ലോസ് ഏഞ്ചല്‍സില്‍ കാട്ടുതീ: സ്ഥിതി രൂക്ഷമായതോടെ നഗരത്തില്‍ അടിയന്തരാവസ്ഥ പ്രഖ്യാപിച്ചു
അമേരിക്കയിലെ ലോസ് ഏഞ്ചല്‍സിലെ വനത്തിലുണ്ടായ കാട്ടുതീ രൂക്ഷമാകുന്നു. കാട്ടുതീ ജനവാസ മേഖലകളെയും ബാധിച്ചു. മണിക്കൂറില്‍ 70 മൈല്‍ വേഗതയിലാണ് കാറ്റ് വീശുന്നത്. സ്ഥിതി രൂക്ഷമായതോടെ നഗരത്തില്‍ അടിയന്തരാവസ്ഥ പ്രഖ്യാപിച്ചിരിക്കുകയാണ്.വനങ്ങള്‍ മുതല്‍ ഉയര്‍ന്ന കെട്ടിടങ്ങളും ആഡംബര വീടുകളും വരെ കാട്ടുതീയില്‍ എരിഞ്ഞു. ഹോളിവുഡ് ഹില്‍സും ആശങ്കയിലാണ്. ഇതുവരെ അഞ്ച് പേര്‍ മരിക്കുകയും ആയിരത്തിലധികം കെട്ടിടങ്ങള്‍ നശിക്കുകയും ചെയ്തിട്ടുണ്ട്.
കാലിഫോര്‍ണിയയിലെ ലോസ് ഏഞ്ചല്‍സിലെ പല വനങ്ങളിലും തീ പടര്‍ന്നു. പസഫിക് പാലിസേഡ്‌സ് വനത്തിലാണ് ആദ്യം തീ ആരംഭിച്ചത്, ഇത് ക്രമേണ ഈറ്റണ്‍, ഹാര്‍സ്റ്റ് വനങ്ങളെ വിഴുങ്ങി. ഇപ്പോള്‍ ലിഡിയ, വുഡ്ലി, സണ്‍സെറ്റ് തുടങ്ങിയ ചുറ്റുമുള്ള വനങ്ങളിലേക്കും തീ പടര്‍ന്നു. പിന്നാലെ ഇത് ജനവാസ മേഖലകളിലേക്ക് എത്തി.
ഹോളിവുഡ് നഗരമായ ലോസ് ഏഞ്ചല്‍സില്‍ തീപിടുത്തം വന്‍ നാശമാണ് വിതയ്ക്കുന്നത്. 70,000 ഏക്കറിലധികം വരുന്ന പ്രദേശം അഗ്‌നിക്കിരയായി. ലോസ് ഏഞ്ചല്‍സ് ഭരണകൂടം നഗരത്തില്‍ മുഴുവന്‍ അടിയന്തരാവസ്ഥ പ്രഖ്യാപിച്ചു. ഏകദേശം 10 ദശലക്ഷം ആളുകള്‍ താമസിക്കുന്ന അമേരിക്കയിലെ ഏറ്റവും ജനസംഖ്യയുള്ള കൗണ്ടിയാണിത്.
തീപിടിത്തം ജനങ്ങളുടെ ജീവനും സ്വത്തിനും നാശം വരുത്തുക മാത്രമല്ല, നിരവധി മൃഗങ്ങളുടെയും ജീവനെടുത്തു. ജീവന്‍ രക്ഷിക്കാന്‍ വാഹനങ്ങള്‍ റോഡില്‍ ഉപേക്ഷിച്ച് കാല്‍നടയായി ഓടുന്ന കാഴ്ചയാണ് പലയിടത്തും കാണാന്‍ കഴിയുന്നത്.
അമേരിക്കയിലെ വനമേഖലയില്‍ ഉണ്ടായ തീപിടുത്തം ലോകത്തെ മുഴുവന്‍ ഞെട്ടിച്ചിരിക്കുകയാണ്. അഗ്‌നിശമന സേനാംഗങ്ങളും റെസ്‌ക്യൂ ടീമുകളും തീ അണക്കുന്നതില്‍ ഏര്‍പ്പെട്ടിരിക്കുകയാണ്. ഹെലികോപ്റ്ററുകളും വിമാനങ്ങളും ഉപയോഗിച്ച് തീ നിയന്ത്രണവിധേയമാക്കാനുള്ള ശ്രമങ്ങള്‍ നടക്കുന്നുണ്ടെങ്കിലും അണയ്ക്കുന്നതിനു പകരം തീ അതിവേഗം പടരുകയാണ്.
കാറ്റ് വീശുന്നതിനാല്‍ തീ നിയന്ത്രണവിധേയമാക്കാന്‍ ബുദ്ധിമുട്ടുന്നു. കാറ്റിന്റെ ദിശ മാറുന്നതിനാല്‍ തീ തുടര്‍ച്ചയായി വിവിധ സ്ഥലങ്ങളിലേക്ക് പടരുകയാണ്.രക്ഷാപ്രവര്‍ത്തനവും പുനരധിവാസ പ്രവര്‍ത്തനങ്ങളും ദ്രുതഗതിയില്‍ പുരോഗമിക്കുകയാണ്. ഇതുവരെ ആയിരക്കണക്കിന് ആളുകളെ സുരക്ഷിത സ്ഥാനങ്ങളിലേക്ക് മാറ്റി. സ്‌കൂളുകളും കമ്മ്യൂണിറ്റി സെന്ററുകളും മറ്റ് സുരക്ഷിത സ്ഥലങ്ങളും എമര്‍ജന്‍സി ഷെല്‍ട്ടറുകളായി ഒരുക്കിയിട്ടുണ്ട്.
https://www.facebook.com/Malayalivartha
