസം കൂടുതല്‍ വ്യാപകമാക്കി. കഴിഞ്ഞ ഏതാനും ആഴ്ചകളായി ചെങ്കടല്‍, ഏദന്‍ ഉള്‍ക്കടല്‍, മധ്യ-വടക്കന്‍ അറബിക്കടല്‍ എന്നിവിടങ്ങളിലെ അന്താരാഷ്ട്ര കപ്പല്‍പ്പാതകളിലൂടെ സഞ്ചരിച്ച വ്യാപാര കപ്പലുകള്‍ സുരക്ഷാഭീഷണി റിപ്പോര്‍ട്ട് ചെയ്തിരുന്നു. യെമനില്‍ നിന്നുള്ള ഇറാന്‍ പിന്തുണയുള്ള ഹൂതി വിമതരാണ് ഈ ആക്രമണങ്ങള്‍ക്ക് പിന്നില്‍.

'മര്‍ച്ചന്റ് വെസലില്‍ തീയണയ്ക്കാനായി എന്‍ബിസിഡി ടീം ശ്രമിക്കുകയാണ്. എംവിയിലെ ജീവനക്കാരെ സഹായിക്കാന്‍ ഐഎന്‍എസ് വിശാഖപട്ടണം വിന്യസിച്ചിട്ടുണ്ട്,'' നാവികസേന പ്രസ്താവനയില്‍ പറഞ്ഞു.
ട്രേഡിംഗ് സ്ഥാപനമായ ട്രാഫിഗുരയുടെ പേരിലാണ് ഇന്ധന ടാങ്കര്‍ പ്രവര്‍ത്തിപ്പിച്ചത്. ചെങ്കടലിലൂടെ കടന്നുപോകുമ്പോള്‍ ഒരു മിസൈല്‍ മാര്‍ലിന്‍ ലുവാണ്ടയില്‍ പതിച്ചതായി കമ്പനി സ്ഥിരീകരിച്ചു. നേരത്തെ ബ്രിട്ടീഷ് എണ്ണക്കപ്പലിനൊപ്പം, യുഎസ് യുദ്ധക്കപ്പലായ യുഎസ്എസ് കാര്‍ണി എന്ന ഡിസ്ട്രോയറിനെയും ഹൂതി സംഘം ആക്രമിച്ചിരുന്നു. പതിറ്റാണ്ടുകളായി പാശ്ചാത്യ ശക്തികളും മിഡില്‍ ഈസ്റ്റും തമ്മില്‍ കടലില്‍ നടന്ന ഏറ്റവും വലിയ ഏറ്റുമുട്ടലായി ഈ സംഭവം കണക്കാക്കപ്പെടുന്നു.

ഇത് ആദ്യമായല്ല ഹൂതി സംഘം ഇന്ത്യക്കാരുള്ള കപ്പലിന് നേരെ ആക്രമണം നടത്തുന്നത്. 2023 ഡിസംബര്‍ 24 ന്, ചെങ്കടലില്‍ വെച്ച് 25 ഇന്ത്യക്കാരുമായി പോയ ഒരു എണ്ണ ടാങ്കറില്‍ യെമനിലെ ഹൂതി വിമതര്‍ തൊടുത്തുവിട്ട ഡ്രോണ്‍ ഇടിച്ചു. കഴിഞ്ഞ നവംബര്‍ മുതല്‍ എണ്ണക്കപ്പലുകള്‍ക്കുനേരെ ഹൂതി സംഘം ആക്രമണം നടത്തുന്നുണ്ടെന്നും പലസ്തീനിലെ ഇസ്രയേലിന്റെ സൈനിക നടപടികള്‍ മൂലമാണ് തങ്ങള്‍ ഇത് ചെയ്യുന്നതെന്നും അവര്‍ പറഞ്ഞു.

''മാര്‍ഷല്‍ ഐലന്‍ഡ്‌സ് ഫ്ലാഗ് ചെയ്ത എം/വി മാര്‍ലിന്‍ ലുവാണ്ട എന്ന ടാങ്കറിന് ഏദന്‍ ഉള്‍ക്കടലില്‍ ഉണ്ടായ ആക്രമണത്തില്‍ കേടുപാടുകള്‍ സംഭവിച്ചുവെന്ന റിപ്പോര്‍ട്ടുകള്‍ സ്ഥിരീകരിക്കുന്നു. ആളപായമൊന്നും ഉണ്ടായിട്ടില്ലെന്നും സമീപത്തെ സഖ്യസേനയുടെ കപ്പലുകള്‍ സ്ഥലത്തുണ്ടെന്നും റിപ്പോര്‍ട്ടുകള്‍ സൂചിപ്പിക്കുന്നു. വാണിജ്യ ഷിപ്പിംഗിനെതിരായ ഏതെങ്കിലും ആക്രമണങ്ങള്‍ പൂര്‍ണ്ണമായും അസ്വീകാര്യമാണെന്നും യുകെയ്ക്കും ഞങ്ങളുടെ സഖ്യകക്ഷികള്‍ക്കും ഉചിതമായി പ്രതികരിക്കാനുള്ള അവകാശം നിക്ഷിപ്തമാണെന്നും ഞങ്ങള്‍ക്ക് വ്യക്തമായിട്ടുണ്ട്,' ഒരു യുകെ സര്‍ക്കാര്‍ ഉദ്യോഗസ്ഥന്‍ പറഞ്ഞു.