ഇസ്രായേല്‍ ബോംബാക്രമണത്തില്‍, രണ്ട് ബന്ദികള്‍കൂടി കൊല്ലപ്പെട്ടതായി അറിയിച്ച് ഹമാസിന്റെ അല്‍ ഖസ്സാം ബ്രിഗേഡ്. എട്ടുപേര്‍ക്ക് പരിക്കേല്‍ക്കുകയും ചെയ്തു. ശരിയായ ചികിത്സ നല്‍കാന്‍ കഴിയാത്തതിനാല്‍ ഓരോ ദിവസവും ബന്ദികളുടെ ജീവന്‍ അപകടത്തിലാവുകയാണെന്ന് ഹമാസ് വ്യക്തമാക്കി. പരിക്കേറ്റ ബന്ദികളുടെ ജീവന്‍ നഷ്ടമായാല്‍, മരുന്നും അവശ്യവസ്തുക്കളും തടയുന്ന ഇസ്രായേല്‍ സൈന്യം മാത്രമാണ് ബന്ദികളുടെ മരണത്തിന് ഉത്തരവാദികളെന്ന് മുതിര്‍ന്ന ഹമാസ് നേതാവ് പറഞ്ഞു.

അതിനിടെ, ജനസാന്ദ്രതയേറിയ ഗാസ അതിര്‍ത്തി പട്ടണമായ റഫയില്‍ സിവിലിയന്മാരെ സംരക്ഷിക്കാനുള്ള ''വിശ്വസനീയ'' പദ്ധതിയില്ലാതെ ഇസ്രായേല്‍ സൈനിക നടപടിയുമായി മുന്നോട്ട് പോകരുതെന്ന് യുഎസ് പ്രസിഡന്റ് ജോ ബൈഡന്‍, പ്രധാനമന്ത്രി ബെഞ്ചമിന്‍ നെതന്യാഹുവിന് മുന്നറിയിപ്പ് നല്‍കി. ഇസ്രായേല്‍ സൈന്യത്തെ റഫയിലേക്ക് അയച്ചാല്‍, 1978 ലെ ഇസ്രായേലുമായുള്ള സമാധാന ഉടമ്പടി താല്‍ക്കാലികമായി നിര്‍ത്തിവയ്ക്കുമെന്ന് ഈജിപ്ത് ഭീഷണിപ്പെടുത്തി. അവിടെ യുദ്ധം ഉപരോധിച്ച പ്രദേശത്തിന്റെ പ്രധാന സഹായ വിതരണ മാര്‍ഗം അടച്ചുപൂട്ടാന്‍ ഈജിപ്ത് നിര്‍ബന്ധിതമാകുമെന്ന് ഈജിപ്ഷ്യന്‍ ഉദ്യോഗസ്ഥരും, പാശ്ചാത്യ നയതന്ത്രജ്ഞനും പ്രതികരിച്ചു.

പലസ്തീന്‍ തീവ്രവാദ സംഘടനയായ ഹമാസിനെതിരായ, നാല് മാസത്തെ യുദ്ധത്തില്‍ വിജയിക്കാന്‍ റഫയിലേക്ക് സൈന്യത്തെ അയയ്ക്കേണ്ടത് ആവശ്യമാണെന്ന് നെതന്യാഹു പറഞ്ഞതിന് പിന്നാലെയാണ് അരനൂറ്റാണ്ടോളം പ്രാദേശിക സ്ഥിരതയുടെ ആണിക്കല്ലായ, ക്യാമ്പ് ഡേവിഡ് ഉടമ്പടി താല്‍ക്കാലികമായി നിര്‍ത്തിവയ്ക്കുമെന്ന ഭീഷണി ഉയര്‍ന്നത്. ഹമാസിന് ഇപ്പോഴും അവിടെ നാല് ബറ്റാലിയനുകളുണ്ടെന്ന് അദ്ദേഹം ഉറപ്പിച്ചു പറഞ്ഞു.

അഭയാര്‍ഥികള്‍ തിങ്ങിപ്പാര്‍ക്കുന്ന റഫയില്‍ ഇസ്രായേല്‍ കരയുദ്ധത്തിന് ഇറങ്ങുന്നത് ബന്ദി കൈമാറ്റ ചര്‍ച്ച തകര്‍ക്കുമെന്ന് ഹമാസും മുന്നറിയിപ്പ് നല്‍കി. റഫയില്‍ ശനിയാഴ്ച രാത്രി ഇസ്രായേല്‍ നടത്തിയ ബോംബാക്രമണത്തില്‍ 40 ഫലസ്തീനികള്‍ കൊല്ലപ്പെടുകയും നിരവധി പേര്‍ക്ക് പരിക്കേല്‍ക്കുകയും ചെയ്തു.

ഗാസയിലാകെ 24 മണിക്കൂറിനിടെ 112 ഫലസ്തീനികളാണ് കൊല്ലപ്പെട്ടത്. ഒക്ടോബര്‍ ഏഴിന് ശേഷം ഗാസയില്‍ കൊല്ലപ്പെട്ട ഫലസ്തീനികള്‍ 28,176 ആയി. 67,784 പേര്‍ക്ക് പരിക്കേറ്റു. റഫയില്‍ ആക്രമണം നടത്തിയാല്‍ പറയാന്‍ കഴിയാത്ത മാനുഷിക ദുരന്തമാണ് സംഭവിക്കുകയെന്ന് യൂറോപ്യന്‍ യൂനിയന്‍ വിദേശനയ മേധാവി ജോസഫ് ബോല്‍ മുന്നറിയിപ്പ് നല്‍കി.