മലേഷ്യന്‍ വിമാനം ഇന്നും ഉത്തരം കിട്ടാത്ത ചോദ്യം ചില നിഗമനങ്ങള്‍ മാത്രം. 2014ല്‍ യാത്രികരുമായി കാണാതായ മലേഷ്യന്‍ വിമാനം ങഒ370 അവസാന നിമിഷങ്ങളില്‍ ആരും നിയന്ത്രിച്ചിരുന്നില്ലെന്ന് പുതിയ നിഗമനം. ഇന്ത്യന്‍ മഹാസമുദ്രത്തിലേക്ക് കൂപ്പുകുത്തിയ വിമാനം പൈലറ്റിന്റെ നിയന്ത്രണത്തിലായിരുന്നില്ല. ഇന്ധനം തീര്‍ന്നാണ് സമുദ്രത്തിലേക്ക് വിമാനം പതിച്ചതെന്നും അപകടത്തെ കുറിച്ച് അന്വേഷണ സംഘം വ്യക്തമാക്കി. ഇന്ത്യന്‍ മഹാസമുദ്രത്തിന്റെ വിവിധ ഭാഗങ്ങളില്‍ നിന്ന് കണ്ടെടുത്ത വിമാന അവശിഷ്ടങ്ങളില്‍ നടത്തിയ പഠനങ്ങള്‍ക്കും പരിശോധനകള്‍ക്കും ഒടുവിലാണ് നിഗമനത്തിലേക്ക് എത്തിയത്.
വിമാനത്തിനായി തെരച്ചില്‍ നടത്തുന്ന സംഘം ഓസ്‌ട്രേലിയയില്‍ ചേര്‍ന്ന യോഗത്തിലാണ് നിര്‍ണായക നിഗമനത്തിലെത്തിയത്. മലേഷ്യന്‍ വിമാനത്തിന്റെ വളരെ കുറച്ച് അവശിഷ്ടം മാത്രമാണ് ഇന്ത്യന്‍ മഹാസമുദ്രത്തിലെ വ്യാപക തെരച്ചിലിനൊടുവില്‍ കണ്ടെത്താനായത്. സമുദ്രത്തിലെ തെരച്ചില്‍ ഇനി കൂടുതല്‍ ഫലമുണ്ടാകാന്‍ ഇടയില്ലെന്നാണ് സംഘം കരുതുന്നത്.
സാങ്കേതിക സംഘത്തിന്റെ റിപ്പോര്‍ട്ടും അന്വേഷണ സംഘത്തിന്റെ അനുമാനവുമായി ചേര്‍ന്നു പോകുന്നതാണ്. മലേഷ്യ എയര്‍ലൈനിന്റെ ബോയിങ് 777 വിമാനം ഇന്ധനം തീര്‍ന്ന് അതിവേഗത്തില്‍ സമുദ്രത്തിലേക്ക് ഇടിച്ചിറങ്ങുകയായിരുന്നു. അപകട സമയത്ത് ആരും തന്നെ വിമാനം നിയന്ത്രിച്ചിരുന്നില്ല. പശ്ചിമ ഓസ്‌ട്രേലിയക്ക് സമീപം ഇന്ത്യന്‍ മഹാസമുദ്രത്തിന്റെ ഒറ്റപ്പെട്ട മേഖലയിലെവിടെയോ ഇടിച്ചിറങ്ങുകയായിരുന്ന വിമാനം.
വിമാനം അവസാന നിമിഷം വരെ പൈലറ്റിന്റെ നിയന്ത്രണത്തിലായിരുന്നു എന്ന ഇതുവരെ ഉയര്‍ന്നിരുന്ന പ്രബല വാദത്തെ തള്ളികളയുന്നതാണ് പുതിയ അനുമാനം. അങ്ങനെ ആരെങ്കിലും നിയന്ത്രിക്കുന്നുണ്ടായിരുന്നെങ്കില്‍ വീഴ്ചയുടെ ആഘാതത്തില്‍ വലിയ വ്യത്യാസമുണ്ടാകുമായിരുന്നുവെന്നും വിമാനം കൂടുതല്‍ തെന്നി നീങ്ങുമായിരുന്നു എന്നുമാണ് അന്വേഷണ സംഘം പറയുന്നത്. ടാന്‍സാനിയയില്‍ നിന്ന് കണ്ടെത്തിയ വിമാന ചിറകുകളിലെ ഫ്‌ലാപ് വിമാനത്തില്‍ നിന്ന് അടര്‍ന്നു മാറിയപ്പോള്‍ ശരിയായി വിന്യസിച്ചിട്ടുണ്ടായിരുന്നില്ല എന്നും കണ്ടെത്തിയിരുന്നു. സമുദ്രത്തില്‍ വിമാനം ഇറക്കുന്ന സമയത്ത് പൈലറ്റുമാര്‍ ഫ്‌ലാപ് കൃത്യമായി അനുയോജ്യമായ രീതിയില്‍ വിന്യസിക്കാറുണ്ട്.
ഇവയെല്ലാം ചൂണ്ടിക്കാണിക്കുന്നത് തകരുന്ന സമയത്ത് വിമാനം നിയന്ത്രിക്കാന്‍ ആരുമുണ്ടായിരുന്നില്ലെന്നാണ്. 2014 മാര്‍ച്ച് എട്ടിനാണ് 239 യാത്രികരുമായി മലേഷ്യന്‍ വിമാനം കോലാലംപൂരില്‍ നിന്ന് ബെയ്ജിങിലേക്ക് തിരിച്ചത്. റഡാറില്‍ നിന്ന് അപ്രത്യക്ഷമായ വിമാനത്തെ കുറിച്ച് നാളുകളുടെ തെരച്ചിലിനൊടുവിലാണ് വിശ്വസിക്കാനാവുന്ന വിവരം ലഭ്യമായത്.