ലോകം ഒരു വലിയ യുദ്ധത്തിന്റെ മുനമ്പിലാണോ? പശ്ചിമേഷ്യയിൽ വീണ്ടും പീരങ്കികൾ മുഴങ്ങാൻ പോകുകയാണോ? അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഏറ്റവും പുതിയ പ്രഖ്യാപനം ലോകരാഷ്ട്രങ്ങളെ ഞെട്ടിച്ചിരിക്കുകയാണ്. അടുത്ത പത്ത് ദിവസത്തിനുള്ളിൽ ഇറാനുമായുള്ള തർക്കത്തിൽ ഒരു അന്തിമ തീരുമാനം ഉണ്ടാകുമെന്ന് ട്രംപ് പ്രഖ്യാപിച്ചു കഴിഞ്ഞു. ഒന്നെങ്കിൽ ഒരു കരാർ, അല്ലെങ്കിൽ യുദ്ധം. വാഷിംഗ്ടൺ ഡിസിയിൽ നടന്ന 'ബോർഡ് ഓഫ് പീസ്' (Board of Peace) ഉദ്ഘാടന യോഗത്തിലാണ് ട്രംപ് ഈ നിർണ്ണായക വെളിപ്പെടുത്തൽ നടത്തിയത്.

ഇറാന്റെ ആണവ പദ്ധതിയെക്കുറിച്ച് സംസാരിക്കവേ, "നമ്മൾ ഒരു അർത്ഥവത്തായ കരാർ ഉണ്ടാക്കണം, അല്ലെങ്കിൽ മോശം കാര്യങ്ങൾ സംഭവിക്കും" എന്ന് ട്രംപ് മുന്നറിയിപ്പ് നൽകി. യുഎസ് ഭരണകൂടം ഇതിനോടകം തന്നെ തങ്ങളുടെ നിലപാട് വ്യക്തമാക്കിയിട്ടുണ്ട്. ഇറാന്റെ ആണവ പരീക്ഷണങ്ങൾ പാടെ നിർത്തലാക്കാതെ മറ്റൊരു വിട്ടുവീഴ്ചയ്ക്കും ട്രംപ് തയ്യാറല്ല. വെറും പത്ത് ദിവസം! ഈ സമയപരിധിക്കുള്ളിൽ ഇറാൻ എന്ത് തീരുമാനമെടുക്കും എന്നതിനെ ആശ്രയിച്ചിരിക്കും ലോകത്തിന്റെ സമാധാനം.