റഷ്യയും ഇക്വഡോറുമായുള്ള ബന്ധം (Relations with Russia and Ecuador) വഷളായ സാഹചര്യത്തിൽ ഇന്ത്യയും റഷ്യയുമായുള്ള ബന്ധം ദൃഢമാകുന്നു. റഷ്യ ഇന്ത്യയിൽ നിന്ന് വൻതോതിൽ വാഴപ്പഴവും പപ്പായയും (Banana and papaya) വാങ്ങാൻ ആരംഭിച്ചുവെന്ന റിപ്പോർട്ടുകളാണ് ഇപ്പോൾ പുറത്തുവരുന്നത്. ഇന്ത്യയിൽ നിന്നുള്ള പപ്പായയുടെയും വാഴപ്പഴത്തിൻ്റെയും ആദ്യ ചരക്ക് ജനുവരിയിലാണ് റഷ്യയിലെത്തിയത്. അതേസമയം, ഫെബ്രുവരി അവസാനത്തോടെ അടുത്ത ഘട്ടം ചരക്ക് എത്തുമെന്നാണ് പ്രതീക്ഷിക്കുന്നത്. റഷ്യയ്ക്ക് ആവശ്യമുള്ള വാഴപ്പഴവും പപ്പായയും നൽകിക്കൊണ്ടിരുന്നത് ഇക്വഡോറായിരുന്നു. എന്നാൽ നിലവിലെ നയതന്ത്ര വിഷയങ്ങൾ കാരണം റഷ്യ ഇക്വഡോറിൽ നിന്ന് വാഴപ്പഴം വാങ്ങുന്നത് നിർത്തുകയായിരുന്നു. റഷ്യ നൽകിയ സൈനിക ഹാർഡ്‌വെയർ അമേരിക്കൻ ഹൈടെക് ആയുധങ്ങളുമായി ഇക്വഡോർ കൈമാറ്റം ചെയ്യാൻ തീരുമാനിച്ചതോടെയാണ് പ്രശ്നങ്ങൾ ആരംഭിച്ചത്.

ഇക്വഡോറിൻ്റെ ഈ നീക്കത്തിൽ റഷ്യ പ്രകോപിതരാകുകയും ഇക്വഡോറിൽ നിന്ന് വാഴപ്പഴം ഇറക്കുമതി ചെയ്യുന്നത് നിർത്തുകയും ചെയ്തു.റഷ്യൻ വിപണിയിലേക്കുള്ള ഇന്ത്യൻ വാഴപ്പഴത്തിൻ്റെ കയറ്റുമതി വരും ദിവസങ്ങളിൽ ഇനിയും വർധിക്കുമെന്ന് റഷ്യൻ കാർഷിക മോണിറ്ററിംഗ് ബോഡി റോസ്സെൽ ഖോസ്നാഡ്‌സോർ പറഞ്ഞു. റഷ്യയിൽ ഇന്ത്യൻ വാഴപ്പഴത്തിന് ഡിമാൻഡ് വർദ്ധിച്ചു വരുന്നതായാണ് റിപ്പോർട്ടുകൾ.വാഴപ്പഴത്തിനും പപ്പായയ്ക്കും പുറമെ പേരക്ക, മാങ്ങ, പൈനാപ്പിൾ എന്നിവയുൾപ്പെടെയുള്ള മറ്റ് പഴങ്ങളും റഷ്യയിലേക്ക് കയറ്റുമതി ചെയ്യാനുള്ള ആഗ്രഹം ഇന്ത്യ പ്രകടിപ്പിച്ചിട്ടുണ്ട്. ഇന്ത്യാ ഗവൺമെൻ്റിൻ്റെ വാണിജ്യ-വ്യവസായ മന്ത്രാലയത്തിൻ്റെ കണക്കനുസരിച്ച്, ലോകത്ത് ഏറ്റവുമധികം വാഴപ്പഴം ഉത്പാദിപ്പിക്കുന്ന രാജ്യമാണ് ഇന്ത്യ.

