തന്റെ എട്ടാം വയസില്‍ അച്ഛന്റെ ജീവന് വേണ്ടി മകന്‍ രണ്ടു മാസം കൊണ്ട് കൂട്ടിയത് 11 കിലോ ഭാരം. കാവോ യിന്‍പെന്‍ഗ് എന്ന എട്ടുവയസ്സുകാരനായ ചൈനീസ് ബാലന്‍ തന്റെ അച്ഛനെ ആശുപത്രിക്കിടക്കയില്‍ നിന്നുമെഴുന്നേല്‍പ്പിക്കാനുള്ള കഠിന പരിശ്രമത്തിലാണ്. വളര്‍ച്ചയുടെ ഈ പ്രായത്തില്‍ കുറഞ്ഞ സമയം കൊണ്ട് സൈഡ് ഇഫക്റ്റുകള്‍ ഇല്ലാതെ ഇത്രയും ഭാരം കൂട്ടുക എന്നത് ബുദ്ധിമുട്ടായിരുന്നു. കാവോയുടെ ഭക്ഷണരീതിയില്‍ മാറ്റങ്ങള്‍ വരുത്തി. മാംസാഹാരം കൂടുതല്‍ ഉള്‍പ്പെടുത്തി. ശാരീരികമായുള്ള അദ്ധ്വാനവും കളികളും നിര്‍ത്തി വച്ചു. ഇന്‍ഫെക്ഷനോ മറ്റു രോഗങ്ങളോ വരാതെയിരിയ്ക്കാന്‍ കൂട്ടുകാരെയും ബന്ധുക്കളെയും അകറ്റി നിര്‍ത്തി. കാവോയുടെ പ്രിയപ്പെട്ട ഭക്ഷണമെല്ലാം മുത്തശ്ശി എന്നും ഉണ്ടാക്കിക്കൊടുത്തു. തന്റെ അച്ഛന്റെ ജീവന്‍ രക്ഷിയ്ക്കാന്‍ സന്തോഷത്തോടെ കാവോ എല്ലാത്തിനോടും സഹകരിച്ചു. പരിശ്രമം എന്തിനാണ് എന്നറിയുമ്പോഴാണ് കണ്ണു നിറയുന്നത്.

ഈ വര്‍ഷം ആദ്യമാണ് കാവോയുടെ അച്ഛനു ലൂകീമിയ ആണെന്ന് കണ്ടെത്തുന്നത്.സ്‌റെം സെല്‍ മാറ്റിവയ്ക്കലാണ് ജീവന്‍ രക്ഷിയ്ക്കാന്‍ ഏകമാര്‍ഗ്ഗമായി ഡോക്റ്റര്‍മാര്‍ കണ്ടെത്തിയത്. അന്വേഷിച്ചിട്ടും ചേരുന ഡോണറെ കണ്ടെത്താന്‍ സാധിച്ചില്ല. പിന്നെയുള്ള ഒരു ഓപ്ഷന്‍ അദ്ദേഹത്തിന്റെ മാതാപിതാക്കള്‍ ആയിരുന്നു. പക്ഷെ പ്രായാധിക്യം ഒരു തടസ്സമായി. അങ്ങനെയാണ് എട്ടുവയസ്സുകാരന്‍ കാവോയിലെയ്ക്ക് അന്വേഷണങ്ങള്‍ ചെന്ന് നിന്നത്. പതിനെട്ടു വയസ്സിനു ശേഷമേ ബോണ്‍ മാരോ ഡോണേഷന്‍ അനുവദിയ്ക്കുകയുള്ളൂ. എന്നാല്‍ ഇത് പ്രത്യേക കേസ് ആയി എടുത്ത് ഒരാളുടെ ജീവന്‍ രക്ഷിയ്ക്കാന്‍ വേണ്ടി എന്ന നിലയില്‍ അനുവദിയ്ക്കുകയായിരുന്നു.

പക്ഷെ ഈ ശസ്ത്രക്രിയ നടക്കണമെങ്കില്‍ ഡോണരുടെ ശരീരഭാരം കുറഞ്ഞത് നാല്‍പ്പത്തഞ്ചു കിലോ ആവേണ്ടിയിരുന്നു. അതിനു വേണ്ടിയാണ് പതിനൊന്ന് കിലോ കൂട്ടാന്‍ തീരുമാനിച്ചത്. ജൂലൈ ആറാം തീയതി സര്‍ജ്ജറി നടന്നു.കാവോയുടെ അച്ഛന്‍ സുഖം പ്രാപിച്ച് വരുന്നു. ഭാരം കുറയ്ക്കാനുള്ള ശ്രമങ്ങളിലാണ് കാവോ ഇപ്പോള്‍.