യുഎസ് പ്രസിഡന്റ് തിരഞ്ഞെടുപ്പില്‍ തലയിടാന്‍ റഷ്യ ശ്രമിക്കുന്നുവെന്ന രാജ്യത്തിന്റെ ഔദ്യോഗിക നിലപാട് സ്വീകരിക്കാന്‍ ട്രംപ് വിസമ്മതിച്ചതാണു ഹിലറിയുടെ ആരോപണത്തിനു പിന്നില്‍. യുഎസ് സൈന്യത്തെയും രഹസ്യാന്വേഷണ വിദഗ്ധരെയും പരിഗണിക്കാതെ റഷ്യന്‍ പ്രസിഡന്റ് പുടിനോടാണ് ട്രംപിനു പ്രിയമെന്ന് ഹിലറി സ്ഥാനാര്ഥികളുമായുള്ള സംവാദത്തിനിടയില്‍ ആരോപിച്ചു.റഷ്യന്‍ പ്രസിഡന്റ് വ്‌ളാഡിമിര്‍ പുടിന്റെ കളിപ്പാവയാണ് യുഎസ് പ്രസിഡന്റ് തിരഞ്ഞെടുപ്പിനുള്ള റിപ്പബ്ലിക്കന്‍ പാര്‍ട്ടി സ്ഥാനാര്‍ഥി ഡോണള്‍ഡ് ട്രംപെന്ന് ഡെമോക്രാറ്റിക് സ്ഥാനാര്‍ഥി ഹിലറി ക്ലിന്റന്‍. സ്ത്രീകളോടു മോശമായി പെരുമാറുന്ന ട്രംപ് പ്രസിഡന്റ് പദവിക്കു യോഗ്യനല്ലെന്നും ഹിലറി ക്ലിന്റന്‍ പറഞ്ഞു.

അതേസമയം, പുടിനുമായി സൗഹൃദമില്ലെന്നു പറഞ്ഞ ട്രംപ്, ഇസ്‌ലാമിക തീവ്രവാദം രാജ്യത്ത് അനുവദിക്കില്ലെന്നും വ്യക്തമാക്കി. യുഎസ് പ്രസിഡന്റ് തിരഞ്ഞെടുപ്പിലെ അവസാന സ്ഥാനാര്‍ഥി സംവാദത്തിലാണ് ഇരുവരുടെയും ആരോപണപ്രത്യാരോപണങ്ങള്‍. അതേസമയം, തനിക്കെതിരെയുള്ള ആരോപണങ്ങള്‍ കെട്ടിച്ചമച്ചതാണെന്നും ഇക്കാര്യത്തില്‍ തന്റെ ഭാര്യയോടുപോലും മാപ്പു പറയേണ്ടി വന്നിട്ടില്ലെന്നും ട്രംപ് പറഞ്ഞു. ഹിലറി പ്രസിഡന്റ് ആയാല്‍ യുഎസിന്റെ ഭാവി കുഴപ്പത്തിലാകുമെന്നാണു ട്രംപിന്റെ നിലപാട്. കുടിയേറ്റത്തെ പിന്തുണയ്ക്കില്ലെന്ന നിലപാട് അദ്ദേഹം ആവര്‍ത്തിച്ചു. എന്നാല്‍ കുടിയേറുന്നവരെ നിയമപരമായി അംഗീകരിക്കുന്നതു സാമ്പത്തിക മേഖലയെ ശക്തിപ്പെടുത്തുമെന്ന നിലപാടാണ് ഹിലറിക്ക്. യുഎസിന്റെ സാമ്പത്തിക സ്ഥിതി, സുപ്രീം കോടതി, വിദേശകാര്യം തുടങ്ങിയ വിഷയങ്ങള്‍ ഈ സംവാദത്തില്‍ ചര്‍ച്ചയായി.

അതേസമയം, തിരഞ്ഞെടുപ്പു വിധി സ്വീകരിക്കുമോ എന്ന ചോദ്യത്തിന്റെ വ്യക്തമായ ഉത്തരം നല്‍കാന്‍ ട്രംപ് വിസമ്മതിച്ചു. അതു സമയമാകുമ്പോള്‍ വ്യക്തമാക്കാമെന്നാണു ട്രംപിന്റെ നിലപാട്. എന്നാല്‍ 240 വര്‍ഷത്തെ പാരമ്പര്യമുള്ള ജനാധിപത്യത്തെ കുറച്ചുകാണിക്കുന്ന നിലപാടാണു ട്രംപിന്റേതെന്ന് ഹിലറി തിരിച്ചടിച്ചു. സ്വതന്ത്രവും പക്ഷപാതരഹിതവുമായ തിരഞ്ഞെടുപ്പാണ് ഇവിടെ നടക്കാറുള്ളതെന്നും ജനഹിതം നമ്മള്‍ അംഗീകരിക്കാറുള്ളതാണെന്നും ഹിലറി മറുപടി പറഞ്ഞു. അന്തിമജനവിധിക്കു മൂന്നാഴ്ചമാത്രം ശേഷിക്കെ മുന്‍തൂക്കം നിലനിര്‍ത്താന്‍ ഹിലറിയും പ്രതിച്ഛായ വീണ്ടെടുക്കാന്‍ ട്രംപും കിണഞ്ഞു പരിശ്രമിക്കുന്നതിനിടെയാണ് മൂന്നാം സംവാദം വന്നത്. നവംബര്‍ എട്ടിനാണ് തിരഞ്ഞെടുപ്പ്.