കഞ്ചാവിന്റെ ഉപയോഗം വീണ്ടും നിയന്ത്രിക്കാനൊരുങ്ങി തായ്‌ലന്‍ഡ്. വിനോദ ഉപയോഗത്തിനായി കഞ്ചാവ് വില്‍ക്കുന്നത് നിരോധിച്ചു. ചില്ലറ വില്‍പനക്ക് ഡോക്ടറുടെ കുറിപ്പടി നിര്‍ബന്ധമാക്കുകയും ചെയ്തുകൊണ്ട് തായ്ലന്‍ഡ് ആരോഗ്യ മന്ത്രാലയം ഉത്തരവ് പുറപ്പെടുവിച്ചു. 2022-ല്‍ തായ്‌ലന്‍ഡ് കഞ്ചാവ് വില്‍പ്പന കുറ്റകരമല്ലാതാക്കി മാറ്റിയിരുന്നു. ഇത്തരത്തില്‍ കഞ്ചാവ് ഉപയോഗം നിയമപരമാക്കിയ ഏഷ്യയിലെ ആദ്യത്തെ രാജ്യമായി തായ്ലന്‍ഡ് മാറി.

ഈ നീക്കത്തിലൂടെ തായ്ലന്‍ഡിന്റെ ടൂറിസവും കൃഷിയും വീണ്ടും ഉത്തേജിപ്പിക്കപ്പെടുകയും കഞ്ചാവ് വില്‍പ്പനയ്ക്കടക്കം ആയിരക്കണക്കിന് കടകള്‍ തുറക്കുകയും ചെയ്തു. എന്നാല്‍ കൃത്യമായ നിയന്ത്രണങ്ങള്‍ ഇല്ലാഞ്ഞതു മൂലം കഞ്ചാവ് കുട്ടികള്‍ക്കടക്കം ലഭ്യമാക്കുകയും വലിയ തോതില്‍ ആസക്തി ഉണ്ടാക്കുകയും ചെയ്തുവെന്ന ആരോപണം ഉയര്‍ന്നു. ഇതോടെ പൊതുജനങ്ങളില്‍ നിന്ന് വലിയ എതിര്‍പ്പാണ് ഭരണകൂടം നേരിട്ടത്.

ഇതോടെയാണ് വീണ്ടും നിയന്ത്രണങ്ങള്‍ ഏര്‍പ്പെടുത്തിയത്. കുറിപ്പടിയില്ലാതെ കുറിപ്പടിയില്ലാതെ കടകളില്‍ നിന്ന് ഉപഭോക്താക്കള്‍ക്ക് കഞ്ചാവ് വില്‍ക്കുന്നത് നിരോധിച്ചുകൊണ്ട് ആരോഗ്യമന്ത്രി സോംസാക് തെപ്സുട്ടിന്‍ തിങ്കളാഴ്ച ഉത്തരവില്‍ ഒപ്പുവച്ചു.

കഞ്ചാവിനെ വീണ്ടും മയക്കുമരുന്നിന്റെ പട്ടികയില്‍പെടുത്താനും ഉല്‍പ്പാദനം നിയന്ത്രണവിധേയമാക്കാനും ഒരുങ്ങുന്നതായും സൂചനയുണ്ട്.