ട്രംപിനെതിരെ സെര്വര് ആരോപണം; റഷ്യന് ബാങ്കുമായുള്ള വിനിമയത്തിന് ട്രംപ് ടവറില് രഹസ്യ സെര്വര്
യുഎസ് പ്രസിഡന്റ് തിരഞ്ഞെടുപ്പിന് ദിവസങ്ങള് മാത്രം ശേഷിക്കേ റിപ്പബ്ലിക്കന് സ്ഥാനാര്ത്ഥി ഡൊണാള്ഡ് ട്രംപിനെതിരെ രഹസ്യ സെര്വര് ആരോപണം. റഷ്യയിലെ ഏറ്റവും വലിയ സ്വകാര്യ വാണിജ്യ ബാങ്കായ ആല്ഫ ബാങ്കുമായുള്ള ഗൂഢവിനിമയങ്ങള്ക്കുവേണ്ടി ട്രംപ് ടവറില് രഹസ്യ സെര്വര് സ്ഥാപിച്ചിട്ടുണ്ടെന്ന് യുഎസ് മാഗസിന് 'സ്ലേറ്റ്' റിപ്പോര്ട്ട് ചെയ്തത്.
ഇമെയില് വിവാദത്തിലകപ്പെട്ടിരിക്കുന്ന ഡെമോക്രാറ്റിക് സ്ഥാനാര്ഥി ഹിലരി ക്ലിന്റനു പിടിവള്ളിയായിരിക്കുകയാണ് ട്രംപിനെതിരെയുള്ള ആരോപണം. റഷ്യയുമായുള്ള ബന്ധങ്ങള് സംബന്ധിച്ച ചോദ്യങ്ങള്ക്കു ട്രംപ് മറുപടി പറയേണ്ട സമയമാണിതെന്നു ഹിലരി ട്വീറ്റ് ചെയ്തു.
റഷ്യന് ഭരണകൂടം അഞ്ചുവര്ഷമായി ട്രംപിനെ പിന്തുണയ്ക്കുകയും സഹായിക്കുകയും ചെയ്യുകയാണെന്നും പടിഞ്ഞാറന് സഖ്യത്തില് വിള്ളലുണ്ടാക്കാനുള്ള പുടിന്റെ തന്ത്രമാണിതെന്നും എഫ്ബിഐ റിപ്പോര്ട്ട് ഉദ്ധരിച്ചു യുഎസ് മാഗസിന് 'മദര് ജോണ്സും' റിപ്പോര്ട്ട് ചെയ്തു.
1990 കളില് ട്രംപ് ലക്ഷക്കണക്കിനു ഡോളറിന്റെ നികുതി വെട്ടിപ്പു നടത്തിയതായി ആരോപിച്ചു ദ് ന്യൂയോര്ക്ക് ടൈംസും രംഗത്തെത്തി. യുഎസ് പ്രസിഡന്റ് തിരഞ്ഞെടുപ്പു പ്രചാരണത്തിന്റെ തുടക്കം മുതല് ട്രംപിന്റെ റഷ്യന് ബന്ധം ചര്ച്ചാവിഷയമാണ്. പുടിനെ പരസ്യമായി പ്രശംസിക്കുന്ന ട്രംപിന്റെ ബിസിനസ് സാമ്രാജ്യത്തിന്റെ മുഖ്യ സാമ്പത്തിക സ്രോതസ്സുകള് റഷ്യന് ബാങ്കുകളാണ്.
എന്നാല്, ഇമെയില് സെര്വര് വഴി ട്രംപ് ഓര്ഗനൈസേഷന് വിനിമയങ്ങള് സ്വീകരിക്കുകയോ അയയ്ക്കുകയോ ചെയ്യാറില്ലെന്നു ട്രംപ് പ്രചാരണ വിഭാഗം അറിയിച്ചു.
https://www.facebook.com/Malayalivartha
