കൊളംബിയയില്‍ 150 സന്ദര്‍ശകരുമായി പോയ ബോട്ട് നദിയില്‍ മുങ്ങി അനേകര്‍ കാണാതായതായി റിപ്പോര്‍ട്ടുകള്‍. പ്രധാന ടൂറിസ്റ്റ് കേന്ദ്രങ്ങളില്‍ ഒന്നായ ഗുട്ടാപ്പേ നഗരത്തിലെ എല്‍ പെനോള്‍ തടാകത്തിലായിരുന്നു ദുരന്തം. അപകടത്തില്‍ ഒമ്പതു പേര്‍ മരിച്ചതായും 28 പേരെ കാണാതായതായും സ്ഥിരീകരണമുണ്ട്. അപകടകാരണം ഉള്‍പ്പെടെയുള്ള കൃത്യമായ വിവരം കൊളംബിയന്‍ സര്‍ക്കാര്‍ പുറത്തുവിട്ടിട്ടില്ല. ഞായറാഴ്ച ഉച്ചകഴിഞ്ഞായിരുന്നു അപകടം.

വിനോദസഞ്ചാരത്തിനായി ഉപയോഗിക്കപ്പെടുന്ന നാലു നിലകളുള്ള ബോട്ടുകളില്‍ ഒന്നാണ് മുങ്ങിയത്. നഗരത്തില്‍ നിന്നും 68 കിലോമീറ്റര്‍ അകലെയുള്ള പ്രധാന വിനോദസഞ്ചാര മേഖലകളില്‍ ഒന്നായ ഇവിടം പ്രധാന ടൂറിസ്റ്റ് കേന്ദ്രങ്ങളില്‍ ഒന്നാണ്. അതുകൊണ്ട് തന്നെ അപകടത്തില്‍ പെട്ടവരില്‍ കൂടുതലും വിദേശികളായിരിക്കാമെന്നാണ് വിലയിരുത്തല്‍. സ്ഥലത്തേക്ക് വ്യോമസേനയുടെ ഹെലികോപ്റ്റര്‍ അയച്ചിട്ടുള്ളതായി വ്യോമസേന ട്വിറ്ററിലൂടെ അറിയിച്ചിട്ടുണ്ട്.

അപകടം നടന്ന ഉടന്‍ തന്നെ സ്‌കൂബാ ഡൈവേഴ്‌സും അഗ്‌നിശമന വിഭാഗവും ഉള്‍പ്പെട്ട പ്രത്യേക ടീമിനെ മെഡലിന്‍ മേയര്‍ ഫെഡറിക്കോ ഗ്വുട്ടിറെസ് അയച്ചിട്ടുള്ളതായും ട്വീറ്റ് ചെയ്തിട്ടുണ്ട്. സാമൂഹ്യമാധ്യമങ്ങളില്‍ കറങ്ങിക്കൊണ്ടിരിക്കുന്ന ദൃശ്യങ്ങളില്‍ നാലു നിലകള്‍ വരുന്ന ബോട്ട് മുങ്ങുന്നതും അനേകര്‍ രക്ഷാപ്രവര്‍ത്തകര്‍ക്കൊപ്പം പോകുന്നതും കാണാം. കാര്യങ്ങള്‍ ഏറെ ഗൗരവതരമാണെന്ന് ആന്റിയോക്കിയ സര്‍ക്കാര്‍ പറഞ്ഞു. രക്ഷപ്പെടുത്തിയവരെ സമീപത്തെ പ്രാദേശിക ആശുപത്രിയില്‍ പ്രവേശിപ്പിച്ചിട്ടുണ്ട്.

തിങ്കളാഴ്ച അവധിയായിരുന്നതിനാല്‍ അനേകര്‍ ഇവിടേക്ക് എത്തിയിരുന്നു. ബോട്ടില്‍ ആള് വളരെ കൂടുതലായിരുന്നെന്നും ലൈഫ് ജാക്കറ്റ് ഉള്‍പ്പെടെയുള്ള മതിയായ സുരക്ഷാ സംവിധാനങ്ങള്‍ പോലും യാത്രക്കാര്‍ക്ക് നല്‍കാതെയാണ് ബോട്ട് യാത്ര നടത്തിയതെന്നാണ് രക്ഷപ്പെട്ടവരുടെ ആദ്യ പ്രതികരണം.