ലോകപ്രശസ്ത കുട്ടിപ്പാട്ടുകളുടെ ഗാനരചയിതാവും സംഗീത സംവിധായകനുമായ റിച്ചാര്‍ഡ് ഷെര്‍മന്‍(95) അന്തരിച്ചു. 'ജംഗിള്‍ ബുക്ക്', 'മേരി പോപ്പിന്‍സ്', 'ചിട്ടി ചിട്ടി ബാങ് ബാങ്' തുടങ്ങി നിരവധി ചിത്രങ്ങള്‍ക്ക് വേണ്ടി പാട്ടെഴുതിയിട്ടുണ്ട്.

ജ്യേഷ്ഠന്‍ റോബര്‍ട്ടുമായിച്ചേര്‍ന്നായിരുന്നു സംഗീതവും എഴുത്തും സംഗീതവുമായി ലോകത്തിന് നിരവധി പാട്ടുകളാണ് സമ്മാനിച്ചത്.
ബെവേര്‍ലി ഹില്‍സിലായിരുന്നു റിച്ചഡ് ഷെര്‍മന്റെ അന്ത്യമെന്ന് ഡിസ്‌നി കമ്പനി .

റോബര്‍ട്ട് 2012-ലേ ഈ ലോകത്തോടു വിടപറഞ്ഞിരുന്നു. 1960 മുതല്‍ 1973വരെ ഡിസ്‌നിയുടെ സംഗീതവിഭാഗത്തിലെ ജീവനക്കാരായിരുന്നു ഇരുവരും. ആ സമയത്ത് 27 സിനിമകള്‍ക്കും അത്രത്തോളം ടെലിവിഷന്‍ ചിത്രങ്ങള്‍ക്കുമായി ഇരുനൂറിലേറെ പാട്ടുകളാണ് റിച്ചാര്‍ഡും റോബര്‍ട്ടും ചേര്‍ന്നൊരുക്കിയത്. 1964ല്‍ ഇറങ്ങിയ 'മേരി പോപ്പിന്‍സി'ന്റെ പശ്ചാത്തലസംഗീതവും അതിലെ 'ചിം ചിം ചെറീ'യെന്ന ഗാനവും അവരെ ഓസ്‌കറിന് അര്‍ഹരാക്കി. റോബര്‍ട്ട് എഴുതുന്ന പാട്ടുകള്‍ക്ക് റിച്ചാര്‍ഡ് ഈണമിടുകയായിരുന്നു പതിവ്. ചിലപ്പോള്‍ റിച്ചാഡുതന്നെ പാട്ടെഴുതി.


അതേസമയം പാട്ടെഴുതാനും വില്‍ക്കാനും പ്രയാസമാണെന്നുപറഞ്ഞ അച്ഛന്റെ വാക്കുകള്‍ സഹോദരങ്ങള്‍ വെല്ലുവിളിയായി ഏറ്റെടുക്കുകയായിരുന്നു. ഓസ്‌കറും ഗ്രാമിയും നേടി. 2016-ല്‍ 'ജംഗിള്‍ ബുക്ക് ' വീണ്ടും സിനിമയായെത്തിയപ്പോള്‍ റിച്ചാര്‍ഡ് അതിനുവേണ്ടി പുതിയ വരികളെഴുതി. 2018-ല്‍ 'ക്രിസ്റ്റഫര്‍ റോബി'നിലെ പാട്ടുകള്‍ക്ക് ഈണമിടുകയും ചെയ്തു..