സാംസംഗിന്റെ കഷ്ടകാലം തുടരുന്നു. ബാറ്ററി ചൂടായി പൊട്ടിത്തെറിക്കുകയും അതുവഴി നിരവധി പേര്‍ക്ക് പരിക്കേല്‍ക്കുകയും ചെയ്ത സാഹചര്യത്തില്‍ സാംസംഗ് നോട്ട് 7 ഫോണുകള്‍ക്ക് വിമാനങ്ങളില്‍, അമേരിക്ക നിരോധനം ഏര്‍പ്പെടുത്തിയതാണ് ഏറ്റവും പുതിയ തിരിച്ചടി. പ്രശ്‌നങ്ങള്‍ ഉണ്ടായിരുന്നതിനാല്‍ ഫോണുകള്‍ തിരിച്ചുവിളിച്ച് പുതിയ സെറ്റുകള്‍ നിര്‍മാതാക്കള്‍ നല്‍കിയിരുന്നു. എന്നാല്‍ മാറി നല്‍കിയ സെറ്റുകളിലും പ്രശ്‌നം ആവര്‍ത്തിച്ചതോടെയാണ് ഇത്തരമൊരു തീരുമാനത്തിലെത്തിയതെന്ന് യുഎസ് ഗതാഗത സെക്രട്ടറി ആന്റണി ഫോക്‌സ് പറഞ്ഞു. വിമാനങ്ങളില്‍ നോട്ട് 7 ഫോണുകള്‍ക്ക് സമ്പൂര്‍ണ നിരോധനമാണ് ഏര്‍പ്പെടുത്തിയിരിക്കുന്നത്.
യുഎസില്‍ നിന്ന് പുറപ്പെടുന്നതോ, യുഎസിലേക്ക് വരുന്നതോ ആയ ഒരു വിമാനങ്ങളിലും ഈ ഫോണ്‍ ഉപയോഗിക്കാന്‍ അനുവദിക്കില്ലെന്നും അത്തരത്തില്‍ എന്തെങ്കിലും സംഭവം ശ്രദ്ധയില്‍പ്പെട്ടാല്‍ അവരെ വിമാനത്തിനുള്ളിലേക്ക് കയറാന്‍ അനുവദിക്കില്ലെന്നും ഫോക്‌സ് വ്യക്തമാക്കി. യാത്രക്കാര്‍ക്ക് ചിലപ്പോള്‍ ബുദ്ധിമുട്ടുണ്ടാക്കിയേക്കാവുന്ന തീരുമാനമാണിതെന്ന് ബോധ്യമുണ്ടെന്നും പക്ഷേ ഇപ്പോള്‍ അധികൃതര്‍ പ്രാധാന്യം കല്പിക്കുന്നത് യാത്രക്കാരുടെ ജീവനാണെന്നും അദ്ദേഹം പറഞ്ഞു.
നേരത്തെ, പ്രശ്‌നം രൂക്ഷമായതോടെ മുഴുവന്‍ സാംസംഗ് നോട്ട് 7 ഫോണുകളും തിരിച്ചു വിളിക്കാന്‍ നിര്‍മാതാക്കള്‍ തീരുമാനിച്ചിരുന്നു. 35,510 കോടി രൂപയുടെ നഷ്ടമാണ് ഇതിലൂടെ കമ്പനിക്കുണ്ടാവുകയെന്നാമ് കണക്കുകൂട്ടല്‍. ചൈനയില്‍ നിന്ന് രണ്ടു ലക്ഷവും ദക്ഷിണകൊറിയയില്‍ നിന്ന് അഞ്ചു ലക്ഷവും നോട്ട് 7 ഫോണുകളാണ് സാംസംഗ് തിരിച്ചു വിളിച്ചത്.