ഇറാൻ ഇസ്രയേലിന് നേരെ ക്ലസ്റ്റർ ബോംബുകൾവഹിക്കുന്ന ബാലിസ്റ്റിക് മിസൈലുകൾ വിക്ഷേപിച്ചതായി ഇസ്രായേൽ സൈനിക വൃത്തങ്ങൾ ആരോപിച്ചു.സമീപകാലത്തെ യുദ്ധചരിത്രത്തിൽ ഇതാദ്യമായാണ് ഇറാൻ ഇത്തരം വിനാശകാരിയായ ആയുധങ്ങൾ ഉപയോഗിക്കുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്. ഇറാൻ ഈ കഴിവ് എങ്ങനെ വികസിപ്പിച്ചെടുത്തു എന്ന ചോദ്യം ഇസ്രയേലിനും യുഎസിനും മുന്നിലുണ്ട്. റഷ്യയിൽ നിന്നോ ചൈനയിൽ നിന്നോ സൈനിക സാങ്കേതിക കൈമാറ്റം നടന്നിരിക്കാമെന്നാണ് ഇസ്രയേൽ സംശയിക്കുന്നത്. സാധാരണ മിസൈലുകളേക്കാൾ പതിന്മട്ടി വിനാശകാരിയായ ഈ ആയുധം ഇറാൻ പ്രയോഗിച്ചത് അന്താരാഷ്ട്ര തലത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്.

ഇസ്രായേലിന്റെ ജനവാസ മേഖലകളെ ലക്ഷ്യമിട്ട് ഇറാൻ ക്ലസ്റ്റർ യുദ്ധമുനകൾ (Cluster Warheads) വഹിക്കുന്ന മിസൈലുകൾ വിക്ഷേപിച്ചതായി ഇസ്രായേൽ പ്രതിരോധ സേന വ്യക്തമാക്കി. ഏകദേശം 7 കിലോമീറ്റർ ഉയരത്തിൽ വെച്ച് മിസൈലിന്റെ മുൻഭാഗം പിളരുകയും, അതിൽ നിന്ന് 20 ഓളം ചെറിയ ബോംബുകൾ എട്ട് കിലോമീറ്റർ ചുറ്റളവിൽ ചിതറി വീഴുകയും ചെയ്യുന്ന രീതിയാണിത്.

ഒരു നിശ്ചിത പോയിന്റിൽ മാത്രം സ്ഫോടനം നടത്തുന്നതിന് പകരം വലിയൊരു പ്രദേശം മുഴുവൻ തകർക്കാൻ ഈ ക്ലസ്റ്റർ ബോംബുകൾക്ക് സാധിക്കും. ഇത് സാധാരണക്കാരായ ജനങ്ങൾക്കിടയിൽ വലിയ തോതിലുള്ള നാശനഷ്ടങ്ങൾക്ക് കാരണമാകുന്നു.