ഓപ്പറേഷന്‍ സിന്ദൂരിന് പിന്നാലെ വെടിനിര്‍ത്തല്‍ ആവശ്യപ്പെട്ടത് പാകിസ്ഥാനാണെന്ന് വ്യോമസേനാ മേധാവി എ പി സിംഗ്. ഓപ്പറേഷന്‍ സിന്ദൂര്‍ നിരപരാധികളെ കൊന്ന തീവ്രവാദികള്‍ക്ക് ഒരു പാഠമാണ്. അമേരിക്കന്‍ ഇടപെടലാണ് വെടിനിര്‍ത്തലിന് കാരണമായതെന്ന പ്രചരണവും അദ്ദേഹം ഇതോടെ തള്ളി. കൂടാതെ പകിസ്ഥാന്റെ യുഎസ് നിര്‍മ്മിത എഫ് 16, ചൈനീസ് ജെ 17 എന്നീ വിമാനങ്ങള്‍ ഇന്ത്യ വെടിവച്ചിട്ടതായും എ പി സിംഗ് വ്യക്തമാക്കി.

ഇന്ന് നടത്തിയ വാര്‍ത്താസമ്മേളനത്തിലായിരുന്നു വെളിപ്പെടുത്തല്‍. ഓപ്പറേഷന്‍ സിന്ദൂറിലൂടെ ഇന്ത്യന്‍ സൈന്യത്തിന്റെ ശക്തിയും കൃത്യതയും ലോകം കണ്ടെന്നും അദ്ദേഹം കൂട്ടിച്ചേര്‍ത്തു. പാകിസ്ഥാന് 10 വിമാനങ്ങള്‍ നഷ്ടമായെന്നും വ്യോമസേനാ മേധാവി വെളിപ്പെടുത്തി. പാകിസ്ഥാന്‍, ഇന്ത്യന്‍ ജെറ്റുകള്‍ നശിപ്പിച്ചുവെന്ന് അവകാശവാദത്തെയും അദ്ദേഹം നിഷേധച്ചു.

'ഓപ്പറേഷന്‍ സിന്ദൂര്‍ നിരപരാധികളെ കൊന്ന തീവ്രവാദികള്‍ക്ക് ഒരു പാഠമാണ്. 300 കിലോമീറ്ററിലധികം ലക്ഷ്യങ്ങള്‍ ഞങ്ങള്‍ ആക്രമിച്ചു. തുടര്‍ന്ന് പാകിസ്ഥാനാണ് വെടിനിര്‍ത്തല്‍ ആവശ്യപ്പെട്ടത്. 100 മണിക്കൂറുകളോളം നീണ്ടുനിന്ന പോരാട്ടത്തില്‍ പാകിസ്ഥാന്റെ നിരവധി മിസൈലുകളും ഡ്രോണുകളും ഇന്ത്യ തകര്‍ത്തു. ഇന്ത്യയുടെ യുദ്ധതന്ത്രങ്ങള്‍ മാറും. ഇതുവരെ കണ്ട യുദ്ധങ്ങള്‍ ആകില്ല വരുംകാലത്ത്. ഭാവിക്കായി ഇപ്പോഴെ തയ്യാറായിരിക്കണം. 21ാം നൂറ്റാണ്ടാണ്. ഇനി സൈനികരുടെ എണ്ണമോ ആയുധശേഖരത്തിന്റെ വലുപ്പമോ ഇനി മതിയാകില്ല. സൈബര്‍ യുദ്ധം, കൃത്രിമബുദ്ധി, ഉപഗ്രഹാധിഷ്ഠിത നിരീക്ഷണം എന്നിവ ഭാവിയിലെ യുദ്ധങ്ങളെ രൂപപ്പെടുത്തുന്നു' വ്യോമസേനാ മേധാവി വ്യക്തമാക്കി.