ന്യൂസീലന്ഡിലെ തായ്ഹാരുരു ബീച്ച് പ്രദേശത്ത് റോക്ക് ഫിഷിങ് എന്നറിയപ്പെടുന്ന സാഹസിക മീന്പിടിത്തത്തിനിടെ കടലില് കാണാതായ യുവാക്കളിലൊരാളുടെ മൃതദേഹം കണ്ടെത്തി.... മറ്റൊരാള്ക്കായി തെരച്ചില് നടത്തുന്നു
ന്യൂസീലന്ഡിലെ തായ്ഹാരുരു ബീച്ച് പ്രദേശത്ത് റോക്ക് ഫിഷിങ് എന്നറിയപ്പെടുന്ന സാഹസിക മീന്പിടിത്തത്തിനിടെ കടലില് കാണാതായ യുവാക്കളിലൊരാളുടെ മൃതദേഹം കണ്ടെത്തി. ആലപ്പുഴ നെടുമുടി ആറ്റുവാത്തല ശശി നിവാസില് ശശിധരന്നായരുടെയും ശ്യാമളകുമാരിയുടെയും മകന് ശരത്കുമാറി(37)ന്റെ മൃതദേഹമാണ് വെള്ളിയാഴ്ച പുലര്ച്ചെ നാലരയോടെ കണ്ടെത്തിയത്. പോസ്റ്റ്മോര്ട്ടത്തിനുശേഷം മൃതദേഹം നാട്ടിലെത്തിക്കാനുള്ള ശ്രമമാരംഭിച്ചു.
ശരത്കുമാറിനെയും മൂവാറ്റുപുഴ-തൊടുപുഴ റോഡില് കെ.എം.പി. തടിമില്ലിനുസമീപം ചെമ്പകത്തിനാല് വീട്ടില് ഫെര്സില് ബാബു(37)വിനെയുമാണ് കാണാതായത്.
വ്യാഴാഴ്ച വൈകുന്നേരം മുതല് ഇവരെ കാണാതായെന്നാണ് ന്യൂസീലന്ഡ് എംബസിയില്നിന്നു ബന്ധുക്കള്ക്കു ലഭിച്ചവിവരം. ന്യൂസീലന്ഡിന്റെ വടക്കന് പ്രദേശമായ നോര്ത്ത് ലാന്ഡിലെ തായ്ഹാരുരു ബീച്ചിനടുത്ത് ദി ഗ്യാപ്പ് എന്നറിയപ്പെടുന്ന പാറക്കെട്ടുകള്ക്കു സമീപം പോലീസും സുരക്ഷാസംഘവും വ്യാഴാഴ്ച തിരച്ചില് നടത്തിയെങ്കിലും രാത്രിയായതിനാല് കണ്ടെത്താന് കഴിഞ്ഞില്ല. വെള്ളിയാഴ്ച അന്വേഷണം പുനരാരംഭിച്ചപ്പോഴാണ് ശരത്കുമാറിന്റെ മൃതദേഹം കണ്ടെത്താനായത്.
ഇവരുടെ വാഹനം, വസ്ത്രം, പാദരക്ഷകള് എന്നിവ കണ്ടെത്തിയിട്ടുണ്ടായിരുന്നു. ന്യൂസീലന്ഡില് ജോലിചെയ്യുന്ന സുഹൃത്തുക്കളായ ഇരുവരും കൂടി അപകട സാധ്യതയുള്ള ബീച്ചില് മീന്പിടിക്കാന് പോയതാണ്.
വഴുവഴുപ്പുള്ള പാറപ്പുറത്തുനിന്ന് കടലിലേക്ക് വീണു പോയിരിക്കാമെന്നാണ് നിഗമനം. ആദ്യം വീണുപോയ ആളെ രക്ഷിക്കാനായി അടുത്തയാള് ഷൂസ് അഴിച്ചുെവച്ച് വെള്ളത്തിലിറങ്ങിയതാകുമോ എന്ന് സംശയവുമുണ്ട്.
അതേസമയം പാറയിടുക്കുകളിലെ അപകടങ്ങളും കടല്ജീവികളും ഈ വിനോദത്തെ അപകടകരമാക്കുന്നു. ഓസ്ട്രേലിയയിലും ന്യൂസീലന്ഡിലും ഇതൊരു ജനപ്രിയ വിനോദമാണ്.
"
https://www.facebook.com/Malayalivartha