ഇറാന്റെ ഊര്‍ജ്ജ മേഖലയിലെ ഏറ്റവും തന്ത്രപ്രധാനമായ സ്ഥലങ്ങളില്‍ ഒന്നാണ് ഖാര്‍ഗ് ദ്വീപ്. 1950കളില്‍ നിര്‍മ്മിച്ചതും ഇറാന്‍ഇറാഖ് യുദ്ധത്തില്‍ വലിയ നാശനഷ്ടങ്ങള്‍ സംഭവിച്ചതിന് ശേഷം പുനര്‍നിര്‍മ്മിച്ചതുമായ ഈ ടെര്‍മിനലിന് ലോകത്തിലെ ഏറ്റവും വലിയ എണ്ണ ടാങ്കറുകളെയും ഉള്‍ക്കൊള്ളാന്‍ കഴിയും. ഒരേ സമയം 89 സൂപ്പര്‍ ടാങ്കറുകള്‍ക്ക് എണ്ണ നിറയ്ക്കാന്‍ ശേഷിയുള്ള ബെര്‍ത്തുകളും ഏകദേശം 28 ദശലക്ഷം ബാരല്‍ സംഭരണ ശേഷിയുമുണ്ട്.

ഇറാന്റെ അസംസ്‌കൃത എണ്ണ കയറ്റുമതിയുടെ 90% വും ഖാര്‍ഗ് വഴിയാണ് നടക്കുന്നത്. ഇത് രാജ്യത്തിന്റെ പ്രധാന എണ്ണപ്പാടങ്ങളില്‍ നിന്നുള്ള പൈപ്പ് ലൈന്‍ ശൃംഖലയുമായി ബന്ധിപ്പിച്ചിരിക്കുന്നു. ഉപരോധങ്ങള്‍ കാരണം ബുദ്ധിമുട്ടുന്ന ഇറാന്റെ സമ്പദ്വ്യവസ്ഥയ്ക്ക് ഖാര്‍ഗ് വലിയ വരുമാന സ്രോതസ്സാണ്. ഇത് ഇറാന്റെ ദേശീയ ബഡ്ജറ്റിനും സഹായം നല്‍കുന്നു. ലോകത്തിലെ ഏറ്റവും പ്രധാനപ്പെട്ട എണ്ണ ചരക്ക് കടന്നുപോകുന്ന ഹോര്‍മുസ് കടലിടുക്കിനോട് ചേര്‍ന്നുള്ള ഇതിന്റെ സ്ഥാനം ആഗോള എണ്ണക്കടത്തില്‍ ഇറാനു സ്വാധീനം നല്‍കുന്നു.