ലോകത്ത് ഏറ്റവുമധികം കാലം അധികാരത്തിലിരുന്ന രാജാവ് എന്ന പദവിയുമായി ഭൂമിബോല്‍ അതുല്യതേജ് (88) നാടുനീങ്ങി. എഴുപതു വര്‍ഷം നീണ്ട ഭരണത്തിനൊടുവിലാണ് തായ്‌ലണ്ടിലെ കരുത്തനായ ഭരണാധികാരി വിടവാങ്ങുന്നത്. ദീര്‍ഘകാലമായി രോഗാവസ്ഥയിലായിരുന്ന അദ്ദേഹത്തിന്റെ അന്ത്യം ഇന്നലെ വൈകിട്ട് സിരിരാജ് ആശുപത്രിയിലായിരുന്നു. 64 വയസുകാരനായ മകന്‍ മഹാവജ്ര ലോങ്‌കോണ്‍ അടുത്ത രാജാവായി ചുമതലയേല്‍ക്കും. സിരികിത് കിതിയകാര ആണു ഭാര്യ. പെണ്‍മക്കളായ മഹാചാക്രി സിരിതോണ്‍, ഉബോല്‍രത്‌ന രാജകന്യ, ചുലബോണ്‍ വലൈലക് എന്നിവരും മരണസമയത്ത് ഒപ്പമുണ്ടായിരുന്നു.
രാജ്യത്ത് ഒരു വര്‍ഷത്തെ ദുഃഖാചരണം പ്രഖ്യാപിച്ചു. രാജാവിന്റെ മരണം അഖണ്ഡത നിലനിര്‍ത്തുന്നതില്‍ ഭരണകൂടത്തിന് വെല്ലുവിളിയാവുമെന്നാണ് വിലയിരുത്തല്‍. തായ്‌ലന്‍ഡിലെ ഛാക്രി രാജവംശത്തിലെ ഒന്‍പതാമത്തെ രാജാവായിരുന്നു ഭൂമിബോല്‍ അതുല്യതേജ്. ദൈവതുല്യനായിട്ടാണു തായ് ജനത രാജാവിനെ കണക്കാക്കിയിരുന്നത്. 1946ല്‍ സഹോദരന്റെ മരണത്തെ തുടര്‍ന്നാണ് അദ്ദേഹം രാജാവായി അധികാരമേറ്റത്. ഇദ്ദേഹത്തിന്റെ ഭരണകാലയളവില്‍ തായ്‌ലന്‍ഡില്‍ 30 പ്രധാനമന്ത്രിമാര്‍ അധികാരത്തില്‍ വന്നുപോയി. മുന്‍ഗാമികളെ അപേക്ഷിച്ച് ജനക്ഷേമ കാര്യങ്ങളില്‍ സദാ ശ്രദ്ധ പുലര്‍ത്തിയിരുന്ന അദ്ദേഹം 1972ല്‍ മകനെ പിന്‍ഗാമിയായി പ്രഖ്യാപിച്ചിരുന്നു.
1927ല്‍ ജനിച്ച അദ്ദേഹം പട്ടാള അട്ടിമറികളും രാഷ്ട്രീയ അസ്ഥിരതയും മൂലം വിഘടിച്ചുനിന്ന രാജ്യത്ത് ഐക്യത്തിന്റെ പ്രതീകമായിരുന്നു കിങ് രാമ ഒമ്പതാമന്‍ എന്ന അതുല്യതേജ്. ദാരിദ്ര്യത്തില്‍ കഴിഞ്ഞിരുന്ന തായ്‌ലന്‍ഡിനെ മേഖലയിലെ പ്രധാന സാമ്പത്തിക ശക്തിയാക്കി മാറ്റിയതില്‍ അതുല്യതേജിന്റെ നയങ്ങള്‍ സുപ്രധാന പങ്കുവഹിച്ചു. രാഷ്ട്രീയമായി ചിതറിക്കിടന്ന രാജ്യത്തെ ഒന്നിപ്പിക്കുന്നതില്‍ വലിയ പങ്കുവഹിച്ച ഭരണാധികാരിയായാണ് അദുല്യദജ് വിലയിരുത്തപ്പെടുന്നത്. ദീര്‍ഘകാലമായി അസുഖബാധിതനായിരുന്ന ഇദ്ദേഹം ആശുപത്രിയിലാണ് മരിച്ചതെന്ന് കൊട്ടാരവൃത്തങ്ങള്‍ പറഞ്ഞു. മക്കളടക്കമുള്ള കുടുംബാംഗങ്ങളെല്ലാം അന്ത്യസമയത്ത് ആശുപത്രിയിലുണ്ടായിരുന്നു
വര്‍ഷങ്ങളായി ആരോഗ്യപരമായ പ്രശ്‌നങ്ങള്‍ നേരിട്ടുകൊണ്ടിരുന്ന അദ്ദേഹം പൊതുപരിപാടികളില്‍ പങ്കെടുക്കുന്നതു കുറവായിരുന്നു. 2014 പട്ടാള അട്ടിമറിയെത്തുടര്‍ന്ന് രാജ്യം നിലവില്‍ പട്ടാളഭരണത്തിലാണ്. രാജാവിന്റെ ആരോഗ്യനില ആശങ്കാജനകമാണെന്ന് ഞായറാഴ്ച കൊട്ടാരം അറിയിച്ചിരുന്നു. രോഗതുരനായ രാജാവിന് ആരോഗ്യം വീണ്ടുകിട്ടുന്നതിനായി റോസ് നിറത്തിലുള്ള വസ്ത്രങ്ങള്‍ ധരിച്ച് ജനം തെരുവിലിറങ്ങിയിരുന്നു. രാജാവിന്റെ ആരോഗ്യത്തിനുവേണ്ടി പ്രാര്‍ത്ഥിച്ചുകൊണ്ട് നൂറുകണക്കിന് ആളുകളാണ് അദ്ദേഹം ചികിത്സയില്‍ കഴിഞ്ഞിരുന്ന ആശുപത്രിക്കു വെളിയില്‍ തടിച്ചുകൂടിയത്.
രാജാവിന്റെ നിര്യാണത്തെത്തുടര്‍ന്ന് പാര്‍ലന്റെിന്റെ പ്രത്യേക സമ്മേളനം കൂടി. അടുത്ത രാജാവകാശിയായ വജിറലോങ്‌കോണി(63)ന് ഭൂമിബോലിന്റേതുപോലെ ജനപ്രിയത ഇല്ലാത്തത് രാജഭരണം അനിശ്ചിതത്വത്തിലാക്കിയിട്ടുണ്ട്. നിലവിലെ കലുഷിതമായ രാഷ്ട്രീയ പരിതസ്ഥിതിയില്‍ രാജ്യഭരണത്തുടര്‍ച്ച സര്‍ക്കാരിന് തലവേദനയാണെന്ന് ബി.ബി.സി. റിപ്പോര്‍ട്ട് ചെയ്യുന്നു.