ഇസ്രയേല്-ഇറാന് യുദ്ധം കടുക്കുന്നു: മിനാബിലുള്ള പ്രൈമറി സ്കൂളിന് നേരെയുണ്ടായ ആക്രമണം
പശ്ചിമേഷ്യയില് യുദ്ധം ആരംഭിച്ച് മണിക്കൂറുകള് പിന്നിടുമ്പോള് സാധാരണക്കാരായ ജനങ്ങള്ക്കിടയില് വന് നാശനഷ്ടങ്ങളാണ് റിപ്പോര്ട്ട് ചെയ്യപ്പെടുന്നത്. തെക്കന് ഇറാനിലെ മിനാബിലുള്ള പ്രൈമറി സ്കൂളിന് നേരെയുണ്ടായ ആക്രമണത്തില് അഞ്ച് പെണ്കുട്ടികള് കൊല്ലപ്പെട്ടതായാണ് വിവരം. ലോകരാജ്യങ്ങളെ ഒന്നടങ്കം ആശങ്കയിലാഴ്ത്തിക്കൊണ്ട് ഇരുപക്ഷവും ശക്തമായ പ്രത്യാക്രമണങ്ങളാണ് നടത്തുന്നത്.
സൈനിക കേന്ദ്രങ്ങളും ആത്മീയ നേതാക്കളുടെ ഓഫീസുകളും ലക്ഷ്യം വച്ചാണ് ആക്രമണം നടത്തുന്നതെന്ന് ഇസ്രയേല് അവകാശപ്പെടുമ്പോഴും, ജനവാസ കേന്ദ്രങ്ങളിലും സ്കൂളുകളിലും മിസൈലുകള് പതിക്കുന്നതായാണ് ഇറാന്റെ ഔദ്യോഗിക പ്രതികരണം. മിനാബിലെ സ്കൂളിലുണ്ടായ ദുരന്തം ഇതിന്റെ തെളിവായി ഇറാന് ചൂണ്ടിക്കാട്ടുന്നു.
അമേരിക്കയുടെ സൈനിക താവളങ്ങള് ലക്ഷ്യമിട്ട് യുഎഇയുടെ വിവിധ ഭാഗങ്ങളില് മിസൈല് ആക്രമണങ്ങള് ഉണ്ടായതായി റിപ്പോര്ട്ടുകളുണ്ട്. മിക്ക മിസൈലുകളെയും പ്രതിരോധ സംവിധാനങ്ങള് തകര്ത്തുവെങ്കിലും, അബുദാബിയില് ഒരു ഏഷ്യന് വംശജന് കൊല്ലപ്പെട്ടതായി അന്താരാഷ്ട്ര മാദ്ധ്യമങ്ങള് റിപ്പോര്ട്ട് ചെയ്യുന്നു. ഇറാഖ് തലസ്ഥാനമായ ബാഗ്ദാദിലും സംഘര്ഷത്തിന്റെ അലയൊലികള് ദൃശ്യമാണ്. ഇറാന് അനുകൂല സായുധ സംഘത്തിലെ രണ്ട് പേര് ഇവിടെ കൊല്ലപ്പെട്ടതായും വിവരമുണ്ട്.
അതേസമയം, സംഘാര്ഷാവസ്ഥയെ തുടര്ന്ന് കേരളത്തില് നിന്നും ഗള്ഫ് മേഖലയിലേക്കുള്ള എല്ലാ വിമാന സര്വീസുകളും റദ്ദാക്കി.വ്യോമപാത താല്ക്കാലികമായി അടച്ചിടുന്നതുകൊണ്ടും ഒന്നിലധികം അന്താരാഷ്ട്ര വ്യോമാതിര്ത്തികളില് നിയന്ത്രണം ഏര്പ്പെടുത്തിയതിനാലുമാണ് നിലവില് വിമാന സര്വീസുകള് റദ്ദാക്കിയിരിക്കുന്നത്.
https://www.facebook.com/Malayalivartha
