പശ്ചിമ ജര്‍മ്മനിയിലെ നോര്‍ത്ത് റൈന്‍ വെസ്റ്റ്ഫാലിയ എന്ന പ്രവിശ്യയിലെ ഡോയിഷ്ബര്‍ഗില്‍ നിന്നും ഇബേ എന്ന സൈറ്റിലേയ്ക്ക് അപ്‌ലോഡ് ചെയ്ത ഒരു പരസ്യം ഇന്റര്‍നെറ്റ് ഉപഭോക്താക്കളെ സ്തബ്ധരാക്കി.

ഒരു മാസം പ്രായമുള്ള ഒരു പെണ്‍കുഞ്ഞ് വില്പനയ്ക്കുണ്ടെന്നും 5000 യൂറോ വില നല്‍കിയാല്‍ കുഞ്ഞിനെ ലഭിക്കുമെന്നും കൊടുത്തിട്ടുള്ള പരസ്യത്തില്‍ ആ പെണ്‍കുഞ്ഞിന്റെ വിവിധ തരത്തിലുള്ള ചിത്രങ്ങളും കൊടുത്തിട്ടുണ്ടായിരുന്നു. മരിയ എന്നാണ് കുഞ്ഞിന്റെ പേരു കൊടുത്തിരുന്നത്.

ഇത് ഇബേ സൈറ്റില്‍ അപ്‌ലോഡ് ആയി 30 മിനിറ്റിനുള്ളില്‍ തന്നെ സാമൂഹ്യ മാധ്യമങ്ങളില്‍ അത് വൈറലാകുകയും എല്ലാവരും അതിനെ അപലപിക്കുകയും ചെയ്തു. ചിലര്‍ ഇ ബേ സൈറ്റ് അധികൃതരെ വിവരമറിയിച്ചു. വിവരം അവരുടെ ശ്രദ്ധയില്‍പെട്ടയുടനെ തന്നെ പ്രസ്തുത പരസ്യം അവര്‍ സൈറ്റില്‍ നിന്നും നീക്കം ചെയ്യുകയും പോലീസില്‍ വിവരം അറിയിക്കുകയും ചെയ്തുവെന്ന് ഇബേയുടെ ഔദ്യോഗിക വക്താവായ പിയറി സുബോയസ് അറിയിച്ചത്.

ഇത്തരം കാര്യങ്ങളില്‍ ബന്ധപ്പെട്ട അധികാരികള്‍ക്ക് ആവശ്യമായ എല്ലാ വിവരങ്ങളും നല്‍കി സഹായിക്കുക എന്നതാണ് തങ്ങളുടെ നയമെന്ന് ഇബേ വക്താവ് വ്യക്തമാക്കി. വാസ്തവമായും വില്പനക്കാരന്‍ ആ കുഞ്ഞിനെ കച്ചവടമാക്കാന്‍ ഉദ്ദേശിച്ചിരുന്നോ അതോ ചീറ്റിപ്പോയ ഒരു തമാശയാണോ അത് എന്ന് ഉറപ്പിക്കാറായിട്ടില്ലെന്നാണ് അധികൃതര്‍ പറയുന്നത്. ഇത്തരം സാഹചര്യങ്ങള്‍ നേരിടുന്നതിന് പരിശീലനം നല്‍കി നിലനിര്‍ത്തിയിട്ടുള്ള ഒരു ടീം തന്നെ ഇബേ സൈറ്റുമായി ബന്ധപ്പെട്ട് ഉണ്ടെന്നും അവര്‍ വളരെ പെട്ടെന്നു തന്നെ പ്രതികരിക്കുമെന്നും സൈറ്റ് അറിയിച്ചു.