ദുബായ് കേന്ദ്രീകരിച്ച് പ്രവര്‍ത്തിക്കുന്ന മയക്കുമരുന്ന് വ്യാപാരിയായ സുഭാഷ് ദൂധാനിയുടെ ബന്ധുവായ രവി ദൂധാനി എന്നയാളുടെ ഉടമസ്ഥതയിലുള്ള ഫാക്ടറിയിലാണ് നാര്‍ക്കോട്ടിക്‌സ് ഡിപ്പാര്‍ട്‌മെന്റ്, ബിഎസ്എഫ്, ഡയറക്ടറേറ്റ് ഓഫ് റവന്യൂ ഇന്റലിജന്‍സ് എന്നിവര്‍ സംയുക്തമായായി റെയ്ഡ് നടത്തിയത്. ലോകത്തിലെ തന്നെ ഏറ്റവും വലിയ മയക്കുമരുന്ന് വേട്ടകളില്‍ ഒന്നാണ് ഇന്ന് രാജസ്ഥാനില്‍ നടന്നതെന്ന് സെന്‍ട്രല്‍ ബോര്‍ഡ് ഓഫ് എക്‌സൈസ് ആന്‍ഡ് കസ്റ്റംസ് ചെയര്‍മാന്‍ നജീബ് ഷാ പറഞ്ഞു. മുംബൈ വിമാനത്താവളത്തില്‍നിന്നും ഇന്ന് രാവിലെയാണ് സുഭാഷ് ദൂധാനിയെ പൊലീസ് അറസ്റ്റ് ചെയ്തത്.

രാജസ്ഥാനിലെ ഉദയ്പൂരില്‍ മരുന്നു ഫാക്ടറി കേന്ദ്രീകരിച്ച് കസ്റ്റംസ് നടത്തിയ റെയ്ഡില്‍ 5,000 കോടിയിലേറെ രൂപ വിലമതിക്കുന്ന മയക്കുമരുന്നുകള്‍ പിടിച്ചെടുത്തു. 23.5 മെട്രിക് ടണ്‍ മാന്‍ഡ്രാക്‌സ് ഗുളികകളാണ് റെയ്ഡില്‍ പിടിച്ചെടുത്തത്. രാജ്യാന്തര മാര്‍ക്കറ്റില്‍ കിലോയ്ക്ക് 20 ലക്ഷത്തിലധികം രൂപ വിലമതിക്കുന്ന മരുന്നാണിത്. ഉദയ്പൂരിലെയും രാജ്‌സാമന്‍ഡിലെയും മരുന്ന് ഗോഡൗണുകളിലും റെയ്ഡ് നടത്തി മയക്കുമരുന്നിന്റെ വന്‍ശേഖരം നേരത്തെ പിടികൂടിയിരുന്നു. ഇതിന് പിന്നാലെയാണ് മരുന്നുകമ്പനിയുടെ പ്രധാന ഫാക്ടറിയിലും റെയ്ഡ് നടത്തിയത്. വെള്ളിയാഴ്ച ആരംഭിച്ച റെയ്ഡിനൊടുവില്‍ അറസ്റ്റു ചെയ്യുകയായിരുന്നു.
വലിയൊരു മയക്കുമരുന്ന് ശൃംഖലയുടെ സഹായത്തോടെയായിരുന്നു ഇവരുടെ പ്രവര്‍ത്തനമെന്നാണ് സൂചന. യൂറോപ്പ്, യുഎസ്, ദക്ഷിണാഫ്രിക്ക എന്നിവിടങ്ങള്‍ കേന്ദ്രീകരിച്ചാണ് ഇവയുടെ വില്‍പന. തീര്‍ത്തും ചെറിയ മുടക്കുമുതലില്‍ ഇന്ത്യയില്‍ നിര്‍മിക്കുന്ന ഈ ഗുളികകള്‍,കോടിക്കണക്കിനു വിലയ്ക്കാണ് വിദേശ രാജ്യങ്ങളില്‍ വിറ്റു പോകുന്നത്.

വന്‍തോതില്‍ മയക്കുമരുന്ന നിര്‍മാണം നടക്കുന്നതായി വിവരം ലഭിച്ചതിനെ തുടര്‍ന്നാണ് ഡയറക്ടറേറ്റ് ഓഫ് റവന്യൂ ഇന്റലിജന്‍സ് ഉദയ്പൂര്‍ ജില്ലയിലെ കാലാദ്വാസിലുള്ള ഫാക്ടറിയില്‍ റെയ്ഡ് നടത്തിയത്. തുടര്‍ന്ന് ഉടമയായ രവി ദൂധാനിയെ അറസ്റ്റ് ചെയ്ത് നടത്തിയ ചോദ്യം ചെയ്യലില്‍ മയക്കുമരുന്ന് സൂക്ഷിച്ചിരിക്കുന്ന ഗോഡൗണുകളെക്കുറിച്ച് സൂചന ലഭിച്ചു. തുടര്‍ന്ന് ഉദയ്പൂരിലെയും രാജ്‌സാമന്‍ഡിലെയും ഗോഡൗണുകളില്‍ റെയ്ഡ് നടത്തി കോടിക്കണക്കിന് രൂപയുടെ മയക്കുമരുന്ന് ഗുളികകള്‍ പിടിച്ചെടുക്കുകയായിരുന്നു.

എന്നാല്‍ ഫാക്ടറി നടത്തിപ്പുകാരനായ പ്രതിയെ മാത്രമാണ് അറസ്റ്റു ചെയ്തത്. വാന്‍ സ്രാവുകളടങ്ങുന്ന മയക്കുമരുന്ന് ശ്രംഖലയുടെ കണ്ണികള്‍ മാത്രമാണിവര്‍. വിദേശ രാജ്യങ്ങളില്‍ വിഹരിക്കുന്ന ഇവരെ പിടികൂടുന്നതിന് കഴിയുമോ എന്നു കണ്ടറിയണം. സാധാരണ വിദേശ രാജ്യങ്ങളിലേക്ക് കയറ്റി അയക്കുന്ന മയക്കു മരുന്നുകള്‍ പിടി കൂടുന്നതു വഴി ഇടനിലക്കാര്‍ മാത്രമാണ് അറസ്റ്റു ചെയ്യപ്പെടുന്നത്. തുടരന്വേഷണം നടന്നാലും മാഫിയ തലവന്മാരെ കണ്ടെത്തുന്നതിന് ഇതുവരെ സാധിച്ചിട്ടില്ല എന്നതും ഒരു വാസ്തവമാണ്.