പോര്‍ച്ചുഗലില്‍ കാട്ടുതീ പടര്‍ന്നുപിടിച്ച് ല്‍ 43 പേര്‍ കൊല്ലപ്പെട്ടു. കാറില്‍ യാത്ര ചെയ്തവരാണ് മരിച്ചവരില്‍ ഏറെയും. കാര്‍ യാത്രക്കാര്‍ കാറിനുള്ളില്‍ വച്ച് വെന്തുമരിക്കുകയായിരുന്നു. ഞായറാഴ്ച പോര്‍ച്ചുഗല്‍ സര്‍ക്കാരാണ് ഇക്കാര്യം അറിയിച്ചത്. തീപിടുത്തത്തില്‍ 59 പേര്‍ക്ക് പരിക്കേറ്റിട്ടുണ്ട്. തീപിടുത്തത്തിലുണ്ടായ നാശനഷ്ടങ്ങളെക്കുറിച്ചുള്ള കണക്കുകള്‍ ലഭ്യമല്ലെന്ന് സര്‍ക്കാര്‍ വ്യക്തമാക്കി.

600 അഗ്‌നിശമന സേനാ പ്രവര്‍ത്തകരും 160 ഫയര്‍ എന്‍ജിനുകളുമാണ് തീയണക്കുന്നതിനായി സ്ഥലത്തെത്തിയിട്ടുള്ളത്. ശനിയാഴ്ച വൈകിട്ട് പെട്രോഗാവോ ഗ്രാന്‍ഡെ മുനിസിപ്പിലാറ്റിയിലെ കോയ്മ്പ്രയില്‍ നിന്ന് 50 കിലോമീറ്റര്‍ അകലെ നിന്നാണ് തീപിടിച്ചത്.

അടുത്ത കാലത്ത് പോര്‍ച്ചുഗലിനെ ഞെട്ടിച്ച ദുരന്തമാണിത്. മരണനില ഉയരാനുള്ള സാധ്യതയുണ്ടെന്ന് ലിസ്ബണിലെ സിവില്‍ പ്രൊട്ടക്ഷന്‍ ആസ്ഥാനം വ്യക്തമാക്കി. യൂറോപ്യന്‍ യൂണിയന്‍ തീയണക്കുന്നതിനുള്ള വിമാനങ്ങളും വാഹനങ്ങളും വിട്ടുനല്‍കിയിട്ടുണ്ട്. യൂറോപ്യന്‍ യൂണിയന്റെ സിവില്‍ പ്രൊട്ടക്ഷന്‍ വഴി ഫ്രാന്‍സും മൂന്ന് വിമാനങ്ങള്‍ വാഗ്ദാനം ചെയ്തിട്ടുണ്ട്.

40 ഡിഗ്രി സെല്‍ഷ്യസ് വരെയാണ് അന്തരീക്ഷ താപനില അനുഭവപ്പെടുന്നത്. 59 പേര്‍ക്ക് തീപിടുത്തത്തില്‍ പരിക്കേറ്റു. തീപിടുത്തം കൂടുതല്‍ നാശം വിതച്ച പ്രദേശങ്ങളില്‍ നിന്ന് ജനങ്ങളെ മാറ്റിപ്പാര്‍പ്പിക്കുന്നുണ്ട്. എന്നാല്‍ നാശനഷ്ടങ്ങളെക്കുറിച്ചുള്ള കണക്കുകള്‍ ലഭ്യമല്ല. കഴിഞ്ഞ വര്‍ഷമുണ്ടായ കാട്ടുതീയില്‍ 100,000 ഹെക്ടര്‍ വനമാണ് കത്തിനശിച്ചത്.