അതേസമയം ലോകത്തിലെ ഏറ്റവുമധികം വാഴപ്പഴം ഉത്പാദിപ്പിക്കുന്ന രാജ്യമായിട്ടും, ആഗോള വിപണിയിൽ ഇന്ത്യയുടെ വിഹിതം ഒരു ശതമാനം മാത്രമാണ്. അതേസമയം, ആഗോള നേന്ത്രപ്പഴ ഉൽപാദനത്തിൽ ഇന്ത്യയുടെ പങ്ക് ഏകദേശം 26.45 ശതമാനമാണ്, 35.56 ദശലക്ഷം മെട്രിക് ടൺ വാഴപ്പഴം ഇന്ത്യ ഉത്പാദിപ്പിക്കുന്നു. 2022-23 സാമ്പത്തിക വർഷത്തിൽ 176 ദശലക്ഷം യുഎസ് ഡോളറിൻ്റെ വാഴപ്പഴം ഇന്ത്യ കയറ്റുമതി ചെയ്തു.വാഴപ്പഴത്തിൽ പ്രാണികളുടെ സാന്നിധ്യം കണ്ടെത്തിയതിനെ തുടർന്ന് ഇക്വഡോറിലെ അഞ്ച് കമ്പനികളിൽ നിന്നുള്ള വാഴപ്പഴം ഇറക്കുമതി ചെയ്യുന്നത് നിർത്തിയതായി റോസൽ ഖോസ്നാഡ്‌സോറിനെ ഉദ്ധരിച്ച് റിപ്പോർട്ടിൽ വ്യക്തമാക്കുന്നു. അതിനു പിന്നാലെ റഷ്യയിലേക്ക് കയറ്റുമതി ചെയ്യുന്ന വാഴപ്പഴത്തിൽ പ്രാണികളുടെ എണ്ണം വളരെ കുറവാണെന്ന് ഇക്വഡോറിലെ ഭക്ഷ്യ സുരക്ഷാ അതോറിറ്റി പറഞ്ഞു. തങ്ങൾ ഉത്പാദിപ്പിക്കുന്ന വാഴപ്പഴം സുരക്ഷിതമാണെന്ന് റഷ്യൻ അവകാശവാദങ്ങൾ നിരാകരിച്ച് ഇക്വഡോർ പ്രതികരിച്ചു. അതേസമയം ഇന്ത്യയിൽ നിന്ന് വാഴപ്പഴം ഇറക്കുമതി ചെയ്യാനുള്ള തീരുമാനത്തെ ഇക്വഡോറും യുഎസുമായുള്ള

നയതന്ത്ര ബന്ധത്തിൻ്റെ അടിസ്ഥാനത്തിലാണെന്ന് റഷ്യൻ ഉദ്യോഗസ്ഥർ തുറന്നു പറഞ്ഞിട്ടില്ല. എന്നാൽ തങ്ങൾക്ക് ദേഷ്യമോ വിയോജിപ്പോ ഉള്ള രാജ്യങ്ങളിൽ നിന്നുള്ള ഭക്ഷ്യ വസ്തുക്കൾ നിയന്ത്രിക്കുന്ന നയം റഷ്യ വച്ചുപുലർത്തുന്നുണ്ട്. ഈ നൊയപ്രകാരമാണ് റഷ്യ തീരുമാനമെടുത്തതെന്നാണ് കരുതപ്പെടുന്നത്. റഷ്യയുടെ സൈനിക ഹാർഡ്‌വെയർ അമേരിക്കയിലേക്ക് അയയ്ക്കാനുള്ള ഇക്വഡോറിൻ്റെ തീരുമാനത്തെ റഷ്യ അപലപിച്ചിരുന്നു. റഷ്യ- യുക്രെെൻ യുദ്ധത്തിൽ യുക്രെെനുള്ള സഹായമായാണ് റഷ്യ ഈ കരാറിനെ കാണുന്നത്.

ഇന്ത്യയിൽ നിന്നുള്ള വാഴപ്പഴവും പപ്പായയും ഇറക്കുമതി ചെയ്യുന്നത് ഒരു വലിയ ജിയോപൊളിറ്റിക്കൽ ഗെയിമിൻ്റെ ഭാഗമാണ്. ഉക്രെയ്നുമായുള്ള യുദ്ധം കാരണം, പാശ്ചാത്യ രാജ്യങ്ങൾ ഏർപ്പെടുത്തിയ സാമ്പത്തിക ഉപരോധം റഷ്യ നേരിടുന്നുണ്ട്. അതുകൊണ്ട് തന്നെ പാശ്ചാത്യ രാജ്യങ്ങൾക്കപ്പുറത്തേക്ക് വ്യാപാര ബന്ധം വിപുലപ്പെടുത്താനാണ് റഷ്യ ശ്രമിക്കുന്നത്. റഷ്യ-യുക്രെയ്ൻ യുദ്ധം തുടങ്ങിയതോടെ ഇന്ത്യയും റഷ്യയും തമ്മിലുള്ള അടുപ്പം വർധിച്ചു. പാശ്ചാത്യ രാജ്യങ്ങളുടെ സ്വാധീനം കുറയ്ക്കാൻ റഷ്യ പാശ്ചാത്യേതര രാജ്യങ്ങളിലേക്ക് തിരിഞ്ഞുവെന്നു പറയുന്നതിലും അതിശയക്തിയില്ല.