ഇസ്രയേലില്‍ എത്തിയ ഇന്ത്യന്‍ പ്രധാനമന്ത്രി താമസിക്കുക ലോകത്തിലെ ഏറ്റവും സുരക്ഷിതമായ ഹോട്ടല്‍ മുറിയില്‍. ജറുസലേമിലെ കിങ് ദാവീദ് ഹോട്ടലിലാണ് പ്രധാനമന്ത്രി താമസിക്കുന്നത്. ബോംബാക്രമണം, രാസാക്രമണം തുടങ്ങി എല്ലാത്തരത്തിലുള്ള ആക്രമണങ്ങളെയും ചെറുക്കാന്‍ സാധിക്കുന്നതാണ് പ്രധാനമന്ത്രി താമസിക്കുന്ന ഹോട്ടലിലെ മുറി. ഹോട്ടല്‍ മുഴുവന്‍ ബോംബാക്രമണം നടത്തിലായും പ്രധാനമന്ത്രി താമസിക്കുന്ന മുറിക്ക് കേടുപാടുകള്‍ ഉണ്ടാകില്ല.

മോദിക്കും പ്രതിനിധി സംഘത്തിനും വേണ്ടി 110 മുറികളാണ് ഒഴിപ്പിച്ചതെന്ന് കിങ് ദാവീദ് ഹോട്ടല്‍ ഡയറക്ടര്‍ ഓഫ് ഓപ്പറേഷന്‍സ് ഷെല്‍ഡോണ്‍ റിറ്റ്‌സ് പറഞ്ഞു. ക്ലിന്റണ്‍, ബുഷ്, ഒബാമ, ട്രംപ് എന്നിങ്ങനെയുള്ള അമേരിക്കന്‍ പ്രസിഡന്റുമാര്‍ക്കെല്ലാം തങ്ങള്‍ ആതിഥേയം അരുളിയിട്ടുണ്ട്. ഇപ്പോള്‍ നരേന്ദ്ര മോദിക്കും ആതിഥേയം അരുളുന്നുവെന്നും റിറ്റ്‌സ് പറഞ്ഞു. 

മോദിയുടെ സസ്യാഹാര ഭക്ഷണശീലത്തെ ബഹുമാനിച്ചുകൊണ്ട് മുറിക്കുള്ളില്‍ തന്നെ പ്രത്യേക അടുക്കള അടക്കമുള്ള സംവിധാനങ്ങള്‍ ക്രമീകരിച്ചിട്ടുണ്ട്. പ്രധാനമന്ത്രിക്ക് വേണ്ടി ഗുജറാത്തി ഭക്ഷണമാണ് ഹോട്ടലില്‍ ക്രമീകരിച്ചിരിക്കുന്നതെന്നും ഹോട്ടല്‍ അധികൃതര്‍ പറഞ്ഞു. ഇതിനുള്ള ഏതാണ്ട് എല്ലാ ചേരുവകളും ലഭിച്ചിട്ടുണ്ട്.

യഹൂദ ഭക്ഷണനിയമത്തിന്റെ ചട്ടങ്ങള്‍ പാലിക്കുന്നവയാണ് എല്ലാ ചേരുവകളും. എന്തെന്നാല്‍ ഹോട്ടലില്‍ ഇത് പ്രകാരമാണ് ഭക്ഷണം പാചകം ചെയ്യുന്നത്. അതിനാല്‍ യഹൂദ ഭക്ഷണനിയമത്തിന്റെ ചട്ടങ്ങള്‍ പാലിക്കാത്ത ചില ചേരുവകള്‍ മാത്രമാണ് ഒഴിവാക്കിയിട്ടുണ്ടെന്നും ഹോട്ടല്‍ അറിയിച്ചു.