ഉത്തര കൊറിയയോട് ക്ഷമിക്കുന്നതിന്റെ പരിധി അവസാനിച്ചുവെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് വ്യക്തമാക്കി. ഉത്തര കൊറിയ ആണവ പരീക്ഷണം തുടരുന്ന സാഹചര്യത്തിലാണ് ട്രംപ് നയം വ്യക്തമാക്കിയത്. രാജ്യത്തെ ജനങ്ങളുടെ ജീവന് യാതൊരു വിധ വിലയും നല്‍കാത്ത സമീപനമാണ് ഉത്തര കൊറിയയ്ക്ക് ഉള്ളതെന്നും അദ്ദേഹം വ്യക്തമാക്കി. ഉത്തര കൊറിയയോട് നയതന്ത്രപരമായ ക്ഷമ പുലര്‍ത്തുന്ന ഘട്ടം അവസാനിച്ചുകഴിഞ്ഞു.
വീണ്ടുവിചാരമല്ലാത്തതും ക്രൂരവുമായ ഉത്തര കൊറിയയുടെ നീക്കം ദക്ഷിണ കൊറിയയ്ക്കും അമേരിക്കയ്ക്കും വലിയ ഭീഷണിയാണുയര്‍ത്തുന്നത്. സ്വന്തം ജനതയ്‌ക്കോ അയല്‍ രാജ്യങ്ങള്‍ക്കോ മനുഷ്യ ജീവനോ യാതൊരു പരിഗണനയും അവര്‍ നല്‍കുന്നില്ല ട്രംപ് പറഞ്ഞു.

വൈറ്റ് ഹൗസില്‍ ദക്ഷിണ കൊറിയന്‍ പ്രസിഡന്റ് മൂണ്‍ ജെയുമായി നടത്തിയ കൂടിക്കാഴ്ചയ്ക്ക് ശേഷം സംസാരിക്കുകയായിരുന്നു ട്രംപ്. ന്യുയോര്‍ക്ക് യുദ്ധ ഭീഷണി നേരിടുന്ന ഉത്തര കൊറിയയ്‌ക്കെതിരെ സൈനിക നടപടി സ്വീകരിക്കുന്നതിനെ അമേരിക്കയിലെ 53 ശതമാനം വോട്ടര്‍മാരും അനുകൂലിക്കുന്നതായി ഫോക്‌സ് ന്യൂസ് നടത്തിയ സര്‍വ്വേ ചൂണ്ടിക്കാട്ടിയിരുന്നു. ഇതിന് പിന്നാലെയാണ് ഉത്തര കൊറിയയ്‌ക്കെതിരെ സൈനിക നടപടി സ്വീകരിക്കുമെന്ന സൂചന നല്‍കി ട്രംപ് നയം വ്യക്തമാക്കിയിരിക്കുന്നത്.